¹ Bede roimy rare tahe Amõ mahãdu iòlòmy rurure, Naasi inire iriòre tahe teròwymy ralore. ² Tai heka Davi idi rawotòenyre idi rõhõtinyre: “Hanữ awimy idi aratxikemy, tyby Naasi heka wadee awimy riwinyre dori.” Tai heka inyõ mahãdu riteònyre tamy rybemy; Naasi rubusỹtybymy roireu. ³ Iu heka Davi deòdỹỹdu mahãdu Amõsu-ò ritehemynyrenyre Hanữ-ò Davi rybemy rybedu mahãdu tai Amõ mahãdu heka tamyreny raryberenyre Hanữ-ò: Kai aõbo awimy tahamahãte inatyhy kia Davi deòdỹỹdu mahãdu waha sỹtybymy rybemy dirahudenydemy. Tahe Aõkõrehe! Tii arateònyrenyre kasu itxeremy idi inysureny rahaananykemy, riwaitxenakremy heka toiteri. ⁴ Kiarybe òraru-ki heka Davi deòdỹỹna mahãdu tai rimyre heka iijòsirireny risyre, idi ityyreny riykaykare ihitxidereny-kile itykyreny riykare iribi tahe idi riteònyrenyre rooserenykremy. ⁵ Kiamy Davi rieryreu heka, inyõ mahãdu riteònyre witxi rearenykremy sõwemy ixãrunamy roiremyhỹ dori. Davi deòdỹỹna mahãdu heka Tamyreny rybemy rarybere:” Wajoireny Davi adeereny riteònyre heka tai iny boho roireri: Myy Davi rybemy rare: Ixinamy riki Jeriò hãwã-ki matxibenykemy riki aijòsirireny ranihiỹykreu heka asỹreny-ò boosebenykre. Kiamy Davi rybemy riteònyrenyre myy riki. ⁶ Idi Hanữ Amõ mahãdu wana rexieryrenyre heka Davi riteburedỹỹnyrenyre-ki tai heka Mesobotania-su ribi diòrydenyde awaru tewemy, Arã-Maakasu ribi tule diwyde, Sobásu ribi tule awaru tewemy diwydenyde, awaru ijiradu kery mahãdu riòryrenyre kiamy sõwe riòwynyre heka 35.000 kilu iutxiemy riòwynyrenyre womati ura-di. ⁷ Awaru tewe heka 2.000 sõwe e ijiradu kerydu ijõ tule Maaka mahãdu iòlòmy tasodadureny wana, dirahudenyde heka Medebasu-kile tai ratxirenykremyra, Tai Amõ mahãdu tule heka tahãwãreny ribile rexitarenyre alòre-ò. ⁸ Davi kiamy rieryreu heka Tasodadureny wedu Joabe-ò riteònyre alòre-ò sodadu mahãdureny wana rirahuremy. Tai Amõ mahãdu hãwã ko-kile rexisỹnyrenyre heka iòlò mahãdu heka tule rexisỹnyrenyre iòhòreny riòremy. ⁹ Tai tahe Joabe tahe kiamy robire heka tasodadoreny wiòhemy Arameu mahãdu-ò riteònyre. ¹⁰ Iuhe mahãdu tahe Abisaí sodadureny wedumy Amõ mahãdu-ò riteònyre. ¹¹ Abisai-ò Joabe rarybere:” Arameu mahãdu wadeereny kedeakeki tahe biwawiòhenanykremy bodoike, tahe Amõ mahãdu adeereny irurutererenykeki tahe arakre arawiòhenanyrenykremy teery.” ¹² Katahe wiji heka rekexirurunyrenykremy iny mahãdureny-ò, iny hãwãreny- ò, Deuxu hãwãreny heka roimyhỹre dori iny hãwãreny-ò ¹³ rakarurunyrenykremy Deuxudewimy rokotarenykremy.” ¹⁴ Tai tahe Arameu mahãdu-ò Joabe tasodadoreny itxirearenyre, riòryrenyre ilaureny Arameu mahãdu rahenyrenyre brebumy. ¹⁵ Tai heka Joabe lau Arameu mahãdu rahenyrenyre Amõ mahãdu tule Abisai lau rahenyrenyre hãwã-ò rooserenyre dori. Tai heka Joabe jerusalẽ hãwã-ò roosere. ¹⁶ Arameu mahãdu ribi Isaeli mahãdu rotarenyre tai Arameu mahãdu tamahãdureny-ò rybedumy riteònyre Eubaraté bero bire-ki Arameu mahãdumy roire, sodado mahãdu wedureny Sobaké ikoreny-ki dirahude heka taijoireny wiòhedỹỹmy. ¹⁷ Davi kiamy rieryre heka Isaeli mahãdu ibutumy ributunyre Jorodaõ bero riteorosòrenyre; itxireny rearenyre, Arameu mahãdu ikoreny-ki Isaeli mahãdu rexisỹnyre heka tasodadureny riteò teònyre. ¹⁸ Tai heka itxi rearenyre heka Arameu mahãdu iribireny raijiranyrenyre ilau. Tai heka 7.000 sõwe awaru tewe dinodu mahãdu Davi rirubunyre, ijõ 40.000 sõwe sodadu awaru dinodu mahãdumy. Sodado mahãdu wedu Sobaké tule Davi rirubunyre. ¹⁹ Isaeli mahãdu rotare-ki tai Hadadese iòlò mahãdu Davi wana awilemy rooserenyre. Idi ixãwire heka tai Amõ mahãdu heka Arameu mahãdu-ò tiu riwiòhenanyõtyhy ixyby.