¹ Ijõtxuu Davi rỹỹraxire: —Sau sỹ mahãduõ aõkõbo ijõ irumy ihỹmyhỹre? Ka txibo ijõ ihỹre wana, tamy aõwiwihikỹle ariwinykre, Jonata òraru-ki. ² Aõmysỹdỹỹduõ ihỹmyhỹ Ziba inire, Sau sỹ mahãduõ. Inyõ tamy rarybere Davi-ò rybemy rakemy. —Kaibe Ziba tate? — wedu tamy rỹỹraxire. —Kohe, tii watxireri, manarybeta ixinamy! —Kawesemy rirawyònyre. ³ Wedu tamy rỹỹraxire: —Sau sỹ mahãduõ aõbo heka ijõ aõbo ihỹõmyhỹre aõmakemy aõwiwihikỹle tamy ariwinymy aratxikemy, tuu Deuxu dee raryberemy? Ziba rirawyònyre: —Kohe. Jonata riòre ihỹmyhỹde. Tii iti ibinamyhỹre wiole. ⁴ —Tikibota ratxireri? — Wedu rỹỹraxire. —Maki heto-ki, Amiel riòreki, Lo-Denar hãwa-ki! — Ziba rirawyònyre: ⁵ Tahe Davi rarybere inyõ riòrykremy. ⁶ Mefibosete rehemynyreu, Jonata riòre, Sau riokore, tatiowomy resere tule suò taò ritidire Davi ruò tyhy bededỹỹnanamy. Kiamy Davi rarybere: —Mefibosete! —Wedu, manarybe ixinamy! —Kawesemy rirawyònyre. ⁷ Brebuõmykre! Davi tamy rarybere. — Jiarỹ adee awimy ararekre Jonata òraru-ki, buu wahe. Jiarỹ ixyby suu adee ariwahinykre alabiè Sau su, tule ixinamy kai wadee manamyhỹkre. ⁸ Mefibosete ixybyle rexisỹrabunyre ta rirawyònyre: —Jiarỹhe ijòròsa rubu ratyre wawike ihoõre! Aõherekibo heka wadi awimy atxiteri? ⁹ Wedu Ziba dee rarariòwyre, Sau aõmysỹdỹỹdu-ò, kiamy rarybere: —Jiarỹ Mefibosete dee ixybyle ariwahinykre, awedu riokore-ò, ibutumy aõbo Sau hõrõ rare isỹreny wana ihõrõreny. ¹⁰ Kai, ta ariòreboho ta aõmysỹdỹỹdu mahãdumy wana suu bisuuxinybenykre awedu Sau sỹ mahãdu-ò tule irahudi bihebenykre (irsỹnadimy) roirekremy. Ka Mefibosete tahe tiiemy waheto-ki tii wana ariraximy ararekre. Ziva waiyreny iriòre sõere tule waituemy iaõmysỹdỹỹmy mahãdu sõe. ¹¹ Tii rirawyònyre: —Ibutumy adee ariwinykre arybe mynamy. Irahudi xe Mefibosete wedu heto-ki riroximyhỹre, iriòre wesemy. ¹² Mefibosete iriòre wexyy ijõdire Mika inire. Ziba sỹmahãdu ibutumy Mefibosete deòdumy rironyrenyre. ¹³ Kiamy Mefibosete, iti wiòmy ibinamy raremyhỹ, Jerusalẽ-ki rahãwanymy raremyhỹ tule byrena bedeu wedu wana hyy riroxirerimy ihỹre.