¹ Israel iny mahãdu raryberenyre: — Bòdòike, ibutumy iny boho Deuxu Tyhyhykỹ-ò ròòserenyra. Tii riwawotõmonyrenyra, ka òbitityhymy tii riwateytenyrenykre; tii riwararytxynyrenyre ka òbitityhymy tahe tii ixyby wadeereny reòbykre. ² Ka txu inatxi-di aõbo yda txuu inataõ-di aõbo, tii wadeereny ruru tỹmyra idiwahinykre, kia lamamy riwatamadỹỹnyrenykre ka diarỹ boho tahe tamydeewihyy ariwinyrenymy aroirenyrekre. ³ Diarỹ boho Deuxu Tyhyhykỹ-dihyy aroirenyrekre kia òbitimy iwese txuu ròhònymyhỹre wesemy, tii kanakre wawiòhedỹỹrenymy; kia òbitityhymy kanakre iwese noiròsò biulòra ròamyhỹre wesemy suu rituunymyhỹre. ⁴ Ka Deuxu Tyhyhykỹ rirawyònyre: — Aõbohe Israel adee ariwinykre? Kai tule Juda aõbohe adee ariwinykre? Inymy terinanymyhỹtenyte heka iny tibede-ò ramyhỹre wesena rare, kia txuu reamyhỹre wesemy; kia beõrahasa ru-di ruỹmyhỹre wesemy. ⁵ Iurenana heka reteònyre warybe-di ijohodu mahãdu tuu raryberenykremy diarỹ arararytxynyrenykremy kia arahurenykremy. Kia heka akireny reijemyhỹrenyre itỹnymy txuu ròhònymyhỹre wesemy. ⁶ Diarỹ heka kai boho wamy berinanybenykemy adireny resỹnymyhỹre kia xiwena wadee biwahinybenykemy aõkõ kia xiwena rasõmyhỹre wadee biwybenyke-ribi, diarỹ heka wasỹreny waijoireny riwatyhynyke sohojilemy reamyhỹre. ⁷ –Ka Adã hãwaki wasỹreny waijoireny warybe wahidỹỹna rikròrenyre kia tamy rewinyre kuaki kia tahe riwatyhynyõhyyrenyre. ⁸ Gileade heka hãwã sõemy aõbinabina-di roimyhỹre sõemy aleerydu mahãdu-di. ⁹ Deuxu rybe-di Ijohodu mahãdu heka wasiduhona roire kia wasimy rorurumyhỹrenyre iny witxira riwasinyrenykremy. Sikem-ò ryy ramyhỹre-ki tii boho reerynymyhỹrenyre kia iwitxiramy aõbina riwinymyhỹrenyre. ¹⁰ Diarỹ tuu rabire aõnaõna binahãkỹmy Israel su-ki wasỹreny waijoireny iwitxira ỹnyxiwe-my rerinanymyhỹrenyre iurenana heka isuisumy ratximyhỹrenyre. ¹¹ –Kia itxureny reywinyre ibedeu Juda iny mahãdu arirarytxynyrenylekre.