¹ Joabe, ise heka Zeruia rare, Davi bededỹỹnana rieryre Absalaõ wehityy sõemy risarerimy. ² Ta hãwyy bedeeryhykỹ òrysymy inyõ riteònyre Tekoa hãwa-ki sỹdu ta kiamy tamy rarybere: —Bexiòtaòtanykre tadobumyhỹdemy arubu-ò. Iny robumyhỹ tyy-di bexityynykre tule uritere ixisihodỹỹõmykre. Aõmakremy irehemy ibru-ki bede tadiije myhỹtekremy. ³ Mata wedu-ò rybemy timybo adee ararybekre mynamy tamy marybekre. Tahe Joabe tamy rarybere timybo rarybekremy irybe riywinyre. ⁴ Tahe hãwyy rare tai wedu ratximyhỹ òhòkỹle, tatiowomy resere iribi tasỹ taòmy su-ò resere tyhydỹỹ bededỹỹnanamy ta myy rarybere: —Txikòlàhà iku anokerỹbo, wedu, bidiwawikòhenanyke iku làhà! ⁵ Aõmybo tahe teateri? — tamy rỹỹraxire. Hãwyy kiamy rirawyònyre: —Wahãbu kie rurura; jikarỹ heka wytese ruxetòe rare. ⁶ Wedu, jikarỹ heka waritxore inatxireri. Tikutxumy wiwana bederahyhyki ralanobinanyrenyre. Iny ihãkukõre wiribi ritakarenykemy, ihykyxe ijõ wii rirubunyrenyre. ⁷ Ikòrarukita wasỹ mahãdu wamy rakòludurenyreri. Idi sõemy rarutakarenyreri tamyreny kariwahinymy rirubunyrenykemy, taseritxore rirubunyre kòraruki. Ka tuu riwinyrenykre wana, waritxore ihãkukõmy kareakakre. Wararòsòna kiekie làhàxe rahurenykre wahãbu taiki iritxore kõmy (risnyrenyrekre) moõ ini itỹmyra dỹkỹkõna. ⁸ Davi kiamy rirawyònyre: —Bòòse asỹ-ò, jiarỹ timybo idi arõhõtinykre. ⁹ —Wedu, — tii rarybere — jikarỹ wasỹreny mahãdu wana tamy karekòbyrenykre anotxile txibo anobo biwinykre-kò. Tule wedu ano atyre rakutxienyke ihakukõre. ¹⁰ Tahe iòlò kiamy rarybere: —Txibo inyõ adee aõbinamy reakre wana, ka-ò idi mynakre, ta tiu ixyby aõhe adee tyyõna. ¹¹ —Wedu — tii rarybere: txikolàhà iku anokerỹbo, wedu nihikỹ-kò bexitòenyke, aDeuxu, kò, wasỹreny mahãdu heka waritxore rubu-kò raruki bidi rikywinyrenyreri ixyby ano nihikỹ relekõkemy, waritxore rubudỹkỹmy heka raryberenyreri. Davi kiamy rarybere: —Wedu nihikỹ nimy ararybekre, Deuxu irumy nodu nimy, moõ ariòre dee aõhe rutỹỹnyke ihoõre. ¹² —Wedu — hãwyy rarybere: txiko ikuni ixyby krarybe sohojile anomy. —Awire! — Kawesemy rirawyònyre. ¹³ Anoherekibo heka Deuxu sỹ mahãdu deke bina tewinyta? — Kawesemy hãwyy rỹỹraxire. — Ikòlò, wedu kai heka aritxore hãwã witxira ribi kanakõkremy tarybete; kiamy, wijityhyle tuu tarybeta, kai kòbitihikỹle heka anohỹkỹmy (texisnyteri). ¹⁴ Ibutumy xe rikituerenykre; iwese bee sutxi rejuxunymyhỹre wesemy, timy ixyby rabutuke ihãkukõmy. Iwesebre Deuxu tiku iny rurura ribi ixyby ikòkesedỹkỹkõna, ka ikòlò tahe tuu riwinyke hãbu ixyby ka-kò kanakemy hãwã witxira ribi. ¹⁵ Ikòlò, adeke rybemy heka wiji rareri kiemy dokuri iny mahãdu wadekehekỹle reakemy rỹireri riwabrebunymy. Tai tahe tuu rahõtinyre: Krakrehe ikòlò-kò rybemy, adahaka timykibo warybemy kedekòbyke. ¹⁶ Kawesemy he rahõtinyre wadeke bedekòbykremy tule biwahedỹkỹnykremy iny mahãdu ribi waritxore rubudỹkỹmy rarutakamy rỹireri mahãdu ribi wadi tule rarutakarenyreri tule Deuxu suu tasỹ mahãdu deke riwahinyre ribi riwatakarenykremyreri riwarubunyrenykremy. ¹⁷ Jikarỹ, ekòdu, tule kiamy rahõtinyreri wahedỹkỹmy wadeke manarybekemy, kiemy dokuri ikòlò Deuxu ỹju wese rare butumy anonanona rikerymyhỹre. Wedu nihikỹ, iny Deuxureny, he awana ratxikre! ¹⁸ Adee lỹỹraxi ariwinykre — Kawesemy iòlò rirawyònyre, — tule òbitimy wadee tuu manarybekre. — Wedu, ixinamy (bdỹkỹraxikre) anoaxina anomy! — Kawesemy hãwyy rarawyònyre. ¹⁹ —Joabe kỹny tuu adee rarybere aõhe inatyhy? — Iòlò rỹỹraxire. Hãwyy rirawyònyre: —Tuu krarybekre, butumy kòbitimy, isirare timybo ỹkyraxi ribi iwitxiramy tuu krarybeke. Kohe, tiki tuu wadeke rarybere asodadu Joabe timybo krarybekre tule anobo kariwinykre. ²⁰ Tiki anomamy tuu riwinyra anonanona nyimyhỹde ixãwikemy. Wedu kai heka abedekeryre Deuxu ỹju wese tule butumy anonanona tekerymyhỹte. ²¹ Irahudi xe iòlò Joabe dee rarybere: —Wawohe rerahorera aõbo adeewi ariwinykremy. Mata weryrybo Absalaõ òrysymy ixyby kodoosekremy. ²² Tahe Joabe ixidi su-ò rehure Davi kotxi tyhydỹỹna bededỹỹnanamy ta kiamy rarybere: —Deuxu sõemy arawiòhenanykre, iòlò! Wijihe jiarỹ reeryra wedu waki awimy raharamy, waixitòedỹỹna dee reòbyra, rewinyreò, eòdu wahe. ²³ Tahe Joabe rỹire, rare Gesur hãwa-ò tahe Absalaõ didyde Jerusalẽ-ò ixyby. ²⁴ Ta wedu, kiamy rarybere Absalaõ iheto-ki rasỹnykõkremy. —Tuu arobiõkre! — Kawesemy tii rarybere. Taixe Absalaõ tahetoki-le rasỹnyre tule iòlò dee rake ihoõre. Absalaõ Davi wana widee rawooxirenyre. ²⁵ Israel bede-ki heka iny ihoõre Absalaõ wesena ini dehedehemy iruxerare òraruki. Irati ribi ta iwa-ò tuu hyy rubehera aõ tai ibina ihoõmy. ²⁶ Irade rehehekỹ, tule tarade wyra sohoji-di riòròmyhỹre, irehetyhymy reamyhỹre wana iutxie òraruki. Irade heka inatxi urihina ratyremy rautxienymyhỹre, aõma rixbi xe rahõrõnyreri iutxie òbitityhy ribi. ²⁷ Tii inataõre iriòre ijõ heka Tama inire, tii heka sõemy iruxerare. ²⁸ Absalaõ inatxi wyramy rahawanyre Jerusalẽ-ki iòlò-my rabiõhyylemy. ²⁹ Tahe Joabe òrysymy inyõ riteònyre iòlò dee rarybekemy ibededỹỹnanamy. Urile tahe Joabe noderalemy reare. Tasỹ ixybyle iòrysymy inyõ riteònyre, tule noderalemy reare. ³⁰ Tai tahe Absalaõ teòdu mahãdu dee rarybere: —Bedetehedeny ini! Joabe lòbròna heka wahõrõ òhòkỹle roromy roireri, tòbròna heka xewada ratxireri. Bòita biwonybenykremy. Tahe roirenyre Joabe oworu wodỹỹmy tahe riwonyrenyre. ³¹ Iòrarukita Joabe rare Absalaõ heto-ò tahe tamy rỹỹraxire: —Aõherekiwe eòdu mahãdu waòworu riworonyrenyra? ³² Absalaõ rirawyònyre: —Adee kie warybe rewahinyra. Marybekemy Davi dee myỹ: Kiamy wahe, aõherekibo heka Gesur ribi riwaòkesedỹỹnyreri? Tai ixinamy aratxike wihikỹle. Ixybyle Absalaõ rarybere: —Iòlò dee heka ararybekemyreri. Jiarỹ aõbo bede òrarure riki, ixinamy riwarubunykre. ³³ Tahe Joabe rare iòlò dee rybemy. Taita iòlò inyõ riteònyre Absalaõ òrysymy, tahe nade, tatiowomy tamy resere tule taòmy suò roire iruò. Tahe iryò iòlò ruore. Absalaõ wedumy raòludure.