¹ Ka wiu heka Deuxu dee Davi rirynyre, wedu nihikỹ-ò, iu Sau ribi rihedỹỹnyre iribi sohoji aõkõ òbitityhy ibutumy iòludu mahãdu ribi: ² Wedu nihikỹ heka wamana rare, wahõrõ tikiemy nodu tulesỹ aõribi watarasadu. ³ Wadeuxu heka mana rare tai rexiwomyhỹre. Tii riwaijemyhỹre debòna-di iny rỹimyhỹre wesemy; tii heka waitxesedu rare, tule tii awityhymy riwamymyhỹre. Deuxu heka wahedỹỹdu rare, tii riwaijemyhỹre tule aõwesele waòludu mahãdu ribi riwahedỹỹnymyhỹre. ⁴ Tamy rarumyhỹre wedu nihikỹ-ò ixiwiòhedỹỹmy, tahe aõwesele waòludu mahãdu ribi riwahedỹỹnymyhỹre. Wedu nihikỹ òta ijoi rawiunymyhỹke! ⁵ Tiubo rubu bededỹỹnana riwakyrawonymy ixi rahõtinyre, wadee nade watyre resekremy. ⁶ Riwamyrexe rubu tareruti-di, hãluu rexiywiywinymy roimyhỹ riwamykremy. ⁷ Iòhãrumy wadee bede relereu xe tamyhỹkỹle raryre wedu nihikỹ-ò; kiamy tamy rexitòenyre riwawiòhenanykremy. ⁸ Tahe suu ramytatare raukỹukỹre, hãwalo rawo tule r aukỹukỹre tulesỹ ramytatare kiemyhe Deuxu reburere-ki ture. ⁹ Tearà ribi wàdà rohonyre, tule irywo ribi helòtyra bure sòhòkỹ rohonyre heòty iny sõdu wana. ¹⁰ Tii biu wetyy riraynyre ta desede biu wetyy luru heke iwati rawoò desede. ¹¹ ỹju bròtyaki ruore ta aõwesele roirenyre tetyre-ki ruòmy rare. ¹² Bede luru-di rexihetynyre; biu wetyy sõemy, bee sõemy, iwerura-my. ¹³ Biu delaa wana, tule heòty ikotxi roore. ¹⁴ Tahe wedu nihikỹ biu ribi naymytxide, iny nihikỹ tarybe riòlòdỹỹnyre. ¹⁵ Tii heka tawyhy-di rohotirare iuta ibutumy taòludu mahãdu riuberanyre; tulesỹ tabiu delaadi ire riteònyre. ¹⁶ Ka wedu nihikỹ taòludu mahãdu riaõhõkỹmydỹỹnyre bedeu tulesỹ, awimy aõkõ iu ihỹmyhỹ, tamyreny raymytxire, iu (bertxi) rawo rityrysydỹỹnyre, iu ibutumy su manydu ritỹnynyre. ¹⁷ Kua biu ribi hikỹle wedu nihikỹ tebò wadee diterenyde ta riwamyre; tii heka berawo ribi riwatare. ¹⁸ Wedu nihikỹ heka waòludu mahãdu iòhãru ribi riwahedỹỹnyre wamy dòdu mahãdu ribi. Tiiboho heka ibutumy wadee ityhy roire. ¹⁹ Tiubo wadee bede isiramy ratximyhỹ bedeu, wadee rekoarenyre; tahe iu wedu nihikỹ Deuxu riwaijere. ²⁰ Iòhãru ribi riwatare tule riwahedỹỹnyre aõherekibo kiemy inihe sõemy wamy rerinanymyhỹre. ²¹ Wedu nihikỹ sõemy wadi rorenymyhỹre kiemy dori òbitimy watximyhỹre; tii sõemy riwawiòhenamymyhỹre aõherekibo kiemy inihe aõ waki ibina ihoõre. ²² Jiarỹ heka wedu nihikỹ deewi rewinymyhỹre tule tiu òraruna rewinyõhyy watxwahãre waDeuxu aririke wahe. ²³ Jiarỹ heka irybe mynamy watxiwahãre tule ibededỹỹnana ratyre arohonyke ihoõre. ²⁴ Wedu nihikỹ riwarymyhỹre tiu aõ ibina rewinyõmyhỹre tule irehemy aõnaõna binabina ribi watxiwahãre. ²⁵ Kawesemy tii wadi ròrenymyhỹre kiemyhe òbitimy tamy watxiwahãre, tule riwaerymyhỹre waòraru ihoõre. ²⁶ Kai wahe, wedu nihikỹ Deuxu, kai heka awi tate mobo awimy adee ratximyhỹre-ò tulesỹ òbiti tate mobo iòbitimy adee ratximyhỹre-ò. ²⁷ Kai heka (owriuri) ihoõre iny ijõ iuriuri ihoõmy rỹimyhỹre mahãdu-ò, ka aòludu òxe tuõre ibinare. ²⁸ Kai heka ywimy nodu bihedỹỹnykre, ka xiwede mahãdu xe aõkõre urile bibedetxinykre. ²⁹ Kai heka, wedu nihikỹ, waloosòna tate; kai heka, wabede luru, tule mahukre. ³⁰ Kai heka ruru wadee bidiwahinykre waòludu mahãdu-ò idi areakremy tule inikỹmy biwaruruterenykre idi iribi aròtakremy. ³¹ Deuxu heka aõ òbitimy riwinymyhỹre tule aõmy rarybe wana imynale riwinymyhỹre. Tii heka debòna wese rare iny riemyhỹre mahãdu dee. ³² Wedu nihikỹ kai heka Deuxu sohoji tate kie tate ixyby ta ijõ ihõre; kai sohojile heka waDeuxurenyreri. ³³ Tii heka wahedỹỹdu ruruterehekỹ rare tule titxi rawana wadi taruki ratxirerimy ihỹre. ³⁴ Tule aõtxi areake-ò riwaijemyhỹre tule biu rarie tyre (riwasnyray) riwahedỹỹnymyhỹre. ³⁵ Tii riwaerynanymyhỹre aõbinamy aõmakremy waxiahate wihikỹ ariuhekremy. ³⁶ Kai, wedu nihikỹ, debòna wadee tewahinymyhỹte waumy rihedỹỹnykremy; awiòhedỹỹna òraruki heka waruruteremy wahãre. ³⁷ Kai heka tiu tiwawahinyõhyymyhỹre waòludu mahãdu riwamyke-ò tule tiu rariòwyõhyy watxiwahãre. ³⁸ Waòludu mahãdu hemy reawahãr ta iribireny ròtawahãre; arexitxuhunyke ihoõre ka rota xiery ta rexitxuhunymyhỹre. ³⁹ Rewexywexynymyhỹrenyre, rỹirenyke ihoõre; tule watirawo-ò rejuxunymyhỹrenyre rabòdumy. ⁴⁰ Ruru wadee tewahinymyhỹte waõbinanamy ta aõtxile waòludu mahãdu ribi idi ròtamyhỹre. ⁴¹ Waribi teòrudỹỹnymyhỹte, tule mobo wamy radònymyhỹre mahãdu arihukrenykre. ⁴² Tiiboho tawiòhedỹỹdumy rekoamyhỹrenyre, ta iny ihoõre rihedỹỹnyrenyke; Wedu nihikỹ-ò ryrymyhỹrenyre, ta rirawyònyrenyõhyymyhỹre. ⁴³ Rewexywexynymyhỹrenyre, ta su demy relemyhỹrenyre; ityrereny rariamyhỹre iwesebre subruru rymy rỹimyhỹre wesemy. ⁴⁴ Kai heka tiwahedỹỹnymyhỹte ixỹ mahãdu aõbinabinahakỹ kyribi ta hãwahãwã wedu-my tiwasynyte. Ixỹ mahãdu arieryke tule ihoõre ka wiji tahe wadeòdumy ihỹrenyre. ⁴⁵ Hãwã witxira mahãdu wadee rexisỹrabunymyhỹrenyre tule warybemy reòbymyhỹrenyre aõmy tamyreny rarybe wana. ⁴⁶ Teburereny titxibo reamyhỹre ta ramytatamy riòlònymyhỹrenyre tai awimy ratximyhỹrenyre ribi. ⁴⁷ Wedu nihikỹ Deuxu heka irumy ratximyhỹre. Tuta ijoi rawowydymyhỹke kua wamanamy wahe, tuta ijoi relyymyhỹke Deuxu rurutere nihikỹmy waumyhedỹỹdu wahe. ⁴⁸ Tii heka waweribi ratximyhỹre waòludu mahãdu oòraru-ki, waraworawo-ò ritidimyhỹrenyre. ⁴⁹ Tule riwahedỹỹnymyhỹre waòludu mahãdu ribi. Kai wahe, wedu nihikỹ, butumy wadee tewinymyhỹte waòludu mahãdu ribi aròtakremy tule hãbu deburehekỹ mahãdu ribi tiwahedỹỹnymyhỹte. ⁵⁰ Tai òraruki tahe sõemy umy rawowydymyhỹre iny bina mahãdu kyki; iòraruki ta adee arawiunykre wowydyna wiudi. ⁵¹ Deuxu sõemy wedu ritarasadỹỹnymyhỹre tule terina riteòsinymyhỹre mobo tii ritare —Davi heka rare tule iriòreriòre mahãdu tiiemy idireny rarekremy.