¹ Tahe ibutumy Israel mahãdu rirahure Davi wana witxi rekoakremy Hebrõ hãwã bede-ò ta kiamy raryberenyre: —Jiarỹboho heka asỹrenyle watxirenyreri, wedu. ² Juhu bedeu, Sau wawedurenymy raremyhỹ bedeu, kai Israel mahãdu wou bededỹỹnana-ki tewedunymy tatemyhỹ. Deuxu wedu nihikỹ kiamy rarybere kai wou bededỹỹnana-di atxikremy tule ibutumy ixỹ biwedunykremy. ³ Kawesemy Israel mahãdu Davi wana witxi rekoarenyre Hebrõ hãwa-ki. Davi xe reòbyre tamyreny, tahe riratyysebenyrenyre Israel mahãdu wedumy. ⁴ Trintamy iu iwyra ratximyhỹ iu wedumy runyre ta quarenta wyramy bede riere wedumy. ⁵ Juda riwedunyre Hebrõ-ki, debo-ò inatxi reuro ribi iweeremy, tulesỹ Israel ta Judamy riwedunyre Jerusalẽ trinta wyramy. ⁶ Davi tasodadu mahãdu wana Jerusalẽ aõbinamy roirenyre. Jebuseu mahãdu, tai sỹdu mahãdu, kiamy rõhõtinyrenyre tiu irutaõmy raloke ihoõmy iòraru-ki kiamy raryberenyre: —Tiu ka-ò malokeho aõkõ. Mobo araijekre aròtedỹỹ-ò, irueta mahãdu ta itibina mahãdumyle aitxesedukre. ⁷ Ihãrele Davi iribireny idi rahãỹnanyre ihãwareny-di, ihyy Davi hãwamy raninire. Kawesemyhe rutỹỹnyre. ⁸ Iu bedeu kiamy Davi rarybere tasodadu mahãdu dee: —Inyõ Jebuseu mahãduõ rirubunykeki, kua irueta mahãdu ta itibina mahãdu, my mahãdu heka sõemy riwakyaranymyhỹrenyre, (beijrana) hõrõdita maòwònybenyke ta tamyreny maõbinanybenykre. Iòraru-ki myỹ rybe roimyhỹre: Irueta mahãdu ta itibina mahãdu my heka tiu Deuxu heto-ò ralòõtyhy. ⁹ Davi xe tai rasỹnymy raremyhỹ ta Davi hãwamy raninire. Iwerura riywinyre taitxesedumy ihyy wedu heto òhòkỹle rehemynyre. ¹⁰ Davi xe ihyy raruruteremy rare kiemy dori wedu nihikỹ, Deuxu tuhyhykỹ, kia wana raremyhỹ. ¹¹ Wedu Hiraõ, Txiro hãwaludu, teòdu mahãdu riteònyre Davi dee. Tii òwòru-ò tamy riwyre ta òwòru-di aõmysỹdỹỹdu ijõre tule heto widỹỹdu ijõmy ralere, tahe heto Davi dee riwinyrenyre. ¹² Kawesemyxe Davi rieryre wedu nihikỹ tuu ritaramy Israel mahãdu wedumy, taijoi mahãdumy rerinanymyhỹre òraru-ki, tule wedu aõmysỹdỹỹna tako-ò rakremy. ¹³ Ka Davi Hebrõ hãwã ribi rohonyre rahudi tasỹ, ixyby hãwyyõ tabiraludumy rimyre ta tahãwyy tyhymy ijõ rimyre Jerusalẽ bede-ki tiiboho wanata ixyby rariòrenyrenyre weryry ta hirarimy. ¹⁴ Ka Davi riòreboho Jerusalẽ-ki juradu mahãdu nire: Samue, Sobabe, Natã, Salomaõ.. ¹⁵ Ibar, Elisua, Nefegue, Jafia. ¹⁶ Elisama, Eliada ta Elifete. Davi filisteu mahãdu ribi rotare. ¹⁷ Ka filisteu mahãdu Davimy ijyy rieryrenyreu Israel mahãdu wedumy runyremy, tasodadu mahãdu riteònyrenyre rimykremy. Ka rieryreu ibededỹỹnana, Davi rare tai tikibo riraòrenykre-ò. ¹⁸ Tahe filisteu mahãdu tamy ditehemynyde bedebese wihikỹ-ò rexibutunymy roire. ¹⁹ Tai tahe Davi Deuxu-ò rỹỹraxire, wedu nihikỹ-ò: —Ixinamy aõbo aõbinanykre filisteu mahãdu wana? Biwatarasa dỹỹnykre aõbo? —Make! Wedu nihikỹ rarybere:—Aratarasadỹỹnykre. ²⁰ Tai tahe Davi rare Bali (Baal)-Perazi òhòkỹle rehemynyre tai tahe filisteu mahãdu ribi rotare. Kia tii rarybere: —Iwesebre bee rariawana ibutumy aõnaõna ritxiwimyhỹre, iwese tahe wedu nihikỹ waòludu mahãdu aõwesele ritxiwirenyra. Iòraru-ki tahe hãwã kiamy raninire Bali-Perazimy. ²¹ Taile filisteu mahãdu tadeuxureny ririrenyre, Davi tasodadureny wana riwyrenyre idi roirenyre. ²² Tahe filisteu mahãdu ixybyle bedebese wihikỹ-ò rexibutunyrenyre. ²³ Ixybylesỹ Davi wedu nihikỹ-ò rỹỹraxire, ta kiamy dirawyònyde. —Karibi tamyreny aõbinaõmykre. Kuadita bodowerykre, ihyy bederaty hoòhòkỹle behemynykre ta iheworibi tamy maõbinanykre. ²⁴ Ka bedewodỹỹ-ò boholakre wana bederaty ratyatxi, iuhe bexiywiywinymy atxikre aõbina-ò kiemy dori kiamy bierykre jiarỹ akoki watxierimy filisteu mahãdu ijoi arahukremy. ²⁵ Ibutumy Davi wedu nihikỹ rybe manymynamy riwinyre ta filisteu mahãdu roirenyre ribuarerenyre Geba ribi ihyy Gezer òhòkỹle ritehemynyre. Arka Jerusalẽ-ò riwyrenyre.