¹ Joabe-ko relyyrenyre Davi rahinyreri-my Absalaõ òraru-ki. ² Iòraruki tahe ibedeu, tarasana wowydyna bederyrymy rexirahorere ibutumy Davi ijoi mahãdu kiemy iòlò tariòre rubu-ò rahinyreri òraru-ki. ³ Diòkesedenyde hãwa-ò ibedewomy dirònyde, iwese sodadu mahãdu wouribi brebumy raorunymyhỹre wesemy, raixỹrumy. ⁴ Iòlò taò rihetynymy ratximyhỹ ta katxiterehekỹmy rirajuamyhỹ: —Wariòre! Absalaõ wariòre! Absalaõ, wariòre! ⁵ Tai òraruki ta Joabe rare iòlò heto-ò kiamy tamy rarybere: —Wijihe ibutumy asodadu mahãdu teixỹrudỹỹnyta, ahedỹỹdu mahãdu wahe, ariòreboho wana tule ahãwyyboho tasỹ abiraludu mahãdu-my wana ahedỹỹdu mahãdu. ⁶ Kaihe umy rerinamyhỹre mahãdu-ò awiõte ka mobo wana umy rerinanykõmyhỹre òta awimy atximyhỹte. Wijihe kiamy texideòsinyteri aijoi mahãdu adee asodadu mahãdu wana aõke ihoõre adee. Kiamy wiji ka retehereri Absalaõ rurukõra wana ini heka eysamy atxiberi jiarỹboho ta inihe ibutumy arituerenyra. ⁷ Make taini heka tamyreny tureny mawydykre-my asodadu mahãdu-my. Ka tuu biwinyõkre wana, inatyhymy ararybekre, Deuxu, wedu nihikỹ nimy, biuraso rudiu moõ aweribi kanatxiõhyykre. Iu heka adee ire ibinamy bede kòdòhònykre. ⁸ Tai taxe iòlò rỹire ta ijòtòbona nihikỹ bire-ò runyre. Tahe isodadu mahãdu tuu bede rieryrenyre rohonymy runyrerimy iuxe isodadu mahãdu iwerura-di ributunyrenyre. Davi taòkesena riòrarunyre Jerusalẽ bede-ò. Iwanawana tasỹ israelita mahãdu rihenyrenyre, tasỹ tasỹ-my roberarenyre. ⁹ Irahudi ta, bedebede-my, taõbinareny riòrarunyrenyre. Kiamy raryberenyre: —Davi heka inyòludureny ribi inyhedỹỹrenyre. Filisteu mahãdu ribi iny rihedỹỹnyrenyre, wiji tahe Absalaõ lau rahenymy roimyhỹre iòraruki karibi rohonymy ramyhỹre. ¹⁰ Absalaõ heka inyboho ritarenyre tawedu-my, urile tahe rurura wou-ki. Aõherekibo tahe, Davile ixyby ka-ò inyboho riòkesedỹỹõreri tawedumy? ¹¹ Davi rieryre israelita mahãdu rybe. Tai taxe Zadoke riteònyre Abiata wana Juda mahãdu myỹ rỹrỹxirenykremy: Aõherekibo heka kaibohole wedu wiòhedỹỹmy tahõtinytenyta ixyby tasỹ-ò kòdoosekremy? ¹² Kaiboho heka wasỹ toite, wadeyre heka toite tule wahãlubu toite; Aõherekibo tahe ixyby waòkesedỹỹmy wadi atxitenytei? ¹³ Tulesỹ tarybe Davi Amasa dee kiamy riwahinyre: —Kai heka wasỹ tate. Tahe wijehe, kai wasodadu wedumy malokre Joabe deròwymy. Deuxu he ixinamy riwarubunykre tuu ariwinyõkre wana! ¹⁴ Kawesemy rarybere òrarukita ibutumy Juda mahãdu iweribi rexibutunyre, kiamy tarybe wedu dee riwahinyrenyre ixinamy taijoi mahãdu wana kòdoosedenykremy. ¹⁵ Tahe Davi doosede Jordaõ bero òhòkỹle dehemynyde. Juda mahãdu ijoi sỹ tule roire tiiboho wana Gilgal bede-ki witxi rekoarenykremy, tiiboho wana butumy kidiòhòredenykremy bero-di. ¹⁶ Aõwesele moma, Simei, Bẽjami ta mahãdu, Gera riòre, Bauri hãwã ludu, heka raelemyhỹ wylemy iòlò Davi wana witxi reakremy. ¹⁷ Mil hãbu-my heka Bẽjami mahãdu Simei wana rỹimyhỹ. Tule Ziba mahãdu rỹilemyhỹ, Sau sỹ mahãdu dee aõmysỹdỹỹ riwinymyhỹre mahãdu, roirenyre Jordaõ bero-ò wairyremy iriòre sõe tasỹ waituemy iaõmysỹdỹỹdu mahãdu sõe. Iòlò koki hikỹle ritehemynyre. ¹⁸ Ta riòhòrerenyre Jordaõ bero kotxi iòlò ijoi mahãdu wana kidiòhòrekremy tule txibo aõmybo iòlò tamyreny rarybekre imynale riwinyrenykremy roirenyre. Ka iòlò rohorekremy reywinymy ratximyhỹ-ò, ta Simei ixidi dehumyhỹde su-ò, ikotxi. ¹⁹ Kiamy rarybere: —Iòlò, adee kiamy arexitòenykre iubre karibi tahònyta bedeu adee ibina rewinyre tahe bitusanykremy ixiribi warybe bina. Iribi õhõti rusakre aõbo rewinyre ribi; uritere itxi õhõti (ijraõmy). ²⁰ Jiarỹ rexieryre ibina rewinyremy iòraru-ki ta heka deledelelemy adee rehemynyreri wiji. ²¹ Tai tahe Abisai, Zeruia isere, kiamy tamy rarybere: —Simei he rurukewi rare Deuxu wedumy ritareny ralahajinanyre òraru-ki. ²² Taita Davi le Abisai dee ta iseriòre Joabe-my boho-ò kiamy rarybere: —Kaiboho wahe, Zeruia riòre boho, aõhe ihoõre tii wana aòrarureny! Aõbinabinahakỹ aõbo wadee biwinybenykemy atxitenyteri? Ka wiji dorihe Israel mahãdu wedumy ka rare, israelita mahãduõ wiji rurukehe ihoõre. ²³ Kaisỹ adee inatyhymy ararybekre buruke ihoõre. ²⁴ Mefibosete, Sau riokore, tulesỹ nade wedu wana witxi reakremy. Tii tawa risuhoke ihoõre, tasuusiri tule risỹke ihoõre, tulesỹ tatyy risuhoke ihoõre iu wede Jerusalẽ ribi rohonyreun risuhòkõra hyky idi ta ka roosereri tatyysudi-ò yrubu. ²⁵ Ka Mefibosete Jerusalẽ ribi dehemynydeu wedu wana witxi reakremy, tamy rỹỹraxire: —Mefibosete, aõherekiwe wahemy taõte? ²⁶ Kiamy rirawyònyre: —Wedu, kaihe tiwaerymyhỹte wabina raremy. Kiaremy heka wadeòdu dee rarybere wawaru wadee riywinykremy, ityre arunymy ahemy arakremy, irahudita urile wadeòdu riwabonyre. ²⁷ Roihikỹlemy wamy relyyre. Urile tahe kai Deuxu ỹju wesena tate òbitimy aõ teerymyhỹte; kiaremy heka, txibo timybo tai mahãkre wana ixinamy tuu biwinykre. ²⁸ Waha sỹ mahãdu tahe bihubenyke sohojile riòbynyre, ka wadee taxe ibutumy tewahinyte ariroxikre wahe. Wiji xe ixyby aõmy adee arexitòenyke ihoõre. ²⁹ Wedu kiamy rirawyònyre: —Ixyby aõmy rybeõmykre. Reeryra dori Say aõnaõna umyreny ariywinykre kai ta Ziba-my. ³⁰ Ixinamy Ziba hõrõmyke ibutumy! —Kawesemy Mefibosete rirawyònyre.—Wadee kai awityhyreri ixyby asỹ-ò tooseteri. ³¹ Barsilai, Rogeli hãwã ludu, Gileade bede-ki roimyhỹre, tulesỹ nade ta hãwã ribi wedu wana kòdòhòrekremy Jordaõ bero-di. ³² Barsilai heka matuari rare: 80-my iwyra. Ityhy nihikỹ heka rare, ka wedu Maanãi bede-ki ratximyhỹ bedeu, sõemy riwiòhenanyre. ³³ — Barsilai — wedu tamy rarybere — Jerusalẽ bedeò wahemy manakre tai wawana matxikremy, jiarỹ adi aròrenykre. ³⁴ Ta tii kiamy rirawyònyre: —Tiu inihe irehemy bede waitxeseõna; aõmybo tahe arakre Jerusalẽ-ò ahemy? ³⁵ Ta tii kiamy rirawyònyre: 80-my wawyra-di watxireri tule timy aõ awi ariwinyke ihoõre. Rỹsỹna wi arieryke ihoõre tule aõbebe-my momo wiudu mahãdu wiu-ò aroholake ihoõ tule. Urile heka adee utxiè adiwahinykre. ³⁶ Awi heka rare wadee tewahinyteri tahe aõkõre. Uriki tahe ahemy arakre kia-ò le inihe Jordaõ bero kanaò riòre. ³⁷ Ixinamyta aroosekre wasỹ-ò waha nadimy boho hãluu bire-ki arurukremy. Kimã leta kaa rare, wadeòdu. Tii ixihemy bidykre ixinamy ixideewimy idi mabekre. ³⁸ Wedu rirawyònyre: —Ixihemy aridykre tule idi aròrenykre adeewimy. Tule adee butumy ariwinykre txibo aõmy wadee bexitòenykre wana. ³⁹ Tahe Davi tasỹreny mahãdu wana Jordaõ bero-kotxi riòhòrerenyre. Barsilai ryò ruore tule Deuxu-ò rityhenyre tii wana rarikremy, irahudixe Barsilai roosere tasỹ-ò. Israel Judamy boho rajeijeirenyre. ⁴⁰ Weduxe bero kotxi rohorere Juda mahãdu wana ta Israel mahãdu ibutemy ijõmy ihemy riohorere. Iribixe Gilgal-ò rare, Kimã ihelemy rare. ⁴¹ Tulesỹ israelita mahãdu ihelemy rirahure ta kiamy Davi dee raryberenyre: —Wedu, aõherekibo heka wasỹreny, Juda mahãdu, aradyrenyra kua weribiòhòkỹle, asỹreny wana butumy kua Jordaõ bero-ò? ⁴² Juda mahãdu rirawyònyrenyre: —Aõherekibo tuu rewinyrenyra kiemy inihe wedu wasỹreny ratxireri. Taile aõbo tarikihe beburetenyteri? Wedu aõbo warỹsỹnareny wadeereny riòwynyra da aõbo wadeereny riwahinyra? ⁴³ Israelita mahãdu kiamy rirawyònyrenyre: —Jiarỹboho aratyrereny Davi sỹ tyhyrenyreri, ta aõhereri aõkõ kaiboho isỹle atxitenyteri. Aõherekibo heka rybeõlemy tiwaritenyteri? Jiarỹboho heka, juhu tyhy tuu raryberenyre wedu òkesedỹỹmy! Urile tahe Juda mahãdu aõnityhymy Israel mahãdu ribi raryberenyre.