3 ¹ Kia heka ibutumy abededỹỹnana ikonanadi lehekỹ rỹire, kia heka biu bederawo-ò rawahimy roimyhỹre: ² Kia uladumy adiwo-ribi beakre, bobrokre, kia aõbo tebrònyte bisihekre; ³ Kia beerynykre, kia beytekre; kia iny behukre, kia heto binykre; ⁴ Kia bede biryrykre, kia tahe mabedesakre; kia mahinykre, kia tahe ta besekre ixenadi. ⁵ Kia mana biuberanykre, kia mana widee bibutunykre; kia iny bimykre, kia iny-ribi bexilòhòrarienykre; ⁶ Kia aõ biòrykre, aõ-ribi bexirykre; Kia aõ birarenykre, kia ahãna-ki boikre; ⁷ Kia aõ biykakre, kia aõ biretykre; kia rybeõmy matxikre, kia marybekre; ⁸ Kia inymy berinanykre, kia awoxiroburobukre, kia mawounykre, kia awimy wouõmy matxikre. ^{9 10} Deuxu aõmysỹdỹỹnamy rabire, hãbu riòre mahãdu-ò riwahinyre tii boho-wana aõhỹỹhỹỹmy rutỹỹnyrenykremy. ¹¹ Deuxu ibutumy aõnaõnawiwi riwinyre ka hãwa bedeki raremyhỹu; kia hãbu coraçaõ-ò hedỹỹna riwahinylere, kia hãbu Deuxu aõmysỹdỹỹna rieryõhyymyhỹre, kia iòraru-ribi riòrarunyre ikonanaòhòkỹle. ¹² Tai tahe ibutumy bede reeryre kaki, aõbo iny riwinykre, kia heka timykibo awimy ibedesamy ratxikemy ixidi risỹnyke. ¹³ Ibutumy heka iny boho rikiroximyhỹrenyke bemy rikiõmyhỹrenyke, awimy aõwi iny boho taõmysỹdỹỹna brò-ribi riwymyhỹrenyre. Kia heka Deuxu inydeereny riwahinymyhỹre. ¹⁴ Kia heka ibutumy reeryre, Deuxu riwinyre ikiemy rỹikre; kia tiu inyõ rihejiõtyhy, kia tiu inyõ itarasaõna; kia heka Deuxu tuu riwinyre hãbu mahãdu ilau ruberurenykremy. ¹⁵ Aõbo rare heka rare, kia aõmybo rarekemy raremyhỹ tule rare; Deuxu heka aõnaõna rexihure ixybyle riywinymy ritỹmyranykre. ¹⁶ Kia ta ihãremy rabire txu rawo-ki, kia iny òbitimy rỹimyhỹre rynana-ki iny itxỹte riwedunymyhỹmy, kia tasỹ ijõ rynana-ki iny itxỹtele tai runyremy. ¹⁷ Tai tahe ixidee rarybere: Deuxu iny inytyhy iny itxỹte mahãdu-wana ributunymy idireny rehukre; kia dori bededỹỹnana tuu roimyhỹre, ibutumy aõmysỹdỹỹna-ò tule. ¹⁸ Kia ihãremy ixideele rarybere: Kia heka hãbu mahãdu riòre òraru-ki, Deuxu inatyhymy riteòsinykemy, kia tii boho ixidirenyle retehenykre iròdu iròdu wesemy. ¹⁹ Aõherekibo aõbohe iwitxirare hãbu mahãdu riòre iròdu iròdu-ribi; kia heka ijõ rurumyhỹre, iwesele tahe ijõ rurumyhỹre, kia heka ibutumy wiweseweselemy rỹimyhỹrenyre, kia heka aõki hãbu riòre iròdu iròdu ratyre ròhònyhyymyhỹre; kiemy dori ibutumy irybe-ò ijohonareny rieryõre. ²⁰ Kia heka ibutumy wibedeõlehekỹ roirenykre; kia ibutumy sunode-ribi ròrarunyrenyre, kia tahe sunode-ò ròòserenykre. ²¹ Mobo hãbu mahãdu riòre bededỹỹnana rierymyhỹre, kia biu-ò ixidireny ramyhỹremy, kia iròdu iròdu mahãdu tahe bede-ò, su-ò aõbo? ²² Kia aõnaõwimy rabire heka ijõ wiribi awiõhyyre, hãbu ribedesanykemy iaõmysỹdỹỹna-ribi, kiemy kia tamy awire; mobo tahe ixyby kidiòkesedỹỹnyrenykre aõbo isỹtybyrenymy rỹikreu?