1 Iu heka Hiraõ Tiru hãwã iòlòmy Davi-ò riteònyre teòdureny Davi hetomy riwinyrenykremy, òwòruwidỹỹdu, hetowidỹỹdu mahãdu seduru òwòru sõwe riwyrenyre davi heto riwinyrenykremy. 2 Tai dori Davi rieryre Isaeli mahãdumy Deuxu luure-ki Deuxudewimy Isaeli mahãdu iòlòmy tii ralore kia Hirãõ aõ wihikỹ riwahinyre òraruki. 3 Jerusalẽ hãwã-ki Davi hawyy mahãdu iwitxiramy roire tai iriòrereny hawyymy, hãbumy reare. 4 Kaa Davi riòrereny Jerusalẽ-ki rearenyre myy: Samuá, Sobabé, Natã, Salomão, 5 Ibahi, Elisuá, Eubeleté, 6 Noká, Nebeké, Jabiá, 7 Elisamá, Beeliadá, Elibeleté. 8 Isaeli mahãdu Davi iòlòmy raloreu heka bilixiteu mahãdu rieryrenyreu heka Davi-ò rimykremy rirahurenyre. Kiamy Davi rierymy roireu heka itxireny reakremy rare. 9 Kia bilixiteu mahãdu hãbu rariehekỹsu-ò ritehemynyrenyreu iny mahãdu-ò itxi rearenyre, rawasinymy roirenyre kiamy ritelenyrenyre, 10 Iu heka Davi Deuxu-ó rỹỹraxire:_Waha Deuxu bilixiteu mahãdu-ò aõbo areakre. Biwawiòhenanykre aõbo. Deuxu rarybere:_ Maa! Arawiòhenanykre dori, botakemy. 11 Davi itxi reare heka Baali-Berasῖsu-ò, taile iribireny rotare. Tii rarybere: Biu bede ritỹmynymyhỹre wese, aõ reaty reatyre wese heka Deuxu riwawiòhenanyre, tii riwauhere iny òludu mahãdu sodadu-ò sõwe iòtenamy areakemy. Tai dori kiasu rininimy roire Baali-Berasῖ. 12 Bilixiteu mahãdu rihenyrenyreu heka isuritxooreny ririrenyre, tai dori Davi kia suritxooreny risõrenykremy riteònyre. 13 Idi ixybyle bilixiteu mahãdu rooserenyre Isaeli-ò itxirearenykremy. 14 Tai heka Deuxu-ò Davi ixityre reixitòenyre, Deuxu rarybere tamy: _Kaa su ribile aõkõ itxireny beake kowa idi mawerunyke amorá bederatyò-ribi make. 15 Biraokre tai. Iu hãbu mahãdu amora bederatyò ityre-ki ramysasamy roirenyre boholakeu tahe itxireny beake. Irirareny mysasamy boholakeu tahe Jiarỹle akorenymy arakemy bilixiteu mahãdu-ribi arotakemy. 16 Iwesele Deuxu rarybere heka Davi riwinyre, tai heka rururenydile iòludu mahãdureny risonymy idi roire Jibeaõsu-ribi Jesésu-ò. 17 Tai dori Davi rybeninamy raubỹtỹ raubỹtỹynyre ibutusu-ò, tai ibutu bede bede mahãdu Davi lau ruberurenykemy Deuxu riwinyre.