¹ Wedu nihikỹ Deuxu teòdu Natã-my nidu riteònyre Davi dee rybemy. Natã rare ta tamy rarybere: —Iny inatxi hãbu roiremyhỹ hãwaõki: Ijõ heka ityhy rare, ijõ tasỹ iaõkõ rare. ² Ityhy heka ibroreni sõe rare tule ibudoeni sõe, ³ Iwanata iaõkõ sohojile rare ibudoeni idi ratximyhỹre. Idi sõemy ròrenymyhỹre, ihetoki-le raumynyre, iriòre boho kyki-le. (Tarsỹnalemy) riòrenyrerimy ihỹre, tabedeòdi-le rimonarerimy ihỹre, tule iwyòtyrekile rõrõmyhỹre. Budoeni heka iriòre wese rare tamy. ⁴ Kiaole kỹnyhe inyõ dehemynyde ityhy heto-ò. Kiata tabudoeni rubudỹỹ deralemy reare tarura ludu dòmy rirubunyke wahe; tahõrõõ rirubunyke txiò raremyta, iaõkõ budoeni kiekiele rirubunyre, tahe riheranyrexe taruraludu dòmy. ⁵ Iòrarukita Davi sõemy raburere hãbu bededỹỹnana òraruki kiamy rarybere: —Inatyhymyhe ararybekre wedu nihikỹ nidi Deuxu irumy nodu wahe, tibo hãbu tuu riwinyrahe urile rurukre! ⁶ Inaubiòwa bededỹỹnamyhe tii ròòwydỹỹkre ka ritara òwymy, ibina dorihe riwinyra! ⁷ Tai tahe Natã Davi dee kiamy rarybere: —Hãbu heka kaile atxiteri. Kiamy wedu nihikỹ, Israel mahãdu Deuxu rarybera: Jiarỹ heka Israel mahãdu wedumy aratare tule Sau ribi arahedỹỹnyre. ⁸ Adee wedu rewahinyre tule ihãwyyboho; Israel mahãdu wedumy (arasnyre) tule Juda mahãdu wedumy. Ka adee ibutekre wana, ixyby ijõ adee ariwahinykre. ⁹ Aõherekibo tahe wabededỹỹnana tetyhynykõta ibina kaa tewinyta? Uria kaa teburunyta, heteu mahãdu, wouki, amonita mahãdu tuu teteerydỹỹnyta tulesỹ ihãwyymy texihãwyydỹỹnyta! ¹⁰ Ihãremysỹxe, aõherekibo heka warybe tetyhynykõta Uria hãwyy iribi tedyta, iòrarukita ariòreriòreõ tiiemy rurumy rarekre. ¹¹ Ihãremy tasỹ ijõmo adee ararybekre inyõ asỹ mahãdu òle adee ibina riwinykre. Kai tuu bobikre ahãwyy mahãdu aribi aritakremy ta iwitxira hãbu dee ariwahinykre; tule tureny rahãwyynykre txulemy. ¹² Kai heka iwasimy òraruna tewinyta, ixisohojimy, ka jiarỹ tahe txulemy inyõ tuu riwinykre adee, Israel mahãdu ibutumy tuu robikremy. ¹³ Tahe Davi kiamy rarybere: —Jiarỹ òraruna ibina rewinyra Deuxu dee, wedu nihikỹ-ò. Natã kiamy rirawyònyre: —Wedu nihikỹ aòraru risuhòra; buruõkre. ¹⁴ Urile tahe, aõherekibo, tuu tewinyta, ibina wedu nihikỹ dee teteòsinyta, tai òrarukita uladu ariòre rurukre. ¹⁵ Tahe Natã rare tasỹ-ò. Davi riòre rurure Bate-Seba wana iriòre. Tahe wedu nihikỹ Davi riòre riwebinadu dỹỹnyre Uria hãwyy riwinyre. ¹⁶ Davi rexitòenyre Deuxu dee uladu reytekemy tule byre deralemy reamyhỹ. Tatỹhinawo-ò ralore ta su tyrele rexiludimy rureherehe ini nade. ¹⁷ Tahe iaõmysỹdỹỹdu mahãdu uritere idi rarutaamyhỹreny itamadỹỹmy, ta teralemy reamyhỹ tule tiiboho wana aõ (rirsỹke) ihoõre. ¹⁸ Debò-ò inatxitxu sỹtybymy, tahe uladu rurure, iaõmysỹdỹỹdu mahãdu tule Davi lau ruberumyhỹreny riteòarimy keleu. Kiamy raryberenyre: —Uladu irulemy roimyhỹ bedeu, Davi inyboho rirawyònyõhyymyhohyymyhỹ tamy inyboho rybemy rekoamyhỹrenyu. Timybo tahe tamy tuu rakaryberenykre? Txibo aõbo ibina kidiwinykele inihe iòhãrure! ¹⁹ Davi taõmysỹdỹỹdu mahãdumy robireu widee rarybewasimyhỹmy, rieryre uladu rururemy. Tahe rỹỹraxire. —Uladuwe rurura? —Rurura hawa! —Kawesemy rirawyònyrenyre. ²⁰ Tahe Davi rỹire suki roimyhỹ ribi, rõhõre, rexisihònyre tule tatyy riwiurònyre. Irahudita rare Deuxu heto-ò, wedu nihikỹ heto-ò, tahe riwodeysanyre. Ka taheto-ò doosedeu, rỹsỹnamy rexitòenyre tahe riroxire. ²¹ Tahe teòdu mahãdu kiamy raryberenyre: —Jiarỹboh he wiji araeryrenyõhyyreri aõhebo tatỹỹnyterimy. Ka uladu irulemy ihỹmyhỹu heka, irahi sõemy tahinymyhỹ tule biroxike aõkõ ibedeu; kaa, rururau tamaama, taita tule teraxita! ²² —Kohe! — Davi rirawyòyre. Uladu inimy ihỹmyhỹ wanawana, renarehere tule rahinyre wedu nihikỹ wadi raruxetòeke dohotamy tule rubu ribi rihedỹỹnykemy. ²³ Ka rurura rahudi tahe, aõmybo tahe arenarehekre? Dà ariixixanykre aõbo rikihe rubu ribi? Tiutxuõu tamy arake tai roireri-ò urile tahe tiu ixyby wadee iòkeseõna. Salomaõ (ijrana) ²⁴ Irahudixe Davi tahãwyy Bate-Seba riteysadỹỹnyre. Tii wana wityyò reserenyre, rariòrenyrenyre weryrymy, kiamy Davi rininire Salomaõ-my. Deuxu tuu rerinanyre. ²⁵ Ta teòdu Natã tamy riteònyre Jedidia-my rininikre kiemy dori wedu nihikỹ Deuxu tuu rerinanymyhỹre òraru-ki. Davi Habà hãwa-di rahỹỹnanyre. ²⁶ Iwanawanata, Joabe ire Habà mahãdu dee raõbinanymyhỹ, Amõ hãwa. Kaa hãwa-di rahỹỹnanykrey ratximyhỹ bedeu. ²⁷ Rybewahi dinodu riteònyre kiamy Davi dee rybe riwahinyre: —Habà mahãdu deehe raõbinanyra tule hãwã bero ludu-di rahỹỹnanykremy ratximyhỹ bedeu. ²⁸ Taita sodadu iuhe kiamy rỹireri mahãdu bibutunykre, ta ihãwareny-ò maõbinanykre, tule idi mahỹỹnanykre. Jiarỹ idi ixyby arahỹỹnanyke tahe ihoõre arexiwowydynykremy. ²⁹ Tahe Davi tasodadu mahãdu ributunyre, Habà òhòkỹle ritehemynyre, tahe raõbinanyre ihãwareny-ò tule ihãwareny-di rahỹỹnanyre. ³⁰ Mòlòki, amonita mahãdu deuxu tamy rexitòenymy myhỹrenyre, kia heka irataana aõhewana 34 bedeõmy rautxienymyhỹre. Irataana heka ouro rare, tule mana ruxerahakỹ ijõmy imahãdure, tiita Davi ritare ta taratiò rirutàre. Tule sõemy aõnaõna Habà ribi riwyre. ³¹ Davi ijõ hãwaribi didyde mahãdu riaõmysỹdỹỹnyrenyre xehadi, ta bruredi ta womadi tulesỹ txijolo riwinyrenyre. Iwesele tasỹ Amõ hãwã ludu mahãdu-ò riwinyre. Tahe Davi tasodadu mahãdu wana Jerusalẽ-ò ribuarerenyre. Amõ Tama wana.