¹ Irahudi tahe Aitofel Absalaõ dee rarybere: —Txioini 12.000-my hãbu sõe aritakre, ta wiji rutemy aroikre Davi hewo ribi. ² Ta tamy areakre reywesereri wanawana iòra rurumy kia ratxireri tii kuduberukre, tule ijoi mahãdu ibutumy brebumy raòrunyrenykre. ³ Tahe iòlò sohojile arirubunykre. ⁴ Irahudixe ibutumy iijoi mahãdu adee adidykre, iwese hãwyy tahãbu-ò roosemyhỹre wesemy. Kiemy dori iny sohojile rurukremyreri, ijõ mahãdu xe ixinamy rỹikre. ⁵ Absalaõ tai awimy rahare ureraru-ki, tule israelita mahãdu awimy tai raharenyre. ^{1 6} Husai rehemynyreu, kiay Absalaõ rarybere: —Aitofel ureraru wadeereny riõra inihe myra; ihewomy aõbo ijoi rakre? Timyboxe, kaisỹ manarybekre aõbo ijoi riwinykremy. ⁷ Husai kiamy rirawyònyre: —Aitofel ureraru inihe awiõra wiji. ⁸ Kaihe buu Davi teerymyhỹte iijoi mahãdu wana aõbinaki iwodebure roiremy tulesỹ reburemy ratxirenyreri iwese (urxa) bederahyki ratximyhỹre wesemy tariòre wasidỹỹna òraruki. Buu heka sodadu ibedeery ratxireri rumy tasodadu mahãdu kyki aõkõ ratxirerimy ihỹre. ⁹ Aõhe wana wiji ka rexiwomy ratxireri hãluu bedeõkeki da kõmy aõbo hãwaõ-ki ratxireri. Ka Davi aõbinamy asodadu mahãdu-ò kedeakre, mobo tamy roholara mahãdu kiamy kanarybekre Absalaõ sodadu inihe ituera. ¹⁰ Tule sodadu tebure mahãdu dori, halòe wese teburereri mahãdu dori, kuduberudenykre. Butumy heka Israel mahãdu buu rierymyhỹre sodadu ityhy raremy tulesỹ sodadu tii wana ratxireri mahãdu sỹ aõbina ery rỹireri teburemyle. ¹¹ Waureraru he kiamyra iny bibutunykre rare, karibi ihyy hãwã onana òhòkỹle rehemynykre ijoi rexibutunymy, ibutumy israelita mahãdu, ỹnyra rutàwese tahe rexibutunymy roikre sõe, tasỹ kaile aõbina komy makre biweludunymy. ¹² Txibo Davi titxibo ratxireri, itxi rekekoarenykre aõbo aõhebo rutỹỹnyreri riery kõole wahe. Timyxe aõhe tỹỹõna iu tii rahenykre ihoõre iijoi mahãdu tule ibutumy tabre rahurenykre. ¹³ Ka iwitxira hãwa-ò rahenykre wana, iny ijoireny mahãdu reruti kidiwydenykre, idi hãwã rikitxiwirenykremy manaõ rarike ihoõre biu-ki. ¹⁴ Ta Absalaõ israelita mahãdu wana kiamy raryberenyre: —Husai ureraru inihe Aitofel ureraru ribi awira. Wedu nihikỹ Deuxu he tuu riwinyre Aitofel ureraru wihikỹ-di ròiõkremy, tai Absalaõ aõhõkỹmy rutỹỹnykremy wedu nihikỹ bededỹỹnanamy. Davi deòarixidỹỹna ta rahenyre. ¹⁵ Tahe Husai Zadoque ko relyyre ta Abiata ko ijõmy relyyre Absalaõ timybo ritohonyramy ta israelita mahãdu butumy roholaramy tule sỹ Aitofel timybo raryberamy ikoreny relyyre. ¹⁶ Kiamy rarybere: —Ta wylemy Davi deòarixidỹỹmy inyõ biteònykre myỹ tamy marybekre uritere rywetuaki tỹhi õmykremy. Jordaõ bero kotxi wytyhylemy Davi rohorekremy taijoi mahãdu wana ituerenykõkremy wahe! ¹⁷ Jonata ta Aimaàmy boho iwory hogeo-my nidu iòhò-ki ratximyhỹreny ròraòmy rexiòhãrunymyhỹrenyre hãwa-ò roteki inyõ tureny robikelau. Teòduõ aõu aõu ramyhỹre tamyreny rybe wahidi aõobo roholamyhỹre ijyymy; iu tahe iòlò Davi ko ijyymy roimyhỹre. ¹⁸ Iu bedeu tahe inyõ tureny robire ta Absalaõ ko tuu relyyre. Iòraruki ta Jonata ta Aimaàmy boho wytyhykemy roirenyre, hãbu Bauri hãwa-ki rasỹnymyhỹre heto-ò. Iheto bireki hãlyybe rỹimyhỹ, iwooleta rironyrenyre. ¹⁹ Hãbu hãwyy hety rimyre, ta hãluu ijò idi ritòbònyre ityre tasỹ alòbrònaty riòdònyre iny rieryõkremy. ²⁰ Absalaõ sodadu mahãdu ritehemynyre ta hãwyy-ò rỹỹraxirenyre: —Titxiwe Aimaà ta Jônatamy boho roire? —Rekuròrenyra kanaweribikò! Kawesemy hãwyy rirawyònyrenyre. Ta ihãrele rierenyre, urile tahe itxi rekoaõhyyre; tahe ixybyle Jerusalẽ-ò riòkeserenyre. ²¹ Roire sỹtybymyxe, Aimaà Jonata wana hãluu ribi riòlònyrenyre tahe roirenyre Davi deòarixidỹỹmy. Timybo Aitofel bede riywinyramy tamy reakremy kiamy tamy raryberenyre: —Wytyhylemy bero kotxi bohorekre! ²² Tahe Davi taijoi mahãdu wana Jordaõ bero kotxi taòhòrese riòrarunyrenyre ka, txuu rohonyreuxe butumy taòhòrese rahurenyre. ²³ Ka Aitofel ureraru dee moõ reòbyõre-ki xe, roosere taawaru rimymy ta rare ta hãwa-ò. Irahudi, taõnaõna ibutumy riywiywiny myrahudita, rexirubunyre (btòtaamy). Ta tyby wabede ole rituunyrenyre. ²⁴ Ka Absalaõ Jordaõ bero kotxi riòhòrerenyreu, Davi tiu aõkõ Maanãi hãwa-ki rehemynymy ratximyhỹ. ²⁵ Absalaõ Amasa tasodadu wedumy rirutàre, Joabe derowymy. Amasa heka Jeter-my nidu riòre rare, israelita mahãdu; ise tasỹ Abigail rare, Naà riòre heka rare, Zeruia seriòre wahe, Joabe se wahe. ²⁶ Absalaõ israelita mahãdu wana Gileade bede-ki rexibutunyrenyre. ²⁷ Ka Davi Manãi-ò rehemynyreu, Sobi wana witxi reare, Naà riòre wana, Habà hãwa-ki hãwadu-wana, Amoanita bede-ki; Maki ibiòwa-my, Amiel riòre heka rare, Lo-Debar-ki hãwadu heka rare; Basilai ijõmy imahãdu renyre, Hosel~i-ki hãwadu heka tii rare, Gileade mahãdu. ^28-29 Tiiboho heka (bacia) diwymy doide, suherana, ta herina tulesỹ rỹsỹna diwydenyde dewi rỹsỹnamy taijoi mahãdu wana (rirsỹkremy), (trigo) riwyrenyre, (cevada), ỹnyde, òmyta, aõtyhy node, òmytani, bidi, broreni huãsyra, broreni huãsy werawera ta budoenimy. Tiiboho rierymyhỹreny, Davi bedetyatya-ki, taijoi mahãdu wana rama tamyreny reakremy, bemomo tule reyweserenykremy.