¹ Riwyrenyre heka Deuxu òwòruwodỹỹ tỹrỹrỹhỹkỹ Deuxu tyy heto-ò kia heto Davi Deuxu-ò riywinyre taile ritidirenyre òwòruwodỹỹ tỹrỹrỹhỹkỹ (Arka). Deuxu-ò xiwenamy riwahinyrenyre, xiwenamy òbitimy riwosinyrenyre, ywina xiwenamy riwahinyrenyre. ² Xiwena riwahinyrenyre rahudi heka Davi Deuxunimy rarybere deysanamy riwahinyre ibutu Isaeli mahãdu-ò. ³ Idi heka rỹsỹna rỹsỹnamy riwahi riwahinyre ibutu Isaeli mahãdu-ò. Hãbu sohoji sohoji-ò paõ riwahinyre, hawyy sohoji sohoji-ò paõ riwahinyre, aõde òbiumy ere eremy riwahinyre uvaõ tule. ⁴ Levi mahãduõ tule Davi ritare Isaeli Deuxumy reàlàrenykremy Deuxu òwòruwodỹỹ tỹrỹrỹhỹkỹ koki levi mahãduõ rawiunyrenykremy, Deuxu-ò reàlárenykremy. ⁵ Levi mahãdu wedumy Asabé ritidire, Sakariasí iwohedỹỹdumy ritidire. Toado mahãdu tahe taviolaõ wesemy, tatoanarenydi heka: Jeielí, Semiramoté, Jeielí, Matxitxiasí, Eliabé, Benaiasí, Obede-Edõ, Jeieli ijõ. Asabé iwedureny tule tatoanadi rotoakremy, ⁶ Juròna tule rijurònyrenykremy txuõtxuõlemyheka xiwena wahidỹỹdu mahãduõ Benaiasí, Jaasieli deuxu òwòruwodỹỹ tỹrỹrỹhỹkỹ koki rijurònyrenykremy. ⁷ Kia txuu heka Deuxumy reàlàrenykremy Asabé, Levi mahãdumy, Davi risỹnyre tiibohole kia juhuule. ⁸ “Deuxumy beàlàmyhỹbenyke, inimy marybemyhỹbenyke, ibutu iny mahãdu-ò Deuxu iaõwidỹỹna wiwihikỹmy belyymyhỹbenyke. ⁹ Deuxu-ò mawiunymyhỹbenyke tamy beàlàmyhỹbenyke, Deuxu iaõwidỹỹna wiwihikỹmy belyymyhỹbenyke ¹⁰ Deuxunimy beysamyhỹbenyke taõwidỹỹna wiwihikỹmy, tiemy dori ibutumy deàlànadỹỹdu mahãdu iworenyki ibedeysamy rỹimyhỹre. ¹¹ Deuxu iwòhedỹỹnamy biòrymyhỹbenyke, irurunamy biòrymyhỹbenyke; tii-wana matximyhỹbenyke tiemy. ¹² Kaiboho heka Abraão, Deuxu deòdu, riòre riòremy toite, Jakò, Deuxu ritare, heka iriòre riòremy toite, itxi õhõtireny beamyhỹbenyke, ¹³ ibutu Deuxu riwinymyhỹre õhõti itxi beamyhỹbenyke, iaõwidỹỹna wiwihikỹmy, iny masajua nihikỹmy ôhõtireny beamyhỹbenyke, iny òludu mahãdureny ywisidỹỹna-ò risỹnyre õhõtireny beamyhỹbenyke. ¹⁴ Inynyrỹ Deuxu, iny Deuxureny heka; ibede ywina heka ibutu bede bede mahãdu-ò rare. ¹⁵ Tii heka inydeereny riywinyre heka tiemy inyherenykile wahe. Inydeereny narybede heka tiemy kidiwahinyke iny riòre riòremy. ¹⁶ Iwese Abraaõ-wana tuu riwinyre wesemy wahe, kia tahe iyrybule Isaki-wana tuu riwinyre. ¹⁷ Ibutumy Abraão-wana riywinyre tule Jakò-wana iyrybule Deuxu riywinyre òbitityhymy, tuhyymy. ¹⁸ Iu heka Deuxu rarybere:_Jiarỹ kanaãsu ariwahinykre, kai biwedunykre asureny tuhyymy. ¹⁹ Juhu aõni ibuteremy toimyhỹtenyte iwitxirasu ludumy toitenyte heka tai iwedurenydimy kiasu ludumy wahe. ²⁰ Tai urile teriranymy toitemyhỹ, hãwãdu hãwãdu mahãdu-di, iòlò iòlò mahãdu-di. ²¹ Deuxu heka iny mahãdu-ò riwahinyõhyyre inyõ ibinamy idireny ratxiheny lau, Kia ilaureny heny heka iòlò mahãdu-ò riteòarinyre. ²² Tii rarybere:_Uritere waijoi mahãdu-ò itxi ibinamy idi norenyõmy Jiarỹ dori retarenyre warybemy wahidỹỹdu mahãdu-di wahe. ²³ Bede bede mahãdu ibutumy InyDeuxureny-ò, Wanyrỹny-ò wiu tỹmyramy mawiunymyhỹbenyke. Tii wahedỹỹdurenytyhy rare kiamy belyymyhỹbenyke txuõtxuõlemy tuhyymy. ²⁴ Deuxu wowydyny bede bede mahãdu-ò belyymyhỹbenyke, Deuxu iaõwidỹỹna wiwihikỹmy hãwã hãwã mahãdu sõwe sõwe-ò belyymyhỹbenyke. ²⁵ WaDeuxureny kai heka nihiỹtyhy tate, tii awityhymy iny rahamyhỹrenyre rikiwowydynymyhỹrenyke! Deuxu sohojile heka iykarana brebuna, rurudutyhyhykỹ ixidi ratximyhỹre bede mahãdu suritxoko ribi. ²⁶ Bede bede mahãdu isuritxokoreny urile suritxokomy heka rỹimyhỹre Deuxu tahe tiiemy dori ibutuwidỹỹdutyhy bedewidỹỹdu biuwetyy wana. ²⁷ Tii tiiemy dori ibutumy aõnaõnawiwi rurunatyhy, wihikỹtyhy dori tamy ratximyhỹ. ²⁸ Ibutu bede mahãdu Deuxu-ò beàlàmyhỹbenyke, iloosòna-di iruruna- di beàlàmyhỹbenyke. ²⁹ Tii sohojihyyle rurudutyhyhykỹ òbitityhyhykỹ ixidi ratximyhỹre tamy beàlàmyhỹbenyke, Deuxu-ò bexiwahinymyhỹbenyke, Deuxu-ò bexiwelòrònymyhỹbenyke, tamy-ò bexiòhòdỹỹnymyhỹbenyke, ikoki tatiwomy matximyhỹbenyke. ³⁰ Su ibutumy Deuxu lau ruberumy ramytatamyhỹre. Su awityhymy rỹimyhỹre tiu reseõtyhy. ³¹ Bede mahãdu beysabenymyhỹbenyke, ibutu hãwã hãwãmy irybewiwi biuberanymyhỹbenyke: “Deuxu kai heka su iòlò tate” ³² Suu, iny boho beysake, berohokỹ wodỹỹmy beysake, bera iròdu boho, bederahy iròdu boho, ibutumy su-ki rỹimyhỹre heka abedeysareny wodỹỹ nihiỹmy tarurumy biiteysanybenyke. ³³ Tai bederade boho kedeysarenykre Deuxu-koki inynyrỹreny, tii kanake bede mahãdu-ò iòlòmy ratxikemy. ³⁴ Deuxumy beàlàmyhỹbenyke tii awityhy heka rare, iluuna itueõtyhy. ³⁵ Tamy marybebenyke:_Waha, kai waDeuxureny atximahãte. Iny tarasadu tate taheka biwahedỹỹnyrenyke. suritxoko deàlànadu mahãdu ribi biwatarenyke adee tai tahe jiarỹ boho sõwemy umy areàlàrenyke, aki awityhymy araharenyke Deuxu, waworeny ribi inatyhymy areàlàrenyke, Deuxu òbitiduhukỹ. ³⁶ Deuxumy rekeàlàrenykre, Isaeli Deuxu. Deuxumy beàlàmyhỹbenyke wiji tiiemy. Tai isaeli mahãdu myy rarybere: “Kiamẽ” idi Deuxu-ò reàlàrenyre, Deuxu Tyhyhykỹ wahe.” ³⁷ Idi heka Deuxu tyky hetowo-ki tai rỹyire kia Deuxu òwòruwodỹỹ tỹrỹrỹhỹkỹ, Asabé Levi mahãdu wana Davi risỹnyre tai idi raõmysỹdỹỹnykremy, taile Deuxu-ò deàlàna riwahinyrenykremy tiiemy. Txuõtxuõlemy tii boho heka òbitimy taile idi raõmysỹdỹỹnykemy. ³⁸ Tulesỹ Deuxu tyky hetomy idi raõmysỹdỹỹrenykremy; Obedé, Edõ, Jedutuữ sỹmahãdurenyyki ribi heka 68 hãbu mahãdu wana raõmysỹdỹỹrenykre. Hosá, Obedé-Edõ wana ijòtòbònareny idi itxeredurenykremy risỹnyre. ³⁹ Juhu Jibeaõsu-ki deàlànamy roiremyhỹ Sadoki xiwena wahidỹỹdu iaõmysỹdỹỹdu biòwa mahãdureny wana Deuxu tyky heto-ki deàlàdỹỹna wedumy roire. Tahe taile deàlàna wedumy roikremy risỹnyre. ⁴⁰ Txuõtxuõlemy rudimy, txioromy taile xiwena tyre-ki xiwenamy riwahinyrenykremy, kia xiwenamy riwosinytyhykremy iwese bede ywina tyyritimy roire Isaeli mahãdu-ò Deuxu riwahinyre iwesemy. ⁴¹ Tule roimyhỹre wiumy rawiunyrenykremy Emã, Jedutuữ, ijõ wiudu mahãdu tule ritarenyre Deuxu-ò reàlàrenykremy iluuna dori tuhyymy ratximyhỹremy. ⁴² Emã, Jedutuữ tule womati sõwe idi raõmysỹdỹỹrenykremy, Juròna, womati besemy, itoanarenymy kia idi rotoanyrenykremy, tule wydydumy roimyhỹkremy. Emã, Jetuduữ sỹ mahãdu heka ijòtòbòna boho idi itxeredumy roimyhỹrenyre. ⁴³ Tii boho tasỹmahãdu-ò roirenyre, Davi tule tasỹmahãdu-ò roirenyre tamahãdu wana idi ratxikremy.