¹ Isỹtybymyta Absalaõ ityti heòty ixidee riywiywinymy ratximyhỹ awaru wana tule xikõitamy hãbu sõe ikomy raòrunyrenykremy. ² Rudihikỹle rỹimyhỹre ta ixyby hãwã ijòtòbona; kita rỹirerimy ihỹre, tai ryy raonananymyhỹre-ki. Ka inyõ hãwã witxira ribi nalòmyhỹde Davi tamy aõ riywinykemy, ta Absalaõ tamy ryrymyhỹre ta tamy rỹỹraximyhỹre tiludubo raremy. Tahe iny rirawyònymyhỹre. Wedu, jiarỹ inihe aõma mahãdu rare Israel mahãdu. ³ Kiamy Absalaõ rarybemyhỹre: Bedetehe ini! Bededỹỹnana ratxireri, urile tahe iòlò ijoi-ò kaki ratxiõreri ahõrõ-ò roholakemy. ⁴ Tule sỹ Absalaõ kiamy rarybemyhỹ: Kaa! Jiaryỹ bede ywidỹỹdukeki kaki! Ikeki wadeele iny kanamyhỹeke taõnaõnamy rybemy da aõmy ixitòedỹỹmy aõbo wadeele rỹỹraximyhỹke, ta tamy aõ ariwinymyhỹke. ⁵ Tahe, aõtxile iny Absalaõ dee rehemyny wana, rimymyhỹre, iryò ruòmyhỹre. ⁶ Absalaõ butu israelita mahãdu dee tuu riwinymyhỹre Davi iòlò dee iny rawana tabededỹỹnana ywidỹỹmy, tarybe wiwi heribi iny ixiwohe riatymyhỹre Israel mahãdu. ⁷ Inaubiòwa wyra sỹtybymy ta, Absalaõ Davi dee rarybere: —Txioini he Hebrõ hãwa-ò arake Deuxu dee heka kiamy rarybere, wedu nihikỹ-ò. ⁸ Gesur-ki rahãwanymy raremyhỹ wanawana wahe, Siria bede-ki, kiamy rarybere, wedu nihikỹ ixyby kidiwaòkesedỹỹnykre wana Jerusalẽ-ò, Hebrõ bede-ki tuu areàlàkremy rexiywinyre. ⁹ Make ixinamy! — Kawesemy iòlò rarybere. Taxe Absalaõ rare Hebrõ-ò. ¹⁰ Urile tahe rybewahi dinodu komy riteònyre ibutumy Israel mahãdu dee, myỹ tamyreny rarybekremy. —Kaa tòka wodỹỹ-ò boholabenykre wana, myỹ marybebenykre: Absalaõ Hebrõ hãwã iòlòmy runyra wiji. ¹¹ 200 hãbu sõemy heka Absalaõ hemy roirenyre Jerusalẽ hãwã ribi, riheludunyrenyre, aõ rieryrenyke ihoõre ka roire ihemy tule rityhynymy roire ihemy. ¹² Ka xiwe riwahinymyhỹ wanawana ta, Absalaõ Aitofel dee rarariòwyre, Gilo hãwã ludu-ò. Aitofel heka Davi ijoi mahãduõ rare. Kawesemy ta iòlòmy òluduna riwinyre iruruteremy iu relere, Absalaõ heludu mahãdu ire rasõere. Davi Jerusalẽ ãribi rahenyre. ¹³ Tahe ijyydu nade ta Davi-ko relyyre israelita mahãdu Absalaõ ijoimy wiji rỹirerimy. ¹⁴ Tai tahe Davi tasodadu mahãdu-ò rarybere tiiboho wana Jerusalẽ-ki ratximyhỹ mahãdu dee: —Ka Absalaõ ribi rikihenyrenykeki, wylemy ròkòirenyke. Ròkòita wylemy, uri (kõyrbu), kakile inyboho kidimydenykre, iny ribireny kòdòtakre tule ibutumy mobo ka hãwamy rỹireri mahãdu kidirubunykre! ¹⁵ Awire. Jiarỹboho, aõmysỹdỹỹdumy watxirenyreri, rexihumy watxirenyreri aõmybo manarybekre sohojile reraòrenyreri! — Kawesemy teòdu mahãdu rirawyònyrenyre. ¹⁶ Tahe iòlò rohonyre tahãwyy mahãdu wana ta taõmysỹdỹỹdu mahãdumy roirenyre. Ijõ tabiraludu mahãdu õle ririmy heto-di itxeredumy debòitue sõemy rarirenyre tai. ¹⁷ Ka iòlò riòlònyrenyreu tasỹreny mahãdu wana hãwã ribi, heto ionana-ki rỹimyhỹ-ò rexitxuhunyrenyre. ¹⁸ Ibutumy iaõmysỹdỹỹdu mahãdu lama lemy iramy rỹimyhỹ iòlò ramy iwanawana ta keretxita mahãdu ta peletxita mahãdu rexideòtenyrenyre irykotxi. 600 sodadumy ihemy diode Gatxi hãwã ribi ihemy roireri wahe tule iratyre riòlònyre. ¹⁹ Tahe Davi Itai dee rarybere, iwedureny-ò: —Tiòwe wahemy tateri? Bòòseta wedu tỹmyra wana matxikremy. Kai heka hãwã witxira mahãdu atxiteri, ahãwã ribi irehemy ahãte awimy. ²⁰ Iòhòtyhylemy heka kaki bede teijeta tahãwanymy. Timykibo tahe adee areòbymy wahemy manakre? Jiarỹ dori tiobo arakre rexieryõhyyreri. Bòòseta butumy aijoi mahãdu ixihemy bidykre. Wedu nihikỹ derina tule iòbiti bededỹỹnana awana ratxikre! ²¹ tahe Itai rirawyònyre: —Iòlò jiarỹ he inatyhymy ararybekre, wedu nihikỹ nimy, Deuxu irumy nodu nimy, tiiemy ahemy arakre tiobo makre òhòkỹle, aõaxina aòraruki arurukre. ²² —Awirebohe! — Kawesemy Davi rirawyònyre. — Mobohe wakomy! Itai xe rare ikorenymy ibutumy taijoi mahãdu wana tule tasỹreny mahãdu wana. ²³ Iwanawana ta Davi ijoi mahãdu rohonymyhỹrenyre, ixỹ mahãdu tule sõemy rasỹbinamyhỹre brebumy. Iòlò bero kotxi reurore Sedrõ bero kotxi, ijoi mahãdu tule ihemy riòhòrerenyre, bedetya hakỹ-ò roirenyre. ²⁴ Zadoke, Deuxu dee aõmysỹdỹỹdu, iherenyki ihỹmy, tule levita mahãdu arka-di retyymyhỹreny. Levita mahãdu xe arka suò riderenyre ixỹ mahãdu butumy taòlò rahure rahudi hãwã ribi. Abiata tule taile ihỹmyhỹ. ²⁵ Tahe iòlò Zadoke dee rarybere: —Arka-di ixybyle makre hãwa-ò. Wedu nihikỹ awimy waki rahakre wana, tiutxumy tulobiximy arakre tule heto iwoki rỹireri-ò itxeremy. ²⁶ Ka, waki awimy rahaõkre wana, ixinamyhe timybo aõhebo (riwasnykre)! ²⁷ Ixybyle Davi Zadoke dee rarybere: —Bedetehe ini! Aimaà ariòre bidykre Jonata tule, Abiata riòre, ixinamy boosekre hãwa-ò. ²⁸ Iwanawana ta, rywetyaki araraòmy arunymy ararekre, timyboxe ijyy umyreny kedehemynykrele ariraòkre. ²⁹ Tahe Zadoke ta Abiatamy boho arka-di roirenyre Jerusalẽ-ò ta taixe roiremyhỹ. ³⁰ Tahe Davi olivera hãwalò-ò raòwònyre rahinymy, tawadero hukỹlemy ihỹmyhỹ tule ubeta taratiò ritidire tabedewo deòsinamy. Ibutumy ihemy rirahure mahãdu tule tarati rehetynyrenyre tulesỹ rahinymyhỹreny. ³¹ Ka Davi-ko relyyrenyreu Aifotel bededỹỹnanamy Absalaõ weribi-ò rohoreremy, kiamy tii rarybere: —Wedu nihikỹ Deuxu, Aitofel dohodỹỹna ibutumy Absalaõ raykyna ribinabinanykre! ³² Ka Davi hãwalò-ò rehemynyreu, tai wiu rohonymyhỹre-ò, ibiowa tyhy Husai-my nidu, arkita mahãdu, rare tai tii wana wiji reakremy. Husai tyy iyrayrahakỹ-di rexityynymy ihỹmyhỹ tule suu taratiò riòdònymy ihỹmyhỹ tabederyry deòsinamy. ³³ Kiamy Davi rarybere: —Wahemy noõmykre, tiu dori kiaweseki biwawiòhenanyõtyhy. ³⁴ Myta biwawiòhenanykre, Aitofel dohodỹỹna-di aõ releõkemy. Ka hãwa-ò roosekreu, kiamy Absalaõ-ò marybekre: Iòlò, wijihe awana aratxikre iwese bu wana watximyhỹre wesemy. ³⁵ Deuxu dee aõmysỹdỹỹdu tai iu kanatxikre Abiata tule, ta ikoreny belyykre ibutumy aõmybo taholamyhỹtemy iòlò heto-ki. ³⁶ Iriòremy Aimaà ta Jônata-my boho, tule tai kanatxidenykre, ta ijyy-di wadee biteònybenykre aõtxile txibo aõõbo boholabekre-ò. ³⁷ Tahe Husai, Davi biowa rare ta rehemynyre hãwa-ò tule Absalaõ iutyhyle rehemynyre.