4 ¹ Kia ihãremy ibutumy aõnaõna binabinamy rabire hãwa bede-ki. Kia uladu tybykõmy rỹimyhỹrenyre rubemy rabire, kia iny-õ riruxetòenyõhyylemy; kia aõhyymy rutỹỹnymyhỹrenyre deboki ehehenamy tuu rabire, kia moõ riruxetòenanyõhyylemy. ² Kia idi sõemy watximyhỹre, kia rexihurenyre, kia irumy rỹimyhỹrenyre ratyremy; ³ Kia ihãremy wabedesamy idi watximyhỹre ijõ mahãdureny-ribi, kia uladumy ruaõmyhỹrenyre boho, kia dori aõmysỹdỹỹ binabinamy robiõlemy ratximyhỹrenyre, kia txu rawomy riwinymyhỹrenyre. ⁴ Tai tahe ibutumy aõmysỹdỹỹmy rabire, aõmysỹdỹỹ utxiemy, ka heka hãbu mahãdu widee rexiwobinanymyhỹre. Kia heka xiwedele rare, yhy hewomy reamyhỹre. ⁵ Iny itxỹte mahãdu heka aõ riwinyõlemy rỹimyhỹre, urile terowomy rerimy, kia taderenyle riròmyhỹrenyre, myy rarybemyhỹrenyre: ⁶ Debole heka awire ixielehydỹỹna-ki, kia iny mahãdu debo sõemy aõmysỹdỹỹdi rỹimyhỹre, kia yhy hewomy reamyhỹrenyre. ⁷ Kia ixyby ka hãwa bededỹỹnana-ki rahãre, kia awi aõkõ rare. ⁸ Kia hãbu ixi sohojimy rỹimyhỹre, ibiòwaõmy, iriòreõmy, iseriòreõmy, kia ixyby ixybyle raõmysỹdỹỹnymyhỹre, kia tiu ixi-ki awimy rõhõtiõhyymyhỹre taityhynadi. Aõmybohe sõetyhymy naõmysỹdỹỹnymyhỹde, taõwiwi diatymy naõmysỹdỹỹnymyhỹde? Kia heka bòdỹỹnale rare, kia bede riryrymy ratximyhỹre. ⁹ Kia iny inatxi-ki heka awire iny sohoji-ribi, kia iny inatxi wiwana raaõmysỹdỹỹnymyhỹre, kia tahe inihikỹmy ròtamyhỹrenyre. ¹⁰ Txibo ijõ rariòwykeki, kia ibiòwa riwiòhenanyke rỹikremy. Kia txibo iny ixi sohoji ratxikeki tahe rariòwyke, kia tahe ibinamy tabededỹỹnanadi ratxikre, kiemy dori iny ihòõre riwiòhenanymy ritamadỹỹnykemy. ¹¹ Kia bede rutàtàkeu, kia tii boho aõwaxina wiwana rõrõrenyke, kia tahe ratòteerenyke; ka iny sohoji-ki tahe timybo rexitòteenyke? ¹² Iny inatxi hãbu tiu ibòdurenyõna, kia ijõ aõbina-ribi ròtake. Reruti sohoji inataõ reruti-wana kia isiramy rayròmyhỹre. ¹³ Kia weryrybò iaõkõmy rỹimyhỹre, kia Iòlò matuari ribi ibedeerymy ratximyhỹre, kia itxỹtemy rube-ò roholaõhyymyhỹre. ¹⁴ Kia hãbu-õ brejuna woribi kòdòhònyke hãrele hãwa nihikỹ wedumy runyke, kia iaõkõ ruake hãrele. ¹⁵ Diarỹ ibutumy iny ka hãwamy rỹimyhỹredi rahõtinymyhỹre, kia tahe rahõtinyre kia heka hãwa bedeõ-ribi weryrybò ijõdire Iòlò ryrynadi rahỹỹnanykre. ¹⁶ Kia heka sõemy iny rỹimyhỹre, kia tahe iny sohojile hãwa nihikỹ riwedunymyhỹre; kia tahe tiubo tahe Iòlò-ribi rexiixawidinykre, tiu heka iny-õ tawidỹỹnamy reàlàõhyymyhỹre. Kia heka bòdỹỹnale rỹire, kia yhyhemy reamyhỹre wesele.