¹ Sau rubu sỹtybymy, Davi aõmaribi nade amalekita mahãdu-ò aõbina ribi ta inatxitxumy Ziklague hãwa-ki bede riere. ² Ijõtxuu ta weryryboõ dehemynyde Sau tai ratximyhỹ bederibi. Tabederyry deòsidỹỹmy, tatyy riykare tule tarati-ò suu riòdònyre. Ta weryrybo rare tai Davi ratximyhỹ òhòkỹle, ta tatiowomy resere tule taòmy su-ò resere tyhydỹỹ bededỹỹnana heka rare. ³ Tahe Davi tamy rỹỹraxire: —Tiribibo heka tateri? —Israelita mahãdu tai rỹireri ribi rahenyreri! —Kawesemy rirawyònyre. ⁴ Tuuini bedelyyke timybo wou rohonyramy! Davi tamy rarybere: —Waijoireny raòrunyrenyra aõbiribi, tule sõemy waijoireny ituerenyra! Weryrybo rirawyònyre: —Sau tariòre Jonata wana rururenyra. ⁵ Timykibo heka Sau Jonata wana rururamy teeryta? Davi rỹỹraxire. ⁶ Tahe weryrybo kiamy rirawyònyre: —Tamykie rehemynyre, jiarỹ, Gilboa hãwalò-ò ta Saumy rabire tõnori-di ixiki roimyhỹ-ò. Iòludu mahãdu kahu ta iawarureny iòhòlemy tamy nariamy dirahude. ⁷ Tii rexirahorere, ta wamy robireu wadee ryryre. Ta rerawyònyre: Kakile watxireri, wawedu! ⁸ Ta Sau rỹỹraxire mobo watxirerimy, taxe rerawyònyre amalekita mahãdu watxirerimy. ⁹ Ta kiamy tii rarybere: Inihikỹmyhe rawotõmora arurukre heka. Manata ka-ò biwarubunykremy. ¹⁰ Tahe tamy raòwònyre tai roimyhỹò taxe rerubunyre reeryre dori rurukremy, iòhòlemy rariowykremy sutxi, rurukremy. Tahe irataana iribi retare ta teòruta taana ijõmy retare tahe adee ka idi rareri. ¹¹ Iòraruki tahe Davi tatyy ritxuare tabederyry deòsidỹỹmy, tule iwesele ijoi mahãdu riwinyrenyre. ¹² Rahinyrenyre aõhõkỹy rutỹỹnyrenyre tule renareherenyre txioromyta ixãwirenyre Sau rubu òraruki, Deuxu ijoi mahãdu wahe, wedu nihikỹ ijoi, sõemy ituerenyre aõbinaki. ¹³ Tahe Davi tamy rỹỹraxire weryrybo rybewahidi nade dee. —Tiludubo heka atxiteri? —Jiarỹ inihe amalekita mahãdu watxireri, ta kakile rasỹnyreri wiji ahãwã bede-kile! — Kawesemy rirawyònyre. ¹⁴ Aõherekibo heka wedu terubunyta tetyhynykõtyhymy Deuxu tuu ritare, wedu nihikỹ? — Davi rỹỹraxire: ¹⁵ Tahe taijoi mahãduõ-ò ryryre riteranyre: Birubunyke! Tahe hãbu amalekita dee raõbinanyre rirubunyre. ¹⁶ Kiamy Davi amalekita dee rarybere: —Kai òbitihikỹle heka bede-ò rarura. Kai òbitihikỹle heka texitỹnynyta iximy telyyta wedu nihikỹ wedumy ritare terubunytamy. Davi rahinyre Sau tòenamy tule Jonata tòenamy. ¹⁷ Davi wiu riwinyre taõhõkỹmy dỹỹnana Sau òraruki tule iriòre Jonata òraruki. ¹⁸ Ta kiamy rarybere Juda mahãdu idi rierynanyrenykremy. (Ka wiu heka tyyriti justu-ki iritina roimyhỹre). ¹⁹ Iny ijoireny heka ituerenyra Israel mahãdu hãwalo-ki! ²⁰ Tuu ijyyrenyõmykre Gate hãwa-ò tule askelõ-ò, filisteia hãwyy mahãdu rexideysanyke lau, ityhydỹỹkõdu mahãdu riòre reysarenymy rexiwayrytònymy ratxirenyke lau. ²¹ Biu roake ihoõre tule nonoè rejuxunyke ihoõre Gilboa hãwalò-txi, asureny tiu aõ ixyby tai txuhuõna. Kia-ki dori woudu deburehekỹ mahãdu debone rabròmy roireri, tule Sau debone toosona ituera. ²² Jonata waxiahate heka rubunarare, Sau mayrehe tasỹ tuu rexieryõhyymyhỹre iny debure atysy-ki tule taòludu mahãdu rirubunymyhỹre. ²³ Sau Jonatamy boho, heka waderina wihikỹ roire; butumy waumyreny, tule butumy r`abub-ki! Nawiikỹ ratyre teti roire tule halòe mahãdu ratyre ityhy roire! ²⁴ Israel mahãdu hãwyy, Sau dee bobubeny! Tii tyysò wihikỹ-di aratyynymyhỹrenyre tule (ouro) wihikỹ-di araywinymyhỹrenyre. ²⁵ Sodadu deburetyhy mahãdu rariòwyrenyre tule wouki ituerenyra. Jonata hãwalò-ki rurumy roireri. ²⁶ Adee arahinykre, waseriòre Jonata aratyhynymyhỹre jiarỹ! Erina heka wadee awi rare, hãwyy mahãdu derina ratyre wadee erina awi rare. ²⁷ Sodadu deburetyhy mahãdu rariòwyrenyre, tule ebònareny ituera ixãwira.