¹ Ijõtxuu bedeusỹ, Davi filisteu mahãdu dee raõbinanyre, iribireny ròtare hãwã tyhyhykỹ rixãwidỹỹnyre. ² Moabita mahãdu ribisỹ tule ròtare. Suò ritidirenyre, tamyòta rerutidi riurihinanyrenyre tahe inatxi deòterehemy rahurenyre. Kawesemy moabita mahãdu Davi deòdumy rexirahòrerenyre tule tamy tahãwareny riòwynyre. ³ Zoba wedu òsỹ Davi raõbinanyre, Hadadeezer-ò, Heobe riòre-ò, suu ixyby riwyrenykremy roireru Eufrate bero bire ludu. ⁴ Mil 700 awaru dinodu mahãdu Davi idi rahỹỹnanyre Hadadezer ijoi mahãdu-di tulesỹ uritere mil sodadumy rimyre iny tỹmyra mahãdu lehekỹ: tulesỹ awaru mahãdu kahòxatxi-di rurudu mahãdu ritiorore ibutumy, 100 lemyta risiradỹỹnyre kahòxatxi-di rurudu-my. ⁵ Sirio Damasco mahãdu Hadadezer wiòhedỹỹmy rekoare, ta Davi 20 mil-mysỹ ijoireny rahure. ⁶ Aõwesele sodadu isurenymy riteòtenymy idi reare. Tureny Davi rahỹỹnanyre, tahãwareny tamy riòwynyre. Wedu nihikỹ Deuxu ritarasadỹỹnymyhỹre aõtxile tihãwa-ò ramyhỹre ròtahyymyhỹre. ⁷ Davi Hadadezer sodadu mahãdu debòna iribireny ibutumy riwyre ta idi rare Jerusalẽ hãwã bede-ò. ⁸ Tulesỹ sõemy bronze riwyre Beta hãwaribi ta Beròtxi ribi ijõ riwyre, tai Hadadezer rowedudỹỹmyhỹre ribi. ⁹ Wedu Toù-my nidu, Hamale hãwã ludu, Davi-my ijyy rieryre Hadadezer sodadu ribi ròtaremy. ¹⁰ Ta tariòre riteònyre Joraõ Davi rirybenykremy tule tuu rawowydykremy Hadadezer ribi ròtareki. Toù sõemy Hadadezer wana raõbinanymy raremyhỹ. Joraõ dee aõnaõnadi rare prata-di ije ta ouro-di ije tule bronze-di ije. ¹¹ Ta wedu Davi rihitxinyre wedu nihikỹ heto-ki riuhekremy, aõma wana ributunymy ijõ mahãdu ribi prata ta ouro-my diwyde wana. ¹² Kia mahãdu heka rare edonita mahãdu, moabita mahãdu, filisteu mahãdu ta amalekita mahãdumy. Iwese tyhyleta ijõ Hadadezer ribi diwyde rihitxinyre. ¹³ Davi ire rexinidehenyre edonita mahãdu rahureu 18 mil-my rihure bedeu Sal bede-ki. ¹⁴ Tule tii hãwã hãwa-my butumy tasodadu rihãwadỹỹnyre Edõ bede-ki, tule tai hãwadu mahãdumy rahãynanyre. Wedu nihikỹ Deuxu heka tuu Davi-di ramyhỹre bede bedemy ritarasadỹỹnymy aõtxi tiò ramyhỹre ròtahyymyhỹre. ¹⁵ Davi ibutumy Israel mahãdu hãwã riwedunyre tule wiwesehyyle idireny raõmysỹdỹỹnymy raremyhỹ tule ibededỹỹnanareny wiwesehyylere. ¹⁶ Joabe, Zenia isere, isodadu riwedunymyhỹre. Josafà tasỹ Ailude riòre rare, wedu dohodỹỹdumy ratximyhỹre. ¹⁷ Zadoke tasỹ, Aitube riòre rare, ka Aimeleke tasỹ, Abiata riòre rare, Deuxu bededỹỹnana-di aõmysỹdỹdu heka juhuu roire. Zeraia tasỹ weduõ rare. ¹⁸ Benaia tasỹ, Joiada riòre rare, keretxita mahãdu wedu tulesỹ peletxita mahãdu wedu. Ka Davi riòreboho tahe Deuxu-ò aõmysỹdỹỹdu roire. Davi Mefibosete wana.