¹ Idi tahe isaeli mahãdumy ribinanykremy satanasi idi riwisỹnyre tai Davi heka imahãdureny idi rariakemy rõhõtinyre. ² Tii Joabé-ò riteònyre, tasodado wedureny-ò tule riteònyre:_” Isaelisu-ò bede bedemy Isaeli mahãdurenymy idi mariabenykre, ibòò ribi, iraru ribi idi maariabenykremy. Arierykre dori tiwesebo iny rasõwere.” ³ Tahe Davi-ò Joabé rarybere:_ Iòlò Davi, Deuxu heka awityhy iny rasõwekemy riwinykremy! Adeòdureny wahe! Taheka aõherekibo aõbinamy bidiwyke Isaeli mahãdu-ò? ⁴ Ihỹre heka Joabe Davi riteranyre irybe weselemy riwinykremy. Tai Joabé ibutu Isaeli mahãdusu-ò idi rare imahãdureny idi rariarenykremy irahudi heka roosere Jerusalẽ hãwã-ò. ⁵ Tii rarybere iòlò-ò kia hãbu mahãdu alòredu ruruduhukỹ riòby mahãdu heka rasõwerenyre myy: 1 milaõ, 100 mili sõwe isaelisu-ki roire, ijõ 470 mili Judasu-ki roire. ⁶ Ihỹrele heka Joabé awimy aõkõ rahare inyõ idi rariakemy tai dori Levi mahãdu, Bejami mahãdu heka idi rariaõmy. ⁷ Deuxu ibinamy tai rahare Isaeli mahãdu idi rariarenyre-ki. ⁸ Tai Davi rarybere:_WaDeuxu, rexiòrarunyre jiarỹ, ibinamy rewinyra dori wamahãdu idi rariarenykremy reteónyre dori. Waòraruna biixãwidinyke, làhàmy! Waitxỹtere jiarỹ! ⁹ Kade Deuxu rybedu-ò Deuxu rarybere: _Davi-ò rybemy makre. ¹⁰ Tii taòraruna òwymy ritakemy; inataõmy iribi sohojimy ritake iaõhõkỹmy dỹỹnanamy. Aõ tii ritake ariwahinykre. ^11-12 Davi-ò Kade tamy rybemy rare. iwese Deuxu tamy rarybere Davi-o rarybere:_Kaile bitake inataõ ribi sohoji aõbo bitake: inataõmy beòra-di ramamy risake ada inataõ ahãdu-di heka iny òludu lau ribi bexiijekemy, ada inataõ txu-di Deuxu tamaurehe-di adi reakre aõma tahe binana kiditeònykre asureny-ò Deuxu taỹju rubu-di kiditeònykre tai sõwemy iny rurukremy. Aõbo, Davi bitake. Aõbo Deuxu-ò ararybekremy. ¹³ Aõkõrehe, isiratyhyrehe wadee rare. Wabinareri wahe, Deuxu tebò-dile aõhõkỹmy wadee risỹnykre dori, hãbu mahãdu debò-di aõkõ. Mytahe, ixinamy Deuxule aõhõkỹmy risỹnykre wadee, hãbu mahãduke aõkõ. Deuxule ruxetòena ijõdire dori. ¹⁴ Tai binana binahakỹ Deuxu riteònyre Isaeli mahãdu-ò sõemy rurure 70 mili sõwe Isaeli mahãdu-ki rurure iu. ¹⁵ iribi tahe ỹju Deuxu riteònyre Jerusalẽ hãwã rahukremy, idi tahe Deuxu rarahorere taỹju-ò rarybere:_Ixãwikrehe, Ixãwira! Kia ỹju heka Araunáube-ki roire tai aõna õna iny risumyroiremyhỹ, jebuse mahãdusu-ki, ỹjumy roire. ¹⁶ Kiaỹju heka biu-ki tamaurehe-di roire Jerusalẽ hãwã rahukemy Davi tuu robire, tai heka Davi Isaeli wedu mahãdu wana ityyreny tyby-di roimyroiremyhỹ, tatiwomy reserenyre, iòsanareny bede-ò ritidire. ¹⁷ Tai Davi reixitòenyre myy:_WaDeuxu jiarỹle reòrarunyre. Jiarỹle Isaeli mahãdu idi risỹnyre tiwesebo sõwemy roiremyhỹ arierykemy, jiarỹle idi rariare. Herewelàhà tii boho aõkõ riwinyrenyre. Waha Deuxu wadi inyhe aõhõkỹmy bisỹnykre watyrele, wasỹ mahãduòle aõhõkỹmy bisỹnykre, tahe isaeli mahãduke aõkõ, jiarỹle rexiòrarunyre tii bohoke aõ riwinyõrenyre dori. ¹⁸ Iu heka Kade-ò Deuxu ỹju rarybere xiwena riwinykremy Arauná ube-òle taile aõna õna risurusurunyrenyre heka xiwenamy relekremy ỹju Kade-ò riteranyre. ¹⁹ Iwese Deuxu rarybere Davi kadesu-ò rare xiwena riwahinykremy. ²⁰ Iu heka Arauná ube-kile heka Davi riòrereny inaubiòwa aõna õna risurenymyroiremyhỹu heka ỹjumy robirenyre, tii boho raijiranyrenyre ilau, Davi riòrereny rexiwòrenyre ilau brebumy. ²¹ Davi ritehemynyreu heka Araunásu wedumy tamy nade, tatiwotimy resere takò su-ò ridere. ²² Davi tamy rarybere:_Asu wadee bohonynyke, kasu aõna õna risurusurunymyhỹ ariõbranykremy kaki Wanyrỹ Deuxu-ò xiwenamy ariwinykremy dori. Deuxu Tyhyhykỹ kia binana bina binahakỹ rahukemy lau dori. Marybeke wadee tiwesebo iòwy adee òbitimy ariòwynykremy. ²³ Tai Arauná tamy rarybere:_Aõkõrehe, waiòlò, ixinamy kasu adeehe rarekre, ixinamy kasu heka waiòlò, ahõrõhe rare. Kaa tule heka inatxi bororeni xiwenamy Deuxu-ò biwahinykemy bidyke. Kaa owòru tule biwyke kaa haò iny aõna õna idi risurusurunymyhỹre heka tule biwyke idi bisõkemy xiwena-ò, tule tiriku Deuxu-ò adee rewahinyreri Deuxu-ò xiwenamy biwahinykemy. Kaa ibutumyhe adee rewahinyreri. ²⁴ Davi tamy rarybere:_Aõkõrehe, Arauná, Deuxu-ò xiwena iòwyõ-di aõkõ Deuxu- ò ariwahinyke. Xiwena Deuxu-ò ariwahinyke tahe òbitimy anaòwynyke. Tule kasu òbitimy ariòwynyke adee. ²⁵ Tai heka kiasumy Davi Arauná-ò womati tỹrỹrỹhỹkỹ 7 kilu-di riòwynyre. ²⁶ Kiasu-ki heka xiwena riwinyre Deuxu-ò reàlànykremy, xiwena risõre tai ywina xiwenamy, xiwena risõtyhyre Deuxu-ò. Idi Tii reixitòenyre. Tai Deuxu iixitòedỹỹnamy. ²⁷ Deuxu taỹju-ò rarybere tamaurehe-di riyrubunykremy, tai ỹju tamaurehe-di riyrubunyre. ²⁸ Iu Davi rierymyhỹre heka Deuxu iixitòedỹỹnamy rirawyònyre-ki tai heka kiasu- ki aõnaõna risurusurunyre, taile xiwena Deuxu-ò riwahinyre. ²⁹ Kia bedeu heka Deuxu tyy heto Xibeaõsu-ki roire. Juhuu bederahy-ki Moisesi Deuxu tyy heto riwinyre heka tule iròdu xiwena tai risõmyroiremyhỹ Deuxu reàlàmyroiremyhỹ ³⁰ Ihỹre heka Davi Xibeaõsu-ò raõra Deuxumy reàlànykremy kia Deuxu ỹju maurehe laumy tai raõra.