2 ¹ Tai tahe areysakremy rexiywinyre, waki bedeki aõnaõwiwihikỹ-ò arexideysanykremy rexiywinyre. Kia ta itxi rearemy reeryre, kia heka bõdỹỹnaõle rare. ² Kia heka rebutunyre, iny widee rutxue mymyhỹre, kia ibina rare, kia iny widi rexiruburubunymyhỹre, kia aõmy inydee awiõhỹỹre. ³ Kia fa ixybu timykibo ijõ-txi areakemy reijene, kia tahe (vinho) tori mona-di rexideysanyre. Idi rahotinyre tii aõnaõna-ribi awityhy resỹny raholare, iny ide rexideysanymy fabecledyynana riore-di kaki su-ki. ⁴ Aõnaõna ninihikỹ heka rewinyre. Heto ixidee rewinyre, kia tahe Uva ixidee rebrònyre. ⁵ Kia oworu riòre rebrònyre, kia ibutumy bederade òtaòta tuu rebrònyre. ⁶ Kia suwory rewinyre idi bee alòbròna-ò reamyhỹkremy. ⁷ Kia sõemy iny aõmysỹdỹỹdu mahãdu reõbranyre, kia ihãremy ta ijõ waki rỹira, kia wahetoki ruarenyre. Diarỹ sõemy broreni waki ijõdire, kia sõemy budoeni waki ijõdire, kia iny mahãdu wakoki Jerusalem-ki rahãwanyrenyre ratyremy wanohõ ijõdire. ⁸ Kia manatere rỹsỹ womati rỹsỹ-wana ixidee rebutunyre, Iòlò hõrõ wahe, kia suuki redinodunyreki wahe. Hãbu mahãdu hãwyy mahãdu-wana wadireny rawiunyrenyre rexideybinymy, Kia ibutumy hãwyy mahãdu rỹire, hãbu mahãdu-ribi aõwaxina ijõmy bexitòenyke. ⁹ Kohe, diarỹ heka ityhy nihikỹmy raremyhỹ. Diarỹ heka ityhy nihikỹmy raremyhỹ, kia ibutmy Jerusalem-ò hãwamy dirahude wakoki, kia iratyrerenymy ityhymy raremyhỹ, kia tahe tiu bedeery waki rasiranyõhyyre. ¹⁰ Kia ibutumy aõmybo reamy raremyhỹ-txi ixidee remyre. Kia ixidee aõmy raroiõhyymyhỹre, aõnaõna wiwiki. Diarỹ heka awimy ixiki rahãmyhỹre waõmysỹdỹỹnaki, ka heka juhuu waõmysỹdỹỹ reeryre. ¹¹ Kia ta, ibutumy aõnaõna-di reledi rahõtinyre, kia waõmysỹdỹỹnaki rewinyredi tule, kia tahe reeryre, kia heka ibutumy bòdỹỹnale rare, kia iny aõ idi ritaõhyymyhỹre. Kia heka iwese iny yhy hewomy reamyhỹre wesenale rare. ¹² Tai tahe, ixyby rahõtinyre bedeery nihikỹdi, kia iny itxỹte mahãdudi tule. Beteheini iurihina:Kiaõbo Iòlò aõwaxina aõ riwinyke itỹmyramy? Kõre. Kia aõwaxina Iòlò mahãdu riwinyrenyretybyle riwinyke, kia Iòlò mahãdu ikoki ridinodunyrenyre wahe. ¹³ Kia ikonana-ò rehemynymy reeryre, kia bedeery nihikỹ heka iny itxỹte mahãdu-ribi awire, iwese tahe loosona bedeluru-ribi awire. ¹⁴ Kia tahe diarỹ reerymyhỹre, kia aõhebo bedeery nihikỹ rutỹỹnymyhỹrenyre, kia iwesele iny itxỹte mahãdu aõhe rutỹỹnymyhỹrenyre. ¹⁵ Tai diarỹ myy rahõtinyre: “Aõhebo iny itxỹte mahãdu rutỹỹnymyhỹrenyre, kia iweserenyle aõhebo arutỹỹnykre. Taita, aõbo tahe tai retare bedeery nihikỹmy wahãreki?” Kia ta rerawyònyre: “Aõ retaõhyyre!” ¹⁶ Tiu heka iny-õ ixitxi ikiemy tõhõti ijaraõna bedeery nihikỹmy, kia iyrybule tiu inyõ iny itxỹte mahãdutxi tõhõti reaõtyhy kiehyyle. Kia bedekonanau ibutumy iny boho rukusarenykre. Ibutumy rukururenykre, bedeery nihikỹ mahãdu iny itxỹte mahãdureny-wana. ¹⁷ Iurenana heka bededỹỹnana raòrarunyre, kia aõki wadee awiõhyyre: Kia heka bedejeijeile wadee diwyde. Kia ibutumy bòdỹỹnale heka rare:diarỹ yhy hewotỹkỹna reamy raremyhỹ. ¹⁸ Kia ibutumy diarỹ ijõdire, waõmysỹdỹỹnabrò-ribi ixidee rewyre, kia aõki wadee awiõhyyre. Kia reeryre ibutumy aririkre Iòlò-ò warynatyby-ò runykremy. ¹⁹ Tii tahe txibo aõwaxina bedeery nihikỹ aõbo, yda txibo iny itxỹte aõbo —mobo tahe rierykre? Tai tahe tii ibutumy aõnaõna riwedunykre, ka diarỹ waõmysỹuludumy remyre wahe, kia tahe ibutumy riwedunykre, aõbo wabedeery nihikỹ wadee riwahinyre ka hãwaki. Kia heka ibutumy bòdỹỹnale rare. ²⁰ Tai tahe diarỹ ixidee rexirahere sõemy raõmysỹdỹỹnyreki, kia sõemy wanohõti rawerywerynyre iòraruki. ²¹ Kia iny raõmysỹdỹỹnymyhỹre, tabedeerydi, taerynadi, taraywidi, kia aõ ixidee ritakremy, irahudi tahe ibutumy ixihewo-ò ririmyhỹre iny witxiradee, kia aõ riwinyõmyhỹredeele. Kia heka bòdỹỹnale rare, kia òbiti aõkõ rare! ²² Iny boho heka raõmysỹdỹỹnymyhỹrenyre, iny boho rõhõtiyremyhỹrenyre bededi ibutumy, aõbo tahe iny boho idi ritamyhỹrenyre? ²³ Kia ibutumy aõbo iny boho riwinymyhỹrenyre, kia aõ inydeereny riwahinyõhyymyhỹre, kia heka nohõtiyrenale aõbinabinale inydeerene riwymyhỹre. Iny boho rekexielehynyrenyke ihoõre, rumy tule ihoõre. Kia heka ibutumy bòdỹỹnale rare. ²⁴ Aõbo iny awityhymy riwinyke, iny riroxike, iny monamy riõke, kia tahe rexideysanyke tanieru-di ritare wahe. Kia tahe reeryre, kia aõnaõna rỹimyhỹre, kia Deuxu-ribi namyhỹde. ²⁵ Deuxu ihoõkeki, timybo tahe aõbo rikirỹsỹrenyke, aõdibo tahe rikexideysanyrenykre? ²⁶ Tii heka bedeery nihikỹ, aõerydỹỹna, bede deysana inydee riwahinymyhỹre, momybo reòarimyhỹre-ò. Deuxu heka iny itxỹte mahãdu riaõmysỹdỹỹnymyhỹre, tanieryreny ributunymyhỹrenyre, kia iaõnarenytyhydỹỹna, kia iny witxira-ò rawahikremy, momybo sõetyhymy reòarimyhỹre-ò. Kia ibutumy bòdỹỹnale rare. Kia heka ibutumy iwese yhyhewomy reamyhỹre wesele.