¹ Davi wedu-my raremyhỹ bedeu, sõemy ràma reare, inataõ wyramy heka bede riere ràma (ijramy). Iòraruki ta, Davi Deuxu dee rỹỹraxire, wedu nihikỹ-ò, ta kiamy dirawyònyde: —Sau inihe bede òrarureri tii heka taijoi mahãdu wana ròrubudỹỹrenyre: Gibeaõ mahãdu-my raòhòterenyre. ² Gibeaõ mahãdu heka israelita mahãdu aõkõ roire. Tiiboho heka amoheu mahãdu roire urile tahany ibuterenyre kiamy israelita mahãdu tamyreny rarybere idireny riywiywinymy roirekremy; ihãreleta Sau ihudurenymy tamyreny reare Israel ta Judamy mahãdu òraru-ki. Tahe Davi Gibeaõ mahãdu-ò rarariòwyre. ³ Kiamy rarybere: —Aõwexe adeereny ariwinykre? Aõma heka adeereny ariòwynykre ibina adeereny relere, iu tahe Deuxu ijoi mahãdu-ò awimy iu atxibenykre. ⁴ Ta tiiboho kiamy rirawyònyrenyre: —Sau bededỹỹnana wahe tasỹreny wana heka aõdi raòwoke aõkõre ouro-di raòwyke aõkõ tule prata-di raòwyke. Tulesỹ israelita mahãduõ arirubunyrenyke ihoõre.—Aõbo tahe tukemy, adeereny ariwinykre? —Davi rỹỹraxire tamyreny. ⁵ Kiamy tiiboho rirawyònyrenyre: —Sau heka wahudurenymy wadeereny reare tiki ijõ sohoji aratxirenyõkremy Israel mahãdu su bedeõki. ⁶ Iriòreriòre mahãdule heka wadeereny bidiwahinykre debòò inatxi reuro-my hãbu sõe rỹireri mahãdu wahe, ta aribitòtaarenykre Deuxu ruò, wedu nihikỹ ruò, Gibeaõ bede-ki, tai Sau ruare bede-ki, wedu nihikỹ wedumy ritare wahe. —Adeereny ariwahinyrenykre! — Kawesemy wedu rirawyònyrenyre. ⁷ Urile tahe, tii irybe ijõdire Jonata wana widee bede riywinyre wahe, taiki Mefibosete-di ruruõkremy rexiraykynyre, Jonata riòre wahe Sau riokore. ⁸ Ihãrelexe wedu tamyreny rarariòwyre Armoni ta Mefibosete-my boho dee — Iny inatxi Hispa riòreboho wahe, Aia rioòre wahe, Sau dee riwahinyrenyre; tulesỹ Merabe riòre rimyrenyre iruyre-my sõereny, Sau riòre wahe, Adriel dee riwahinyre heka rare, Barzilai riòre wahe, Meòla mahãdu heka rare. ⁹ Davi xe tamyreny riwahinyre Gilbeaõ mahãdu dee debò inatxi reuro-my sõereny, rirubunyrenyre xe bitòtaamy hãwalo riòre bede-ki, wedu nihikỹ ruò. Debò inatxi reuro-my heka iny rurure. Aõmau heka tuu rutỹỹnyre aõwi dele bedeu. ¹⁰ Tai tahe Hispa, Sau biraludu, tyyxehekỹ rimyre idi ta rexihetònyre mana tyre ridemy. Aõwi dele bedeu tai ratximyhỹ ihyy tai hyy biudele idi resere tule rubu mahãdu rixobanyre. Txumy rubu mahãdu riemyhỹre rara riròrenyke lau rumy tasỹ iròdu mahãdu-ò riijemyhỹre. ¹¹ Davi Hispa bededỹỹnana rieryreu. ¹² Rare ta diwyde Sau ti Jabe-Gileade-ki hãwadu mahãdu ribi tule iriòre Jonata ti diwylede, Jabe-ki hãwadu mahãdu heka rubu riwyrenyre Bete-Sỹ butuna ribi, iu filisteu mahãdu tai riònyrenyre ribi iu tule Sau rirubunyrenyre bedeu Gilboa hãwalo-ki. ¹³ Tahe Davi Sau ti ta Jonata myti rituunyre debò inatxi reuro-my hãbu rubu mahãdu wana. ¹⁴ Rituunyre xe Sau ti ta Janata myti tyby hãluu-ò rituunyre Kis-my nidu hãluu wo-ò, Sau tyby heka rare, Zela hãwã bede-ki, Bẽjami mahãdu bede-ki. Ibutumy aõmybo wedu rarybere ibutumy relere. Ka rexihumy rahudi tahe Deuxu ixitòedỹỹnareny dirawyònyde isureny bededỹỹnamy wahe. Aõbina filisteu mahãdu wana rỹire bededỹỹnana. ¹⁵ Wousỹ rohonyre filisteu mahãdu Israel mahãdu wana. Davi tasodadu mahãdu wana roirenyre tahe filisteu mahãdu wana raõbinanyrenyre. Aõbina bedeu Davi sõemy reywesere. ¹⁶ Hãbu rarire nihikỹõ sohoji iu ratximyhỹ Isbi-Benobe heka inire itõnori heka iruyre bedeõmy iutxie rare tule tõnori itỹmyra riuhemy idi ratximyhỹ. Davi rirubunykemy rexiraykynyre. ¹⁷ Urile tahe Abisai, Zeruia isere, kia Davi rihedỹỹnyre, filisteu dee reare ta rirubunyre. Iòraruki ta Davi sodadu mahãdu kiamy raryberenyre Davi wou-my iherenymy raõrekremy. Kiamy raryberenyre: —Kai heka Israel mahãdu (rasòsòna) tate, waribireny burukehe ihoõre. ¹⁸ Ixybysỹ wouõ rohonyre filisteu mahãdu wana Gabe hãwã bede-ki. Iu Sibekai, Husa hãwã ludu, hãbu rarie nihikỹõ rirubunyre Safe my nidu. ¹⁹ Ixybysỹ aõbina rohonyre filisteu mahãdu wana Gabe bedekilesỹ, iusỹ Elanã, Jair riòre, Belẽ mahãdu, Golia rirubunyre, Gatxi hãwã ludu. Itõnori deò riki heka tyy idi relemyhỹre deò wese rare ibude. ²⁰ Ixybylesỹ aõbina rohonyre Gatxi bede-ki. Taisỹ hãbu nihikỹõ ihỹmyhỹ, juhu mahãdu hãbu nihikỹ riokoreõ, tebò juhu heka debòò sohoji reuromy sõere tebò sohoji sohoji iwasỹ tulere debòò sohoji reuromy iwa juhu sõe. ²¹ Israelita mahãdu-my ralahajinanymyhỹ; tahe Jonata Simeia riòre, Davi seriòre, rirubunyre. ²² Ka inaubiòwa hãbuboho heka juhu mahãdu hãbu ninihikỹ rỹira mahãdu riokore roire Gatxi hãwã ludu Davi xe rahurenyre tasodadu mahãdu wana.