¹ Davi ixyby Israel sodadu mahãdu awiawi ributunyrenyre, 30 mil-my hãbu sõemy. ² Baala hãwa-ò idireny rare, Juda bede-ò, arka òrysymy, tai wedu tuhyhykỹni roimyhỹre, tarynaki runymyhỹre, ỹju mahãdu wana. ³ Tahe arka ritidirenyre kahu broreni idi retyymyhỹre roò, itỹmyra, tahe ritarenyre Abinadabe heto ribi, hãwalò-ki rỹimyhỹre wahe. Uza ta Aio, Abinadabe riòreboho, heka kahu-di roirenyre. ⁴ Arka-di retyymy. Aio ikomy rariamy ramyhỹre. ⁵ Davi israelita mahãdu wana resemyhỹreny tule rawiunymyhỹreny tarurumy Deuxu wodeysadỹỹmy, wedu nihikỹ wahe. Sõemy tiiboho ròtòkamyhỹreny, aõtxile aõ, tỹbu, bratu dori sõemy aõnaõna. ⁶ Ka aõma-ò ritehemynyreu tai òmyta aõtxile alòbròna tai rityynymyhỹre Nakõ bede-ki, tai broreniboho rariòwyrenyre. Iu Uza tebò riterenyre ta arka rimyre. ⁷ Wedu nihikỹ Deuxu Uza-ki ibinamy rahare, rityhynyõre-ki, ihyy rirubunyre. Taityhyle Uza rurure, arka birekile. ⁸ Davi sõemy reburere wedu nihikỹ aõmareki, teburedi, Uza aõhõkỹ tyhymy (risnyreki); wiji (yrbu) ini Perez-Uzamy naninimyhỹde. ⁹ Tahe Davi Deuxu lau ruberure, wedu nihikỹ lau, kiamy rarybere: —Timybohe tahe arka ixihemy ariwykre? ¹⁰ Kawesemy he Davi rexiixãwinyre arka tahãwa-ò riwykremy ratximyhỹ ribi Jerusalẽ bede-ò; ihãremy tasỹ, tawo rirahorere ta riwyre Obede-Edõ-ò, Gate hãwã heka rare. ¹¹ Inataõ ahãdumy arka tai bede riere, wedu nihikỹ Obede-Edõ riwiòhenanyre isỹre wana. ¹² Davi wedu kiamy rieryre, wedu nihikỹ Obede-Edõ isỹreny wana riwiòhenanyre arka òraruki ibutumy iaõnaõna ijõdire tahe Obede-Edõ heto ribi arka riwyre, sõemy teysamy, Davi hãwa-ò idi roirenyre. ¹³ Ka hãbu mahãdu arka-di retyymyhỹ rahudi debo-ò sohoji reuromy tatireny riwyrenyre. Davi Deuxu dee xiwe riwahinyre broreni ta iriòre wijiumuyhỹkỹmy rirubunyre. ¹⁴ Tahe Davi, tyywihikỹdi rexityynyre wedu dee aõmysỹdỹỹdu tyydi, resemyhỹ Davi Deuxu riwowydỹỹnymyhỹ, wedu nihikỹ. ¹⁵ Kawesemy tii ta israelitamy mahãdu wana arka-di riwymy roirenyre Jerusalẽ bede-ò, sõemy teysamy idi roire bedewodỹỹ sõemy. ¹⁶ Kaa arka hãwa-ò ralomy rareu, Sau riòre, Mikalmy nidu, hetowo ribi retehere, Davimy robire rawaytòmyhỹ-ò, resemyhỹ wedu nihikỹ riwowydynymyhỹ. Tahe tii sõemy ixidi rõhõtinyre moõ iweribi ratxiõrerimy ixisohojimy nodumy. ¹⁷ Arka dixe roirenyre tena-ò, Davi tenamy riwinyre-ò. Tahe xiwe tamy riwahinyre Deuxu dee, wedu nihikỹ-ò, xiwe uriaõkõ riwòsiwòsinyre bedeywidỹỹnamy. ¹⁸ Ka xiwe riwahinymy rahudi bedeywidỹỹna wana, Davi ixỹ (ribensoanyre) wedu nihikỹ ruruterehekỹ nidi. ¹⁹ Irahudita paõ hãbu mahãdu-ò hãwyy mahãdu-ò riwahinyre, ta broreni-ò biu (deyxe) ta uva werubu ijõre. Irahudi tahe tasỹ-ò rearearenyre. ²⁰ Davi roosere tasỹ tahãwyy wana ele tiimy ratxikedi hikỹle ixidee ririmyhỹ òraru-ki, ka Mikal, Sau riòre, rare iwiutàdedỹỹmy. Kiamy rarybere: —Awiikuhe Israel wedu riwinyra! Ixỹrutere mahãdu tahe rare, tekòdu mahãdu dekòdukò takumy ritekòsinyra! ²¹ Kiamy Da vi rirawyònyre: —Wedu nihikỹ rewoeydynymy resemy watxireri, tii riwatare buu ritakewihikỹle wahe iriòreriòre mahãdu wana Israel mahãdu wedumy, asỹreny mahãdu wahe. Tiiemy wedu nihikỹ ariteysanymy arawiunymy ararekre. ²² Tamy ire arexilàhà làhànymy ixidi arakre. Wadi ixinamy mohõtinykre jiarỹ aõ aõkõ raremy, ka ijadoma mahãdumy tarybeta ta sõemy riwawiòhenanyke! ²³ Tahe Mikal, Sau riòre tiu rariòrenyõhyyre.