¹ Bedemy roimyhỹre heka bilixiteu mahãdu-ò Davi ixybyle itxirenymy reare idi tahe iribireny rotare. Kate hãwã mahãdu ribi, su wera ludu mahãdu ribi ibutu iribireny rotare. ² Tulesỹ Moabe mahãdu ribi rotare, tii boho Davi deòdu wesemy relerenyre tule isureny Davi-ò riòwynymyroirenyre. ³ Iribi tahe Siriasu-ki Sobá hãwã iòló heka Hadadesé-ò Davi itxi reare Hamatésu iòhòmy. Iu heka Hadadesé Eufaraté bero kiasu heka rimykemy idi riwisỹnymy roire. ⁴ Hadadesé ribi alòre tewemy 1.000 sõwe tahe Davi idi rimyre, ijõ 7.000 sõwemy awaru dinodu heka, tule 20.000 soldadu ridyre. Tai Davi heka tule tewe wana sõwemy tamy rimyre ijõ awaru iuhe sõwe itireny ribinanyre. ⁵ Siro mahãdu heka Hadadesé riwiòhenanykemy rearenyre, tai heka Davi itxireny reare heka rirubunyrenyre 22.000 sõwemy. ⁶ Iribi tahe Siro mahãdu Damaxiko su-ò Davi tasodadureny risỹnyre tai. Davi iwedureny rexisỹnyre tii boho tamy isurenymy riòwynymyroiremyhỹkre. Tai heka ibutu sumy ribi heka Davi Deuxu rirurudỹỹnyre, wedumy ratxikemy. ⁷ Tulesỹ Hadadesé iwyhy itxenareny womati tỹrỹrỹhỹkỹ sõwe Davi Jerusalẽ-ò riwyre. ⁸ Ijõ heka Txibaté hãwã ribi, kuữ hãwãribi riwyre womati borosi kia hãwãreny Hadadesé ridinodunymyroire. (Bede roimy rare heka Davi riòre Salomaõ heka kia womati borosi idi riuhere Deuxu heto-ki, womati surònamy relere, womati sõwe sõwe, Deuxu hetoti idi riuhere bobosi womati-di.) ⁹ Toí heka Hamaté hãwã iòlòmy heka iu rieryre hamaté ribi Davi rotare tasodadu sõwe ribi rotare. ¹⁰ Toí Joraõ iriòremy riteònyre Davi-ò, tii riki awimy tai rahare Hamaté iribi Davi rotaremy awimy rahare. Juhu heka Toí Hamaté-ò itxi reare taheka rotaõra iribi. Tai heka Toí tariòre Davi-ò womati tỹrỹrỹhỹkỹ, womati tỹrỹrỹhỹkỹ iuramy, womati borõsi Joraõ Davi-ò. ¹¹ Kia womati sõwemy Davi rimyre heka Deuxu heto-ki ritidire kia wo-ki rihihitxi hitxinyre ibutuwo-ò idi Deuxumy reàlànykremy. Ijõ womati sõwe juhu diwyde heka Edõ mahãdu ribi, Amõ mahãdu ribi, Bilixiteu mahãdu ribi, Amalekita mahãdu ribi, sõwe womati riwyra. ¹² Zeruia riòre heka Abisaí inire, tii Edõ mahãdu 18 milimy sõwe rirubunyre Jiyrasu-ki. ¹³ Tii tasodadu ritidire Edõsu-ò, tai dori Davi kiasu-ó iòlòrenymy relere. Davi Deuxu rirurudỹỹnyre ibutusu-ò wedurenykremy. ¹⁴ Isaeli Iòlòmy Davi ralore awimy Isaeli mahãdu ridinodunyre. ¹⁵ Davi sodadu wedu heka Joabé inire, Abisaí seriòremy. Josabá heka Davi iòlòmy iraybididu rare. ¹⁶ Sadoké, Aitube riòre, Aimaleké Abiatá riòre, xiwena wahidỹỹdurenymy roire, Seraiá tyyritidỹỹdumy. ¹⁷ Keré mahãdumy, Pele mahãdumy heka Benaiá, Joiada riòre iwedureny rare. Davi riòre mahãdu heka iaõmysỹdỹỹrenareny ibutu ratyremy roire.