¹ Iòlò Davi tasodadu mahãdu ributunyre, ta rihitxihitxinyre wiribi ijõ ijoi mil-my rihitxinyre ijõ tasỹ 100 my rihitxinyre tamyòta tasỹ iny sohoji sohoji iwedumy (risnyre) idireny aõmysỹdỹỹdumy. ² Tahe inataõmy taijoi-di hitxihitximy rohonykremy rarybere, ijõ heka Joabe riwedunyre, ijõ tasỹ Abisai iwedure, Joabe seriòre (isereny heka Zeruia rare), ijõ ijoi tasỹ Itai iwedure, Gate hãwã ludu. Tahe iòlò kiamy taijoi mahãdu-ò rarybere: —Jiarỹ tule arakre aherenymy. ³ Ta kialemy rirawyònyrenyre: —Kaihe manaõkre. Ka anaòrunydenykeki wahe da kõmy aõbo ijoi òludu iny sodadurenymy kanarubudỹỹ, timy iwitxirake ihoõre tamyreny. Ka kai tahe debòitue hãbu sõe wese atxiteri wadeereny. Kakile marikehe wadeereny awireri kakỹny awimy karibi wadireny itxeredu biteònymy atxibekre. ⁴ Awire txibo timybo awimy tai mahabenykre wesemy ariwinykre! —Kawesemy idò rirawyònyrenyre. Tahe ijòtòbona weribi rỹimyhỹ iwanawana ta isodadu mahãdu resemy roirenyre mil ijoi sõe hitximy tasỹ 100 ijoi mahãdu hitximy ⁵ Kiamy tii Joabe ta Abisai-my boho-ò rarybere: —Ka wadee awimy atximyhỹtenyte wana, weryrybo Absalaõ ywilemy idi atxibenykre. Ibutumy sodadu mahãdu roholare Davi rybe-ò. ⁶ Davi sodadu mahãdu xe raõbinanyrenyre israelita mahãdu dee Efraĩ bijiu-ki tamyreny aõbinamy rekoare. ⁷ Tahe Davi sodadu mahãdu israelita mahãdu ribi rotarenyre. Sõemy rirubunyrenyre: 20000-my hãbu iu ituere. ⁸ Aõbinadu mahãdu bedebedemy widi roberarenyre, bijiukihe aõnityhymy hãbu mahãdu tabre rahure bedetya-ki aõbinadu mahãdu ribi. ⁹ Lisitere-ribileta, Absalaõ Davi sodadu mahãduõ wana witxi reare. Absalaõ awaru tyre-ki runymyhỹ, tahe òwòrurawo-di rohonymy rare, taita irati òwòru rukurea wotxi ralomy rearenyre. Iawaru rexitxuhuny kõlemy reare rare, Absalaõ taxe biu-ki reàrenymy rarire. ¹⁰ Davi ijoi mahãduõ Absalaõ-my rabire ta Joabe dee rarybere: —Abasalaõ-my ta rabira òwòru ruruki reàrenymy kua doide! ¹¹ Joabe kiamy rarybere: —Tuhe tabita? Aõherekibo tahe taile terubunytakõta? Adee ini heka debòitue prata-my ariwahinyra ta weretysanamy inihe. ¹² Ta hãbu myỹ rirawyònyre: —Wadee mil prata-my bidiwahinyke hãrele, tiu tamy wadebò aõhe tỹỹõna iòlò riòre dee. Ibutumy ijoi roholara iòlò adeereny rarybera-ò adee Absai ta Hai-my dee. Wadee awimy atximyhỹtenyte wana, weryrybo Absalaõ-di ywilemy atxibenykre. ¹³ Ka irybemy areòby kòrawana ini Absalaõ arirubunyra, iòlò ini irahudi rieryra — tii heka ibutumy aõnaõna rierymyhỹre — tiu ini kai waweribi-ki arybeõna. ¹⁴ Arybeò ixyby aroholaõkre! —Kawesemy Joabe rarybere. Tahe inataõ tõnorimy Joabe rimyre ta Absalaõ-ki idi rojyre ta irurulemy roimyhỹ, òwòru ruruki reàrenymy. ¹⁵ Tamyòta Joabe sodadu mahãdu rikyrawonyrenyre Absalaõ tahe inatyhymyxe rirubunyrenyre. ¹⁶ Tahe Joabe rurònyre aõbina ruhukremy. Taawarureny ibutumy ritxuhunyrenyre israelita mahãdu hemy ijaribi tahe ribuarerenyre. ¹⁷ Absalaõ rubu riwyrenyre ta hãluu wotxi irubu-di rehurenyre bijiu bede-ki tamyòta mana nihikỹ-di riratòbònyrenyre. Tahe israelita mahãdu raòrunyrenyre, iny sohoji tasỹtasỹ-ò reareare. ¹⁸ Absalaõ irumy raremyhỹ bedeu, ixidee rowidỹỹre hetoti wesemy kiemy iriòre ihoõreki tuu riwinyre ini tai tiiemy roimy rarekremy. Ta tanilemy rininire, wiji (yrbu) tuu raerymyhỹre Absalaõ hõrõmy. Davi Absalaõ rubu-ò rahinyre. ¹⁹ Tahe Aimaà, Zadoke riòre, Joabe-ò rarybere: —Txioini arake (ijramy) iòlò dee ijyy-di wedu nihikỹ Deuxu òbiti riwinyramy, iòludu ribi rihedỹỹnyramy. ²⁰ —Kõre! — Joabe rirawyònyre. — Wiji rybe wahi wiõdi maõkre. Ijõ txuu ta tuu makre, wiji tahe aõkõre, iòlò riòre dori rurura. ²¹ Tahe teòdu etxiòbi dee rarybere: —Kaihe makre ibutumy aõmybo tabitamy iko belyykre. Teòdu taramy tamy resere Joabe dee irahudi tahe (ijramy) rare. ²² Aimaà rõhõtiõmyhỹ: —Txioini wahe biwawahinyke, ijyy-di tule arakemy, aõhereri aõkõ aõbo aõhebo rutỹỹnykre. —Aõherekibo heka tuu makemyreri, wariòre? — Joabe tamy rỹỹraxire. —Aõ bitake heka ihoõre ijyy-di noòwymy. ²³ Aõhereki aõkõ timykrebo, urile tahe arakemyreri! — Aimaà ixyby tuu rarybere. —Ma kỹnybohe ixinamy! — Joabe rirawyònyre. Tai taxe tii (ijramy) rare Jordaõ bede-di ryy ramyhỹre-di etxiòbi ratyre aõwesele rohonyre. ²⁴ Davi ijòtòbona bireki runymyhỹ hãwã weribiò aõkõ hetowo-ò ròtena weribi-ki. Itxeredu biu-ò raòwònyre ta ijò-ò runyre. Tahe retehere ahãna-ò ta hãbumy robire raijaranymy rarerimy ixisohoji. ²⁵ Tahe iòlò riteòarinyre. Kiamy iòlò rarybere: —Ixisohoji rareri wana, rybewahi widi rareri. Tahe rehemynymy nade heto-ò. ²⁶ Itxeredu sỹ ixybyle hãbuõ-my robire ixisohoji reamy rarerimy ta ijòki rỹimyhỹre dee ryryre: —Bedeteheke ini! Ixybylesỹ hãbuõ raijaranymy rareri! —Kiasỹ tule rybewahi widile rareri! — Davi rirawyònyre. ²⁷ Itxeredu kiamy rarybere: —(Ijra) heka, Aimaà wesereri Zadoke riòre komy kia hãbu awi rare — iòlò rarybere — aõhe wana rybewi wahidi rareri. ²⁸ Aimaà iòlò dee kiamy ryryre: —Awihyylemy bede rohonyra! Tahe tatiowomy tamy resere tule taòmy su-ò resere, ta kiamy rarybere: —Wedu nihikỹ, aDeuxu, kiahe tuu rakawowydyrenykre, tii xiery heka ijoi ritarasadỹỹna aòludumy rexirahòrera mahãdu ribi. ²⁹ Absalaõ tahe awilemy aõbo naderi? — Iòlò tamy rỹỹraxire. Aimaà rirawyònyre: —Asodadu Joabe riwateònyreriu, heka sõemy jeijei rohonyrerimy idi retehera, urile tahe riryõre aõbo aõherabo. ³⁰ Txiobo inihe kia-ò bexiwesinymy biwaraò! — Iòlò tamy rarybere. Tii xe taile riraòre. ³¹ Tasỹ ijyyduõ rehemynyre etxiòbi my nidu ta iòlò dee rarybere: Iòlò, ijyy wihikỹdi he adee rareri! Wijihe wedu nihikỹ Deuxu aratarasa dỹỹnyra ibutumy iny mahãdu aòludumy rexirahòrera mahãdu ribi. ³² Absalaõ tahe awilemy aõbo naderi? — Iòlò rỹỹraxire. Ijyydu kiamy rirawyònyre: —Jiarỹ wakihe ixinamy txibo aõhebo rutỹỹra wana rutỹỹnyra ibutumy aòludu mahãdu ibutumy umy dòdu mahãdu wana. ³³ Sõemy xe iòlò iu rabederyryre. Raòwònyre hetowo biu-ki rỹimyhỹ-ò tahe tahi riòrarunyre. Rirariralemy ihỹmyhỹ tule katxi terehekỹmy ryrymyhỹ: —Wariòre! Absalaõ wariòre! Absalaõ, wariòre! Joabe Davi-ki ibinamy rahare.