¹ Davi amonita mahãdu ribi ròture sirio mahãdu ribi tule. Tiutxuubota wedu Naà rurure, Amo bede ludu, taira iriòre Hanu teròwymy wedumy runyre. ² Ta Davi kiamy rarybere: —Hanu dee awimy ararekre, Naà di raremyhỹ wese, tyby dori, wadee awi rare. Tahe teòdu riteònyre tamy awimy ratxirerimy rybemy. Ka rirònyreu, teòdu mahãdu Habà hãwa-ò. ³ Amonita mahãdu kialemy tawedu-ò raryberenyre: —Aõmamy heka idi tahõtinyteri Davi dee buu awimy raremyhỹ òraru-ki tule tii adi awimy rarekemy aõbo idi tahõtinyteri? Tureri aõkõ heka! Aõmamy heka riteònyrenyreri hãwã erysymy, hãwã rahurenykremy. ⁴ Tai òrarukita Hanu Davi deòdu mahãdu rimyrenyre, isuusireny iyeribi riorore iribireny, tule ityyreny riorore irahudita riteònyrenyre. ⁵ Irahudi Davi rieryreu, ixyby teòdu mahãduõ riteònyre tiiboho wana witxi rekoakremy kiemy raixỹrurenyreri òraru-ki. Kiamy Davi tarybe tamyreny riwahinyre Jerikò hãwa-ki le ratxirenykremy aõma uhukỹle riòkeserenykremy tahãwareny-ò isuusirireny ixyby ruhudihikỹle. ⁶ Amonita mahãdu xe irahudi rexieryrenyre Davi taòludumy ixidee rirahòrerenyremy. Iòrarukita, 20 mil-my sirio sodadu mahãdu dee rarariòwyrenyre, mil hãbu sõemy, 12 mil-my tasỹ Tabe hãwaribire. ⁷ Davi tuijyy rieryreu Joabe riteònyre tiiboho wana raõbinanyrenykremy Israelita mahãdu sodadu awiawi-di riòryrenyre. ⁸ Amonita mahãdu rohonyrenyre Ta Habà ròtena ritòbòtòbònymy roire iwana sỹ ijõ mahãdu dirio Zoba mahãdu tasỹ Heobe ta Tobe ta Maakà my mahãdu iròtenareny iraymy rierenyre. ⁹ Joabe kiamy idi retehere iòludureny ikoki ribi tamyreny kedeakremy ijõ tasỹ iheworeny ribi tamyreny kedeakremy. Iòrarukita Israel sodadu mahãdu awiawi ritare sirio mahãdu utedeò. ¹⁰ Iuhe mahãdu tahe taseriòre Abisai dee ririre, tii riywiywinykremy amonita mahãdu wana wiutede rutamanyrenykremy. ¹¹ Tahe Joabe kiamy Abisai dee rarybere: —Ka sirio mahãdu waribi ròtamy idi betehekre wana, wawiòhedỹỹmy; kai sỹ tule, amonita mahãdu aribi ròtareri wana, tule awiòhedỹỹmy adee arakre. ¹² Bexiwodeburemy benykre! Rekexityhynymy rakaaõbinanyrenykre inysỹrenyki tule iny Deuxureny hãwa-ki. Tule Deuxu deewimy tuu rikiwyrenykre wedu nihikỹ wahe! ¹³ Tahe Joabe tasodadu mahãdu wana aõbinamy rekoarenyre, urile sirio mahãdu raòrunyrenyre ilaureny. ¹⁴ Amonita mahãdu tureny robire raòrunyrenyremy. Tulesỹ iwesele Abisai ribi raòrunyrenyre ixybyle tahãwa-ò rirònyrenyre. Tahe Joabe ixãwire amonita mahãdu dee aõbina ribi ixybyle Jerusalẽ-ò roosere. ¹⁵ Ka sirio mahãdu israelita mahãdu tureny rahaỹnanyremy iximyreny robirenyreu, ixybyle rexibutunyrenyre taawarureny wana butumy. ¹⁶ Iwedureny Hadadezer sirio iwitxira hãwaludu-ò rarariòwyre Eufrate bero bede-ki roimyhỹre mahãdu-ò. Tahe roirenyre ihyy Helã hãwã òhòkỹle ritehemynyre. Ikorenymy Sobake ramyhỹre, Hadadezer sodadu wedu. ¹⁷ Davi tuijyy rieryreu, israelita mahãdu awaru ributunyre, Jordaõ berokotxi riòhòrerenyre ta Helã bede-ò resemy roire. Taita sirio mahãdu Israelita mahãdu wiutede rexiywiywinymy rierenyre. Tahe aõbina ròrarunyre. ¹⁸ Tahe Israelita mahãdu sirio mahãdu riorudỹỹnyrenyre. Davi tasodadu mahãdu wana 600 mil-my sodadu sõe rahurenyre kahudi aõbinadu mahãdu tulesỹ quarenta awaru-di aõbinadu mahãdu rahurenyre sirio mahãdu ijoi. Jobake tule rirubunyrenyre, taòludureny sodadu mahãdu wedu, taõbinanaki-le rurure. ¹⁹ Ka ijõ wedu mahãdu Hadadezer riwedunyrenyre mahãdu israelita mahãdu iribireny ròtamy idi reteherenyreu, tamyreny rawooxire, tamyrenyle rexiwelorore irurureny-ò. Sirio mahãdu taiòraru-ki ilaureny ruberure iwiòhenadỹỹrenymy ixyby reakelau amonita mahãdu wahe.