1 Isbosete, Sau riòre, Abner rururemy rieryreu Hebrõ hãwaki, tebure ixãwire, tule ibutumy Israel mahãdu sõemy ruberurenyre. 2 Isbosete sodadu wedu iny inatxire tii riwedunymyhỹre aõbina rohonykre bedeu taòludu mahãdu wana. Inireny heka Baana ta Hekabe my inirenyre Himo riòre heka roire, Beeròtxi hãwaludu, Benjami mahãdu heka roire. (Beeròtxi hãwã heka Benjami sumy turybe rỹimyhỹre. 3 Beeròtxi-ki juhuu hãwadu mahãdu heka Gitãi hãwa-ò rihenyrenyre ta tai hãwã witxira mahãdu wesemy tai ratximyhỹrenyre wiji (yrbu) tuu ratximyhỹrenyre). 4 Ka Sau taJonata my boho ituerenyreu Jezreel-ki, Mefibosete, Jonata riòre, iu iuyremyre iwyra. Sau taJonata my boho rubunina rehemynyreu, hãwyy Mefibosete-di huruhurumy iòraru-ki uladu relere. 5 Hekabe ta Baana Isbosete heto-ò roirenyre ta tatyy ritareri-ò tamy ritehemynyre byrena sỹtybyu. 6 Hãwyy trigo riuatymyhỹre tỹhi risamyhỹ tahe rõrõre. Iurenana tahe Baana ta Hekabe tahe itỹhiole rirubunyrenyre. Tahe irati riòròrenyre tule ixihemy riwyrenyre. Rumy rariamy roire Jordaõ bede-di. 8 Hebrõ-ò ritehemyny bedeu, Davi dee Isbosete rati riteòsinyrenyre kiamy tamy raryberenyre: —Kaa roire Isbosete rati, aòludu Sau riòre, arubudỹỹmy adi raremyhỹ. Wijihe Deuxu wedu nihikỹ tai rexixara, wawedu, Sau-ki tule iriòreriòre mahãdu wana. 9-11 —Jiarỹ heka rybewahidi wadee rare remyre tule irubudỹỹmy inyõ reteranyre Ziklague hãwa-ki, aõmamyhe ixidi, rõhõtinymyhỹ rybewahidi awimy wadee rarerimy, Sau rururemyhe wako relyymyhỹ. Wedunihikỹ, Deuxu inimy noduni ariuhekre, sõemy riwahedỹỹnyre aõnaõna iòhãru ribi, kiaremy heka hãbu bòdỹỹdu mahãdu aõhõkỹmy (arisnykre) kiemy dori hãbuõ aõ iòkõlemy rirubunyrenyra taheto-ki rõrõmy roireriòle! Tahe adeereny araõbinanykre Isbosete terubunytenyta òraru-ki iwesetyhyle kaiboho wijityhyle su ribi aõbenykre. 12 Tahe Davi tasodadu mahãduõ tamyreny riteranyre rirubunyrenykremy tahe rirubunyrenyre Hekabe ta Baana ituerenyre. Irahudita tebòreny ta iwarenymy riòròrenyre ta Hebrõ syraro bira-ò riònyrenyre. Irahudita Isbosete rati rituunyrenyre Abner wabede roò Hebrõ bede-ki. Davi Israel wedumy ta Juda mahãdu wedumy runyre.