¹ Davi taheto riwinyre tahãwãki-le idi heka Deuxu òwòruwodỹỹ tỹrỹrỹhỹkỹ tyky heto riywinyre irahudi heka ² tii rarybere: _ Levi mahãdu sohojihyyle heka Deuxu òwòruwodỹỹ tỹrỹrỹhỹkỹ kidiwydenyde ka-ò Deuxule heka tii boho risỹnyrenyre iwydydurenymy tuhyymy. ³ Tai tahe Isaeli mahãdu Jerusalẽ-ki Davi ributunyre Deuxu òwòruwodỹỹ tỹrỹrỹhỹkỹ kia tyky heto-ò kidiwykemy. Kiamy tyky heto tii riwinyre dori. ⁴ Idi heka Araõ riokòre riòrerenymy, iòrysymy riteònyre, Levi mahãdureny tule riòryrenymy riteònyre. ⁵ Koaté, mahãdureny heka dirahudenyde iwedureny Urieli, iijoireny 120my hãbu sõwe. ⁶ Merari, mahãdureny heka dirahudenyde iwedumy Asariá, iijoireny 220my hãbu sõwe. ⁷ Jesõ, mahãdureny heka dirahudenyde iwedumy Joeli, ijoireny 130my hãbu sõwe. ⁸ Elisabá, mahãdureny heka dirahudenyde iwedumy Semaiasí, iijoireny 80my hãbu sõwe. ⁹ Heborõ, mahãdureny heka dirahudenyde iwedumy Elieli, iijoireny 200my hãbu sõwe. ¹⁰ Usieli, mahãdureny heka dirahudenyde iwedumy Aminadabi, iijoireny 112my hãbu sõwe. ¹¹ Tulesỹ xiwena wahidỹỹdu Davi riteòarinyre; Sadoké, Abiatá wana. Levi mahãdu: Urieli, Asaiasí, Joeli, Semaiasí, Elieli, Aminadabé. ¹² Levi mahãdu-ò Davi rarybere:_Kai boho Levi mahãdu wedumy toite. Bexilyranybenyke, aseriòrereny mahãdu-ò marybebenykre tiiboho rexilyranyrenykremy, Isaeli Deuxu, iòwòruwodỹỹ tỹrỹrỹhỹkỹ kidiwydenydeke ka tyky heto-ò reywinyre tamy. ¹³ Kai boho Juhuu aõkõ Deuxu iòwòruwodỹỹ tỹrỹrỹhỹkỹ tewytenyte ka-ò tai dori aõhõkỹmy Deuxu inydeereny risỹnyre tamy raryberenyõre timybo òbitimy tamywimy ariwyrenykemy ka-ó. Tamy rỹỹraxiõrenyre dori. ¹⁴ Kia òraruki dori xiwena wahidỹỹdu mahãdu, levi mahãdu heka rexiywinyrenyre, rexilyranyrenyre Isaeli Deuxu òwòruwodỹỹ tỹrỹrỹhỹkỹ riwyrenykremy. ¹⁵ Tai tahe iwesele Moisesi-ò Deuxu rarybere wesemy Levi mahãdu òwòrudi taaxiòrenydi riwyrenyre. ¹⁶ Levi wedu mahãdu-ò Davi riteònyre rawiunyrenykremy rotoanyrenykremy taviolaõreny wesemy idi rotoanyrenykre reysarenykremy tatoanareny-di. ¹⁷ Tai dori Joeli riòremy, Hemã Levita mahãdu ritarenyre, Asabé, Berekia riòremy ijõ ritarenyre tii Hemã mahãdu rare; ijõ ritarenyre Etã, Kuxaiá riòremy Merari mahãdumy. ¹⁸ Imahãdureny ribi tule ritarenyre: Sakariasi, Jaasieli, Semiramoté, Jeieli, Uni, Eliabé, Benaiá, Maaseiasí, Matxitxiasí, Elibeleú, Mikineiasí, Obede-Edõ, Jeielimy, tiiboho ijòtòbònadi itxeredumy risỹnyrenyre. ¹⁹ Wiudu mahãdumy ritarenyre Hemã, Asabé, tiiboho womati toadỹdumy borõzidimy rotoarenykremy. ²⁰ Sakariasí, Asieli, Semiramoté, Jeieli, Uni, Eliabé, Maaseiasí e Benaiá rotoanyrenykremy tatoanarenydi, tule wiwana rawiunyrenykremy. ²¹ Matxitxiasí, Elibeleú, Mikineiasí, Asasiasí, tiiboho toado mahãdumy itoanareny iratyremy iteremy wiumy rotoarenykremy. Obede-Edõ, Jeieli, Deuxu tyky hetodi itxeredumy ritarenyre tule. ²² Levi mahãdu wedumy heka Kenaniasí rare, tii wiuna sõwe kerydumy rare tai dori wiudu mahãdu-ò, rotoadỹỹdu mahãdu-ò iwedurenymy risỹnynyrenyre. ²³ Bereiasí, Eukaná, Obede-Edõ, Jeiaisí, ritarenyre heka Deuxu òwòruwodỹỹ tỹrỹrỹhỹkỹdi itxeredumy. ²⁴ Taheka xiwena wahidỹỹdu mahãdu heka ritarenyre Sebaniasí, Josabá, Netaneú, Amasaí, Sakariasí, Benaíasí, Eliesé. Tiiboho heka Deuxu òwòruwodỹỹ tỹrỹrỹhỹkỹ koki rijurònyrenykremy. ²⁵ Tai tahe Davi, Isaeli wedu mahãdu, sodadu wedu mahãdu-wana Obedé-Edõ heto-ò roirenyre Deuxu òwòruwodỹỹ tỹrỹrỹhỹkỹ òrysymy, worana bedehesi deysanmy rỹimy roiremyhỹ, deysana nihiỹmy idi riwyrenyre. ²⁶ Levi mahãdu heka Deuxu òwòruwodỹỹ tỹrỹrỹhỹkỹ idi riwymy roiremyhỹ, Deuxu idireny rare riwiòhenanyrenykremy tai dori debò inatxi reuròmy bororeni hãbumy xiwena-ò riwahinyrenyre, debò inatximy budoeni hãbumy xiwena-ò riwahinyrenyre. ²⁷ Iu heka Davi ityyurahakỹdile rỹimy raremyhỹ tule wiudu mahãdu heka ityyurahakỹdilemy rỹimy raremyhỹ. Kenaniasí iwedurenymy roire, levi mahãdu heka Deuxu òwòruwodỹỹ tỹrỹrỹỹhỹkỹ riwymy roiremyhỹ. ²⁸ Kia wese heka Isaeli mahãdu Jerusalẽ hãwã-ò roirenyre. Deysanmy rawiunymy roimy roiremyhỹ, jurònamy rotoanymy roiremyhỹ. Juròna heka budoeni hãbuò-di ijurònareny di ritxurònymy roirenyre, tatoanarenydi roimy roirenyre. ²⁹ Deuxu òwòruwodỹỹ tỹrỹrỹhỹkỹdi Jerusalẽ-ò rirònymy roirenyreu heka, Mikaú, Saú riòre hawyy, janela ribi retehere tii Ihãbumy robire Davi. Tii resemy roiremyhỹ, rexidy rexidymy deysanamy sõwere-ki. Mikaú Kia robireu tai heka ibinamy rahare, Davi riki tamy itxỹteremy roire, tai Davi Mikaú tawo-ki ribuare.