¹ Davi tasodadu mahãdu rybe-ò rare, 100 sodadu mahãdu wedu-ò rybemy rare tule 1000 sodadu mahãdu wedu-ò. ² Irahudi heka rarybere ibutu iny mahãdu-ò:_ Adeereny awire heka, inyDeuxureny dewimy tule, Isaeli iuhe mahãdu-ò kia rybemy ròhònykre, xiwena wahidỹỹdu mahãdu-ò, Levi mahãdu tahãwãreny-ò kia rybemy rakre, ixinamy tii boho kao iny wana rexibutunyrenykremy. ³ Kaki rikibutunyrenykremy heka òwòrywodỹỹ tỹrỹrỹỹhỹkỹ rikiòryrenykremy, juhu riki Saú iòlònamy heka rõhõtirusamy roire dori. ⁴ Tai Isaeli mahãdumy riteysarenyre kia rybe-di, awimy tai raharenyre. ⁵ idi heka Isaeli mahãdu Davi ributunyre, Ejitu iòhò ribi kia rasỹnymy roire mahãdumy, iraru rasỹnymy roire mahãdumy, Hamate su-ò raòwònyre mahãdu-ò. Tai dori òwòruwodỹỹ tỹrỹrỹỹhỹkỹ Kiraté-Jearῖ hãwã ribi Jerusalẽ hãwã-ò ridyrenykremy. ⁶ Tai Davi Isaeli mahãdu wana Kiraté Jearῖ-ò roirenyre, Baalá hãwã heka ini ijõ, Judásu-ki tai (arka) òwòruwodỹỹ tỹrỹrỹỹhỹkỹ rimyrenykremy, òwòruwodỹỹ tỹrỹrỹỹhỹkỹ heka iratyy tyre-ki Deuxu loòsònamy rỹimyhỹre Isaeli Deuxu Tyhyhykỹ ibutu ratyre biu-ki runymyhỹre tarynana-ki biu-ki ibutu ratyre ratyre-ki ỹju wedu dori. ⁷ Diwydenyde heka òwòruwodỹỹ tỹrỹrỹỹhỹkỹ bororeni inatximy itewe-di itỹmyramy ritusinymy diwydenyde heka Abinadabé heto-ribi; tahe Usá, Aiò wana wydydumy diwymydoide, ⁸ tai riki Davi Isaeli mahãdu wana resemy rỹimyhỹrenymy roiremyhỹ tarururenydi heka Deuxumy reàlàmy rỹimyhỹrenymy roiremyhỹ. Rawiunymy rỹimyhỹrenymy roiremyhỹ, rotoanymy rỹimyhỹrenymy roiremyhỹ, iviolaõrenydi wesemy, ijurònarenydi, itoanarenydi iwitxira iwitxiramy rỹimyhỹrenymy roiremyhỹ. ⁹ Kidõsu lòbòròna-ò ritehemynyrenyreu kia inatxi bororeni iwareny rytỹnymy roire (tropeçaram). Tai Usá tebòdi òwòruwodỹỹ tỹrỹrỹỹhỹkỹ rimyre reseke lau. ¹⁰ Rurure, Usá rurure aõwesele. Tii heka Deuxu riteburedỹỹnyre òwòruwodỹỹ tỹrỹrỹỹhỹkỹ Usá tebòdi rimyre dori, Deuxu rirubunyre. Taile Usá rurure aõweselemy Deuxu koki rurure. ¹¹ Davi sõwemy rabedewore, Deuxu iykanaradi Usá rirubunyra-ki; tai dori kiasu heka kia bedeu ribi wiji-ò raninimyhỹre Beresi-Usá. ¹² Idi heka Deuxu lau Davi ruberumy rỹire tai tii rarybere:_Timywexe òwòruwodỹỹ tỹrỹrỹỹhỹkỹ ariwykemyhe! ¹³ Tiu heka riwyõra dori, Uritere Davi òwòruwodỹỹ tỹrỹrỹỹhỹkỹ riwyõra tahãwã- ò. Ririre heka hãbuõ heto-ki Obedé-Edõ hãbuni heka rare. Kate hãwã sỹmahãdumy. ¹⁴ (Arca) òwòruwodỹỹ tỹrỹrỹỹhỹkỹ heka inataõ ahãdumy tai roimyhỹre, Deuxu heka deysana riwahinyre Obedé-Edõ-ò, isỹmahãdureny-ò riteysanyre, ibutu ihõrõ awimy Deuxu riwinyre tamy Deuxu idi riwiòhenanyre Obedé-Edõ-ò.