¹ Wyra sohojidi wedu mahãdu rohonymyhỹre, wou bededỹỹnanamy, myrerimy ta Davi Joabe riteònyre, taijoireny tasodadureny ibutumy Israelita mahãdu raõbinanyrenyre taòludureny-ò. Iribireny ròtarenyre amonita mahãdu ribi tule Habà hãwã rikyrawonyrenyre. Iu bedeu Davi Jerusalẽki-le rarire. ² Tahe Davi rỹire, iyjamy rõrõriòrere rahudi, tahe rariamy ihỹmyhỹ heto webròdi. Iu tahe Davi hãwyy ruxerahakỹmy robire rõhõmy-ò. ³ Tahe inyõ tamy riteònyre mobo rare rierykremy tahe rieryrexe. Bate-Seba raremy, Eia riòre tulesỹ Uria hãwyy raremy, heteu mahãdu. ⁴ Tahe Davi aõtxile teòdu mahãduõ iòrysymy rakremy rarybere. Tahe didydenyde, Davi wana wityyò resere. Tatehe ribi Bate-Seba rexihutyhylemy tuu rutỹỹnyre? Rare taheto-ò. ⁵ Isỹtybymyta (robòtònyremy) dexieryde tahe tarybe Davi dee riwahinyre rierykremy ibededỹỹnana. ⁶ Iòrarukita Davi tarybe riwahinyre Joabe dee. —Uria ini biditeònykre, heteu mahãdu wahe, tii wana wide ararybekromy. Tahe Joabe irybemy reòbymy. ⁷ Ka Uria rehemynyreu, Davi tamy rỹỹraxire Joabe aõbo awilemy ratxirerimy taawaru mahãdu wana tule wou aõbo awilemy rohonyreri. ⁸ Irahudixe Uria dee rarybere: —Make aheto-ò bexielehynykre. Uria rohonyre, tule Davi aõnaõnaõ tamy riwahiny riwykremy taheto-ò. ⁹ Urile tahe Uria taheto-ò raõhyyre; taheto-ki rõrõke txiororemy, wedu heto ijõkile rõrõre wedu heto-di itxeredu ruraki-le. ¹⁰ Ka Davi tuijyy rieryreu Uria taheto-ò raõremy, tamy rỹỹraxire: —Irehemyhe aheto ribi bede teijeta tahe tooseteri. Aõherekibo tahe aheto-ò taõta? ¹¹ Kiamy Uria rirawyònyre: —Israel hãbu mahãdu ta Judamy mahãdu heka irehemy rỹireri tasỹ ribi, aõbinalemy kua rỹireri, tule arka taireny ratxireri. Wawedu Joabe tasodadu mahãdu wana kua bedetyatyalemy rahãwanyrenyreri. Timybo tahe jiarỹle waheto-ò arakre, ariroxikre ta aõmy ariõmy aratxirekre irahudi tasỹ wahãwyy wana aõbo rihike arõrõkre? Inatyhymyhe adee ararybekre butumy aõnaõna òbiti weribi-ò, tiu tuu ariwinykehi aõkõ iwese bededỹỹnana! ¹² Tahe Davi kiamy rarybere: —Kaki ixyby sohoji itxumy bede biekre. Biurasou ta arateònykre. Uria Jerusalẽ-ki ratximyhỹ ijõtxuu tulere taile ratximyhỹ. ¹³ Tahe Davi tamy rarariòwyre tii wana riroxikremy tahe aõmamy tamy mona riwahinyre ixinamy raòdewàrikre. Ihãreleta, Uria taheto-ò raõhyyre iru bedeu. Heto-di itxeredu ruraki-le rõrõre, taheto-ò rake txiò raremy, aõmysỹdỹỹdu bireki-le rõrõmy txuu idi deade. ¹⁴ Ijõ txuuxe, Davi tyyriti riwinyre Joabe dee ta Uria ole riwahinyre. ¹⁵ Kiamy Davi tyyriti riwinyre: Uria ikomahãdu kytxi birutàkre, tiweribibo aõnityhymy iòhãrureri weribi-ò. Irahudita iribi bexitabenykre ixinamy rurukremy. ¹⁶ Iòraruki tahe, hãwã rikyrawonymy roimyhỹ wana wana, Joabe iwedureny Uria-di rare iweribi iòludureny iòhãrumyhỹ weribi-ò. ¹⁷ Iòludureny mahãdu awaru tahãwareny ribi diòlònydenyde, raõbinanyrenyre Joabe ijoi mahãdu wana tahe Davi sodadu mahãdu-ò rururenyre. Uria tule rurure. ¹⁸ Tahe Joabe ijyy riwahinyre Davi dee aõbina bededỹỹnana timybo rohonyramy. ¹⁹ Kiamy tii rarybere ijyy wahidi rare dee: —Ka, irahudi ibutumy wedu-ko aõbina bededỹỹnanamy belyykre rahudi. ²⁰ Aõhewana reburekre ta kỹnyyraxikre adee. Aõherekibo tahe hãwã tyy òhòkỹle tetehemynyta aõbinamy? Tuu aõbo tabitenyõta biu ribi wyhy-di adireny kodohotirakremy rỹirerimy? ²¹ Abimeleke-txi aõbo õhõtireny reaõreri, Jerubesete riòre, rururetxi? Tebe hãwã bede-ki, tai hãwyyõ biu ribi mana-di rahunanymyhỹ tamy ihyy rirubunyre. Aõherekibo tahe ityyò tyhyhykỹle tetehemynytenyta? Kawesemy wedu rỹỹraxikre wana, kiamy birawyònykre: Uria, asodadu, tule rurura. ²² Tahe rybewahidi rare ta Davi-ko relyyre Joabe tuu ritohonyre mynamy. ²³ Rybewahidi nodu kiamy rarybere: —Waòludureny aõnityhyre waratyrereny ityhyreny ta wadeereny aõbinamy diòlònydenyde tahãwareny ribi. Tahe jiarỹboho tamy roirenyre iutedereny-ò isỹtyyreny òhòkỹle. ²⁴ Tahe biu ribi wadireny rohotiramyhỹ wyhy-di, tule asodadu mahãdu-õ ituerenyra. Uria asodadu rurura. ²⁵ Davi kiamy rarybere rybewahidi rare dee: —Joabe urile biteyrewedỹỹnyke uritere aõmy nohõtiyre kõkremy tamy marybekre, kiemy dori wou bededỹỹnana moõ rexieryõhyymyhỹre mobo rurukre. Kialemy tamy marybekre ixyby tarurumy aõbinamy reakremy, ihyy hãwã rahukremy. ²⁶ Bate-Seba tahãbu rubu rieryreu irahi robure. ²⁷ Taibru rahumy sỹtybymyta, Davi inyõ tamy riteònyre kididykremy tamy. Ihãwyymy irahudi rexirahorere tule tii wana rariòrenyre. Urile tahe wedu nihikỹ Davi-ki awimy rahaõhyyre ibina riwinyre òraruki.