¹ Imyrahudita Davi Deuxu dee rỹỹraxire, wedu nihikỹ-ò: —Aõaxina aõbo arakre Juda bede-ò aõtxi hãwaõ ariwedunykremy? —Kohe! — wedu nihikỹ rirawyònyre. —Tibo tahe tiikre? — tii rỹỹraxire. —Hebrõ hãwa! — kamyhe rirawyònyre. ² Tahe Davi Hebrõ hãwaõ rare, tahãwyy tabiraludu wana ixihemy ridyre. Ijõ heka Ainoã inire, Jezreel hãwã ludu, ijõ tahe Abigail rare, Nabal wytese, Karmelo hãwã ludu. ^3-4 Davi tule tasodadu mahãdu ixihemy ridyrenyre ihãwyyreny wana butumy, hãwaõ Hebrõ bireki roimyhỹreki rahãwanymy roiremyhỹ. Tahe Juda mahãdu roirenyre Hebrõ hãwa-ò tahe Davi wedumy (riratyysbenyrenyre) Juda hãwã butumy riwedunykremy. Ka Davi rieryreu Jabe hãwaludu mahãdumy ijyy, Gileade bedeludu mahãdu, Sau rituunyrenyremy. ⁵ Hãbu mahãduõ riteònykremy tamyreny myỹ rarybekremy: —Wedu nihikỹ 1 wawedureny teywiywinymy tetuunytenyta òraruki! ⁶ Wedu nihikỹ awimy adireny ratxikre òbitimy! Awi tewinytenyta òraruki, jiarỹ tule awimy adireny ararekre. ⁷ Atyhymy boibekre tule awodeburemy! Sau heka awedureny rare, rururexe, tahe Juda mahãdu heka tawedurenymy (riwaratyysbenyrenyra). ⁸ Sau sodadu dinodu, Abner my nidu, Ner riòre, kia heka Isbosete rahenyra, Sau riòre-di, Maanai bede-ò, Jordaõ bero kanaweribi-ò. ⁹ Taita, Abner Isbosete wedumy (risnyra) Gileade bede-ki, Asser hãwã Jezreel hãwa, Efrai hãwã tule Benjami hãwa; òbitityhy tahe ibutumy Israel hãwã hãwã wedumy runyra. ¹⁰ Iu Isbosete quarenta wyradile Israel wedumy runyre ta inatxi wyramy bede riere wedumy. Ka Juda mahãdu tahe òbitimy roiremyhỹ Davi dee. ¹¹ Sete wyra weeremy bede riere wedu-ki. Israel mahãdu Juda mahãdu wana widee rawounyrenyre. ¹² Abner Isbosete ijoi mahãdu wana Maanai hãwã ribi roirenyre Gibeõ hãwã-ò. ¹³ Joabe-se, heka Zeruia rare, tahe Davi ijoi mahãdu roirenyre Gibeõ syrawo beroijà-ki witxi rekoakremy. Tai tahe ibutumy rexibutunyrenyre, ijõ mahãdu ijõ weribiò rexibutunyre ijõ mahãdu tasỹ ijõ wyònare. ¹⁴ Tahe Abner Joabe dee rarybere: —Txioini wajyre mahãduõ ajyre mahãdu wana resurenyke, debonadi kỹnyhỹ. —Awire! — Joabe rirawyònyre. ¹⁵ Kaa doze sodadu, heka Isbosete weribireri Bẽjami mahãdu tulesỹ Davi sodadu dozemyre tiiboho wana resurenyre. ¹⁶ Iny sohoji sohoji taòludu iratiribile rimymy tai rojyrenyre. Kawesemy ibutumy tarubulemyy rariòwyrenyre. Iòraruki Gibeõ hãwã bedeki kiamy rininirenyre mayrehe bederomy. ¹⁷ Iubedeu ixyixybyle wou rohonyre, iu Abner ta Israelita mahãdumy boho sõemy ituerenyre Davi sodadu mahãdu tureny rarubudỹỹnanyrenyre. ¹⁸ Joabe, Abisai ta Asaelmy boho, ibutumy tai ratximyhỹreny Zeruia riòreboho, ibedeki. Asael heka, (iijratere) rare iròdu (ijratere) wese heka reamyhỹre. ¹⁹ Abner-di tarukire, ihewomy reamy rare. ²⁰ Ta Abner ixihewo-ò retehere ta rỹỹraxire: —Asael, kaiwe atxiteri? —Kohe, jiarỹ! — Kawesemy rirawyònyre: ²¹ Wahemy (ijraribi) ixãwike! Kawesemy Abner rarybere: —Sodadu mahãdu heõmyta beake iaõnaõna ixidee bimykre. Asael ihãrele ihemy reamy rare. ²² Ixybysỹ Abner tamy rarybere: — Ixãwikehewa wahemy (ijraribi) ! Ixirubudỹỹmy heka wadi atxiteri! Timybo heka iu anatxikre, irahudi, aseriòre wana widi aretehemy? ²³ Ihãrele ihemy Asael reamy rare rexitxuhunykõlemy. Tahe Abner tatõnori-di ixihewo-ò myỹ idi deade. Tahe Asael weki rojyre iweribi ibròsirurehekỹle rohonyre. Tarubulemy rariòwyre sutxi, aõtxile iny tamy rehemynymyhỹ tamy rexitxuhumyhỹ tai resemy roimyhỹ-ò. ²⁴ Joabe Abisai wana ihewomy raòrarunymy roire Abner hemy, txuròte iòhòmy, Ama hãwalò-ò ritehemynyre, Gia hãwa-o, Gibeõ bedetyahakỹ-ò ryy ramyhỹredi. ²⁵ Benjami mahãdu sodadu ixybyle rexibutunyrenyre Abner werura-di hãwalòò ta rexitxuhunyrenyre. ²⁶ Tahe Abner Joabe dee ryryre: Tiiemy wexe wiwana rakaaõbinanymy rokoikre? Tiuhe ixyby tuu (obxikõna), ionanau, aõ rauhenyke ihoõre, aõhebo tahe bederyry? Jiarỹboho heka aseriòre roire! Tiubo heka asodadu-ò marybekre waherenymy (ijra) ijãwikremy? ²⁷ Kiamy Joabe rirawyònyre: Deuxuni adee reuhera ka, marybeõma wana inihe, waijoireny txuu idireny ini reareri aherenymy (ijradi). ²⁸ Tahe Joabe corneta ritokanyre. Tahe ibutumy sodadu mahãdu rexitxunyrenyre israelita mahãdu hemy (ijraribi), aõbinaxe ixãwire. ²⁹ Irumyleta, Abner tasodadu mahãdu wana ramaxanyrenymy ruu idireny nade Jordaõ bedeki. Ihyy riòhòrerenyre Jordaõ berokotxi, txumy ramaxanyreny rahudi, Maanai hãwa-ò rironyrenyre. ³⁰ Ka Joabe ixãwireu iherenymy (ijra), ibutumy tasodadureny ributunyre ta iijõrenyõ rasiranymyhỹ dezenovemy sõereny ihãremysỹ Asael ijõmy iõmyhỹ. ³¹ Urile tahe Davi sodadu mahãdu trezento e sessentamy Abner sodadu rirubunyrenyre, Beami mahãdu lehekỹ ituerenyre. ³² Tahe Joabe tasodadu mahãdu wana Asael rubu riwyrenyre ta rituunyrenyre tasỹreny mahãdu wabedewo-ò, Belẽ bede-ki. Tahe ramaxanyrenymy ruu idireny nade, (txuijramyta), Hebrõ-ò ritehemynyre.