¹ Irehemy raõbinanymy roiremyhỹ Sau sỹ mahãdu Davi ijoi mahãdu wana. Davi ijoi mahãdu ire ratyhymy roire, ka Sau ijoi mahãdu tasỹ ire raõkõmy roire. Davi riòre boho. ² Davi riòre boho Hebrõ-ki juradu mahãdu kaa tiirenyre: Kotyhymy (ijra) moma inire Amnõ, Ainoa riòire, Jezreel hãwã ludu. ³ Ihewomy tasỹ Kileabe ruare, Abigail riòre, Nabal wytese, Karmelo hãwã ludu. Inataõna tahe Absalaõ duade iheworenymy, Maaka riòre, Taomai riòre, Gesur hãwã wedu. ⁴ Inaubiowa tasỹ Adonia duade, Hagite riòre. Iiruyrena tasỹ Sefatia duade, Abital riòre. ⁵ Idebòò sohoji deuròsòna tasỹ Itreaõ duade, Egla riòre, Davi hãwyy tyhy wahe. Ka Davi riòre mahãdu heka Hebrõ kilehekỹ ruarenyre. ⁶ Ka aõbina rohonymy raremyhỹ wanawana Sau sỹ mahãdu Davi ijoi mahãdu wana, Abner ire ratyhymy rare Sau sỹ mahãdu kyki. ⁷ Tiutxumybota Isbosete, Sau riòre, Abner my rarybere Sau weleu biraludu wana wityyò reseremy Rispamy nidu wana, Aia riòre. ⁸ Abner iòraruki reburere ta kiamy rarybere: —Aõmywe wadi tahõtinyteri itxỹitxỹtemy nodumy? Da Juda mahãdu weribi aõbo rahoreramy wadi tahõtinyteri? Ixybysỹ rarybere: —Juhu bedeuhukỹle Sau dee òbitimy raremyhỹ, buu wahe, aseriòre mahãdu tule abiòwa mahãdu-ò tasỹ Davi ribi tule arahedỹỹnyre aribi rotakeribi. Wiji tahe kai awimy tarybeteri hãwyy wana wide raòtaòtaramy! ¹¹ Isbosete Abner lau ruberure; iòrarukita aõmy rarybeõhyyre. ^9-10 Deuxu wedu nihikỹ kiamy rarybere Davi-ò wedu Sau ribi ritakremy tule iriòreriòre mahãdu ribi Davi ta wedumy runykre ibutu hãwã hãwã wedumy Israel ta Judamy, ibutu wedumy runykremy. Deuxu he ixinamy riwarubunykre tuu ariwinyõkre wana tuu rutỹỹnykre! ¹² Iu bedeu Davi Hebrõ hãwa-ki ihỹmyhỹ, Abner teòdu iu riteònyre rybewahidi myỹ idi rare rybedi: —Mowexe kaa suu riwedunykre? Wideeini bede rikiywinyke, arawiòhenanykre ibutumy Israel mahãdu adee aridykre. ¹³ Kiamy Davi rirawyònyre: —Awire. Jiarỹ sỹ myỹ adee ararybekre, ywimy: wadee rybemy manakre-u, Mikal wadee bididykre Sau riòre. ¹⁴ Tahe Davi teòdu mahãduõ riteònyre Isbosete dee rarybekremy: —Wahãwyy Miakl he wadee bidiwahinykre. Reòwynyre dori filisteu mahãdu-di taita tiukõnamy tii wana aroikre. ¹⁵ Taita Isbosete ihãbu ribi riatykremy tuu rarybere Paltiel ribi, Lais riòre. ¹⁶ Iòraru-ki Paltiel rahinymy ihemy rydi rare, ihyy Bauri hãwa-ò rirònyre. Tahe Abner tamy rarybere: —Bòòsesekehewa asỹ-ò. Tiixe roosere. ¹⁷ Tahe Abner Israel mahãdu dee rybemy rare. Kiamy tii rarybere: —Aõ òhòkõmy Davi di toitemyhỹ Israel mahãdu wedumy runykemy. ¹⁸ Katahe itxuòhe rehemynyra. Wedu nihikỹ rybetxi ini õhõtireny reake: Wadeòdu Davi ariuhekre Israel mahãdu hedỹỹdumy, filisteu mahãdu-ribi tule ijõ iòludu mahãdu ribi. ¹⁹ Tule sỹ Abner Benjami mahãdu-ò rarybere irahudi tasỹ Hebrõ-ò rare Davi-ko ijyymy timybo Benjami mahãdu Israel mahãdu wana bede riywinyrenyramy. ²⁰ Abner rare, hãbu mahãduõ wanarare, Hebrõ hãwa-ò Davi wana witxi reakremy, worana bedehesi riwinyrenykremy. ²¹ Kiamy Abner Davi dee rarybere: —Ka wiji arakre ibutumy Israel mahãdu-ò ararybekre adee reòbyrenykremy. Tahe tawedurenymy adee reòbyrenykre. Iu tahe ibutumy ihãwareny biwedunykre. Tahe Davi Abner ywilemy riteònyre. Abner rurure bededỹỹnana. ²² Iroorehetyhymy aõkõta, Joabe ijõ mahãdu wana ditehemynydenyde Davi ijoi mahãdu aõbina eleele ribi, sõemy aõnaõna diwydenyde taòludu mahãdu ribi. Abner xe iu Hebrõ-ki ratxiõmyhỹ Davi ruraki ywilemy ixiribi riteònyre. ²³ Joabe tasodadu mahãdu wana ritehemynyreu tahe, iko relyyrenyre Abner Davi-ò rybey rarerimy ta ywilemy riteònyra. ²⁴ Taita Joabe Davi-ò rybemy rare. Kiamy rarybere: —Aõhewexe tatỹỹnyta? Abner ka-ò rareri, aõherekibo kua teteònyta aõhe tamy tatỹỹnykõlemy? ²⁵ Bòdỹỹmy heka kia rareri, aõmamyhỹka kia rare timybo aõnaõna ibutumy rỹireri rierykremy tiubo tamyhỹte aõbo tewinymyhỹte erysymy. Kai heka teeryteri ibededỹỹnana! ²⁶ Davi ribi rohonyre rahudi, Joabe teòdu riteònyre iheworibi Abner hewomy. Sira hãluubeò ta tamy ritehemynyre ta ixybyle diòkesedỹỹnydenyde. Urile tahe Davi rieryõhyyre. ²⁷ Ka Abner rehemynyreu Hebrõ-ò, Joabe idi rare ijòtòbona weribi-ò, tamy aõmy rarybekre wesemy, tahe maydeedi tai rojyre iweki. Kawesemyhe Abner, Ner riòre, rurure Asael rirubunyre òraru-ki, Joabe seriòre. ²⁸ Ka raeryreu, kiamy Davi rarybere: —Wedunihikỹ Deuxu he rieryreri jiarỹ waijoi mahãdu wana Abner rubu watyrereny rautxienyke ihoõre. ²⁹ Abner tyrexe rautxienykre teery rubu isỹreny mahãdu wana ibutumy! Binana asỹreny-ki tule ahãbureny-ki rasiranyke ihoõre dà banana aõbo adetyyreny-ò reurokre, dà kõmy aõbo hãwyy aõmysỹdỹỹnale biwinymy boibekre, dà kõmy aõbo wouki burubenykre, dà kõmy aõma ràma adeereny reakre! ³⁰ Kawesemy Joabe taseriòre Abisai wana Abner rirubunyrenyre Asael, iseriòrereny rirubunyre òraru-ki, Gibeaõ-ki wou rohonyre bedeu. ³¹ Tahe Davi Joabe dee rarybere tasodadu mahãdu wana rahinyrenykremy Abner dee, bederyry bededỹỹnanamy, atyyreny biykakeki ijõmy awire, tule iny (hibdỹỹnana) tyy riuhemyhỹre-di bexityynybenykeki ijõmy awire. Ka ituudỹỹ bedeu iwedureny katxiterehekỹmy rahinymyhỹ iwabede raki. Imahãdureny iweselehekỹ riwinyrenyre. ³³ Kiamy Davi Abner dee wiu riwinyre: Aõherekiwe Abner rurura iny itxỹte mahãdu rubulemy? ³⁴ Ebò itaake aõkõ, awake tule itaake; iwese aleerydu inymy reerynymyhỹre wese tii rurura! Ixybysỹ ixỹ mahãdu Abner rahi rasỹbinarenyre. ³⁵ Ixỹ mahãdu Davi-di ratutaamyhỹreny aõ (rirsỹkemy) txuu ralokre koki, ta tii kiamy rarybere: —Deuxu ixinamy riwarubunykre aõ (arirsỹkre) wana txuròtena koki! ³⁶ Ibutumy ixỹ roholare irybe-ò tule awimy tai raharenyre. Òbitityhyta, ixỹ ibutumy tai awimy rahamyhỹre wedu aõ riwinymyhỹreki. ³⁷ Tai òraru-ki xe ibutumy Davi ijoi mahãdu tule Israel mahãdu rierynyrenyre Abner rubudỹỹ tamy roroke. ³⁸ Kiamy tii rarybere taijoi mahãdu-ò: —Wijihe ibutumy bierymy atxibenybekre Israel mahãdu wedu rururamy. ³⁹ Jiarỹhe Deuxu wedumy riwatare, wiji heka warurukõmy ixidi rahõtinyreri. Zeruia riòreboho heka iehehetyhyrenyre wadee! Wedu nihikỹxe aõhõkỹmy risinyrenykre tii ixidi tuu rierenyra wenana!