¹ Davi taheto-ki roimyhỹreu heka tii Natã Deuxu rybedumy riòrykemy inyõ riteònyre. Natã, Deuxu rybedumy dehemynydeu heka tii tamy rarybere:_Natã, awiõre heka, Beteheinyhe wahetomy, iòlò heto wiwihikỹ heka rasỹnywahỹre. kaa heto heka òwòru Sedoro-di wihikỹ-di awimy rasỹnywahãre, aõherewe Deuxu òwòruwodỹỹ tỹrỹrỹhỹkỹ tyky hetowo-ki rỹimyhỹre, awiõre heka rare. ² Tai heka Natã, Deuxu rybedumy rarybere Davi-ò:_ Kohe Davi, iny Iòlòmy, Deuxu awana ratximyhỹre dori, ibutu adeewimy biwinyke wahe. ³ Tai iu ruumy heka Deuxu Natã-ò rarybere: ⁴ _Natã, Davi-ò rybemy make, marybeke tamy myy:_ “Davi, uritere, kai aõkõ wahetomy biwinyke dori. Waheto deàlànamy kai aõkõ biwinyke tai arasỹnykemy. ⁵ Ejitusu-ribi Isaeli mahãdu retareu wiji-ò tiu hetowo-ki rasỹnyõwahỹmyhỹre. Tyky hetohyy-kile jiarỹ rawahỹre, ijõsu-ò reurò reuròwahỹre. ⁶ Su-ribi reurò reuròwahỹre Isaeli mahãdu wana heka tiu isaeli wedu mahãdu-ò rỹỹraxiômyhỹre aõherekibo heka waheto riwinyõrenyrerimy, sedoro òwòru-di waheto wadee riwinyõrenyre rỹỹraxiõhyyre tamyreny.” ⁷ Tai dori, wadeòdu Davi-ó marybeke, Jiarỹ heka, Deuxu Tyhyhykỹ, rarybewahỹre: “Jiarỹle heka bederahyy-ribi budoeni-di itxeredumy aratare heka wamahãdureny isaeli dinodumy matxikemy. ⁸ Awanahyymy titxibo atxiteri-ò tuhyymy awana raremyhỹ, aòludureny-ribi arawiòhenanymyhỹre, arabedeerynymyhỹre. Jiarỹle ani ranihikỹdỹỹkremy, bede iny mahãduwedu wityhy iweserenymy arasỹnykre Jiarỹ. ⁹ Isaeli wamahãdu-ò suu retaremy jiarỹ tai sỹmy arasỹnyre, Isaeli mahãdu iòludureny-ribi brebu-di aõkõkemy tai arasỹnyrenyremy. ¹⁰ Iwese juhuu iòludureny-ribi brebudihyymy roirenyre wese ixãwikre. Kasu rirònyrenyreu heka iòludureny itxi reareny heka wiji heka ixãwike, iòludureny taireny ariteónykremy. Ibutu aòludureny ribi ibutumy ariteònykremy, tule ariòkorereny ariwahinykremy, warybemy retidira jiarỹ. ¹¹ Kai burukreu heka, amahãdureny bire-ki aratuunyrenykreu heka ariòrele iòlòmy arisỹnykremy iòlònamy heka idi rarurudỹỹnykremy. ¹² Ariòrele heka waheto wadee riwinykremy, ariòkore riòkorereny iòlònareny tuhyymy roiremyhỹ. ¹³ Jiarỹle tybymy ararekre, wariòremy rarekremy. Iribi aluunamy tiu aritaõtyhy. Iwese Saú iòlòmy juhuu rewinyre iwesemy. ¹⁴ Isaeli mahãdu wedumy Jiarỹ arisỹnykremy, waiòlòna wedumy tuuhymy arisỹnykremy. Iriokòre riokòrereny tiu itueõtyhy.” ¹⁵ Iribi tahe Davi-ò Natã rarybere ibutu Deuxu tamy rarybere wesemy. ¹⁶ Tai heka Davi Deuxu tyky heto-ò ralore idi reixitòenyre Deuxu-ò:_Waha Deuxu ibutu wihikỹ wadee juhu wadee tewinyte iòraru-ki heka sõwemy umy reàlàmyhỹre heka jiarỹ heka aõ aõkõ jiarỹ rare wadi maruxetòenykemy, wasỹ mahãdu tule aõ aõkõ heka rare maruxetóenykemy. ¹⁷ Nihiỹmy heka wadee tewahinyte ihỹre ijõmy tarybete wariokòre riokòreny-ò deysanamy biwahinykremy tarybemahãte. Waha Deuxu, kai Deuxu Tyhyhykỹ hãbu wihikỹtyhymy wamy tarybemahãte. ¹⁸ Timybo heka adeehe ararybekremy. Uri adeòduõ jiarỹ rare tiwaerytyhymahãte ihỹre heka awityhymy tiwasỹnymyhỹte, ¹⁹ Kia wadee tewinyte adewimy heka deysanatyhymy wabededỹỹnanamy rarekremy. ²⁰ Waha Deuxu awese heka tiu ijõõre; Kai sohojihyyle Deuxu tate reerywahỹrenyre. ²¹ Isaeli amahãdureny heka rare, bede mahãdu-ki hekatai ijõõre Isaeli mahãdu wesemy, kaile tetate amahãdurenymy ratxikemy. Isaeli mahãdu-ò aõnawiwihikỹ tewinyte heka animy ranihiỹdỹỹnyre bede bede-ò. Ejitu-ribi amahãdureny terehedỹỹnyte, bede mahãdu teteòte iribireny tai Isaeli mahãdu ranihiỹdỹỹnymyhỹreu heka bede mahãdu teteònymahãte. ²² Tai heka Isaeli mahãdu-ò tewinyte amahãdurenymy tiemy rỹtyhyrenykremy, kai Deuxu iDeuxurenymy delemy tate. ²³ Wiji tahe, wanyrỹ Deuxu, inatyhymy aõma tiiemy ryberatyre òlòõkremy tuu rarybere-ki wahe riwinykremy. ²⁴ Ahe ludu heka nihiỹkremy tiiemy tahe iny mahãdu rarybekre: Deuxu heka ibutu ratyre rurudu nihiỹ rare. Kaa Deuxu Isaeli mahãdu kai tuu tarybete tikiemy rỹirakemy iòlòmy wariokore riokore mahãdu hyy. ²⁵ Waha Deuxu jiarỹhe waberebuteremy adee ararybekremy areixitòenykemy juhu wadee tiiemy tarybete aõ rỹimyhỹkremy wariokore riokore hyy iòlòmy. ²⁶ WaDeuxu, Deuxu Tyhyhykỹ tate wadee rybewimy tarybete, ²⁷ wariokore riokoremy biwiòhenanykremy iòlòmy hyy. Waha Deuxu wariokore riokore tewiòhenamahãte tahe adee areixitòenykre tiiboho adeysana-di rỹihyyrakemy.