¹ Davi Sikalaké hãwã-ki rasỹnymyroire, iòlò laumy Saú laumy rahenyre Sikalaké hãwã-ò. Sodaduõ mahãdu tamy rare tii wana ratxirenykemy. Tii boho ruruterehekỹmy, habu ityhy mahãdureny kia sodadu mahãdu roire. ² Kia hãbu mahãdu heka Bejamῖ mahãdumy roire, Saú mahãduy-ki roirenyre. Tii boho heka tawyhyrenydi debò ruruwe ribi riwerenyre tule debò hywe ribi riwerenyre, mana debò ruruwe ribi idi rehurenyre, tule debò hywe ribi idi rehurenyre, mana-di riworiworinyrenyre debò ruruwe ribi idi rehurenyre, tule debò hywe ribi idi riworiworinyrenyre. ³ Aiesé, iwedureny rare, Joasi, Semaá riòremy, Jibeaté hãwã ludumy; Jesieli Pelete wana, Aximabeté riòrerenymy; Beraká Jeú wana, Anatote hãwã ludumy, ⁴ Iximaiasi, Jibeõ hãwã ludumy, Ijesudu ruruduhukỹ kia “30” hãbuõmy rare; Jeremiasi heka iwedureny rare, Jaasieli, Joanã, Josabadé, tii boho Kederaté hãwã ludumy, ⁵ Elusaí, Jeremote, Bealiasi, Semariasi, Sebatiasi, Harubé hãwã ludumy; ⁶ Koré mahãdu heka roiremy: Eukaná, Issiasi, Asareeli, Joesé, Jasobeaõ; ⁷ Joelá, Sebadiasi, Jeroaõ riòrerenymy, Jedò hãwã ludumy. ⁸ Kaa heka sodadu mahãdu ruruduhukỹmy roire. Tii boho awityhymy idi rarurunymyroiremyhỹ Davi sodadumy rexisỹnymyroiremyhỹ. Kadé mahãdumy roire, Davi-ò rexibutunymyroiremyhỹ manaterehekỹ woki iòlòreny rexiwomy roimyraremyhỹ Saú laumy. Kia sodadu mahãdu heka wyhy itxena-di ròrenykemy rierymyroire, tõnori-di ròrenykemy rierymyroire tule leaõ rebure wesemy roimyroire, ijiraterehekỹ budòe iròdu wesemy roimymyhỹre: ⁹ 1 Esehé, 2 Obadiasi, 3 Eliabé, ¹⁰ 4 Miximaná, 5 Jeremiasi, ¹¹ 6 Atai, 7 Elieli, ¹² 8 Joanã, 9 Eusabadé, ¹³ 10 Jeremiasi, 11 Makibanaí ¹⁴ Kaa hãbu mahãdu ibutumy Kadé sỹmahãdumy roiremyhỹ ibutumy sodadu mahãdu wedumy roire. Ijõ 100 sodadu mahãdu wedumy, ijõ tahe 1.000 sodadu mahãdu wedumy. ¹⁵ Johodaõ bero rariamyroireu heka Kaa hãbu mahãdu reuròrenyre tahe ibutusỹdu mahãdu tasureny ribi riteònyrenyre, burura ribi, ibòò ribi, iraru ribi, bede-ò ribi riteòriteònyrenyre. ¹⁶ Davi manaterehekỹ woki roimyhỹreu heka Bejamῖ hãbu mahãdu heka, Judá hãbu mahãdu heka Davi-ò roirenyre. ¹⁷ Davi manaterehekỹ ribi rohònyre tamyreny-ò rare tii rarybere:_ Wabiòwamy toimahãtenyte-ki wabiòwa wesemy araòbynyrenykre. Tahe watyhedỹỹmy toitenyteri-ki waòludu mahãdu-ò biwadybenykemy tiwaòrytenyteri-ki tahe iny labiereny Deuxu heka rierymyhỹre heka araòwynyrenykre dori. Aõbina rewinyõre jiarỹ duny! ¹⁸ Iu heka aõwesele Deuxu Tyytybytyhy wihikỹ heka Amasaí idi riuhere rarybekremy, tii rybe teremy rarybere myy:_Davi, Jesè riòremy, amahãdurenymy jiarỹ boho ratxiwahỹrenyre! Deysanamy adee kanake! Inyõ ibutumy awanareny roireri heka deysanamy kanake! Deuxu awana ratximyhỹre dori! Tai Davi iruramy idi risỹnyrenyre tasodadurenymy ratxirenykremy reuròrenyre wahe. Amasaí, heka kia hãbu mahãdu “30”my raninirenyre heka Amasaí iwedurenymy ralòre tiiboho wedumy. ¹⁹ Bilixiteu mahãdu wana Davi Saú-ò itxi reakremy ramyhỹreu heka Manasesi sỹdu mahãdu, hãbu mahãdu Davi-ò roirenyre wiòhedỹỹmy. Tahe inatyhymy aõkõ Bilixiteu `mahãdu Davi riwiòhenanykemy alòre-ki. Sikalaké mahãdu wedu heka Davi-ò rarybere roosekremy tii boho Davi-di rõhõtinyrenyre Bilixiteu mahãdu rityherenyke Saú-ò ridyrenykemy lau. ²⁰ Kaa heka Manasesi sỹmahãdu Davi-ò reuròrenyre: Ajiná, Josabadé, Jejiaeli, Mikaeli, Josabadé, Eliú, Siletaí. Tii boho heka ibutumy 1000 sodaduwedumy roiremyhỹ isureny-ki juhuu. ²¹ Tii boho Davi sodadurenymy ralòrenyre inytyhymy heka roiremyhỹ. Idi tahe Isaeli mahãdu sodadureny wedumy ralòrenyre. ²² Txuõ txuõlemy heka hãbu hãbu mahãdu Davi-ò rare rexiwahinykemy wiòhedỹỹmy tai dori aõwesele heka Davi mahãdu rasõwerenyre isodadureny-ò rexibutunyrenymy roiremyhỹ. ²³ Davi Heborõsu-ki rareu heka sodadu wihikỹtyhy tamy rexibutunyreny riwiòhenanykremy Saul deròwymy iiòlòrenymy ralòkremy idi riwisỹnymy roiremyhỹre, iwese Dexu rarybere wesemy. Kaa heka inirenymy sõwerenymy roire: ²⁴ Judá mahãdumy: 6.800 hãbu sõwe debònareny-di awityhymy, wyhy itxenawi, tõnoriwi tule. ²⁵ Simeão mahãdumy: 7.600 hãbu sõwe ibutu aõkerudumy. ²⁶ Levi mahãdumy: 4.600 hãbu sõwe. ²⁷ Joiada taheludu mahãdu sõwe, Araõ riòkore riòkoremy: 3.700 hãbu sõwe, ²⁸ Sadoké, wekyrybò bedeerydumy ityhyre, tii nade 22 hãbu ityhyre sõwe wana nade. ²⁹ Bejamῖ, Saú mahãdumy: 3.000 hãbu sõwe, ibutere heka kia mahãdu, tii boho heka Saú riheludunymy roiremyhỹ dori. ³⁰ Ebaraῖ mahãdumy: 20.800 hãbu sõwe, kia hãbu mahãdu iruruterehekỹre dori, awityhymy isỹ mahãdurenymy roiremyhỹ. ³¹ Manasesi be-òsu ribi mahãdumy: 18.000 hãbu sõwe ritarenyre Davi iòlòrenymy risỹnyrenykremy. ³² Isaká mahãdumy: 200 hãbu sõwe rieryrenyre timybo riwinyrenykremy Davi Saú deròwymy risỹnyrenykremy. Tii boho tamahãdureny wedu wihikỹmy roirenyre. ³³ Sebulõ mahãdumy: 50.000 hãbu sõwe, ityhyrenyre, inatyhynamy ruruduhukỹrenyre, ibutu aõkery. Debòna ibutu kerydumy roirenyre dori. ³⁴ Naftali mahãdumy: 1000 hãbu sõwe tii boho wedu mahãdumy, tii boho wana 37.000 hãbu sõwe mahãdu heka tatebònareny-di heka; tawyhy itxenareny-di, tatõnorireny-di. ³⁵ Dã mahãdumy: 28.600 hãbu alòre erydumy mahãdu sõwe. ³⁶ Asehé mahãdumy: 40.000 hãbu alòre erydumy mahãdu sõwe. ³⁷ Kia Johodaõ berò ribi bede-ò Hubeῖ mahãdumy, Kadé mahãdu, Manasesi mahãdu heka 120.000 hãbu sõwemy tahe tii boho ibutumy debònaõ erydumy roire. ³⁸ Kaa hãbu mahãdu ibutumy Heborõsu-ò roirenyre Isaeli iòlòmy Davi risỹnyrenykremy. Ijõ Isaeli iuhe mahãdu tule idi riwisỹnymy roiremyhỹ. ³⁹ Kia hãbu mahãdu heka Davi wana inataõ txumy taile runymyroirenyre taseriòrereny mahãdu wana riõmy roiremyhỹre, riroximy roimyhỹre. Iseriòrereny Isaeli mahãdu idi riòwenymy roimyhỹre dori. ⁴⁰ Tulesỹ irehe ribile diradudenyde heka Isaká mahãdumy, Sebulõ mahãdumy, Nabitali mahãdumy, ibòò ribile dirahudenyde heka, diwymy doidenyde heka ijumetureny ijyytaká sõwemy hãbu mahãdu diwymy doidenyde; ikamelureny ijyytaká sõwemy, imuláreny ijykytaká sõwemy, ibororenireny sõwemy ijykytaká sõwemy rasỹna-di dirahumy doidenyde heka: ỹnyde-di, tiriku-di, bederaty-di figo, uva, vῖῖ sõwe, adỹỹ sõwe-di dirahumy doidenyde. Tulesỹ bororenimy, budoinimy didymy doidenyde heka taile rirubunyrenykremy awimy reysakremy isuureny-ki. Tai heka ibutumy reysarenykremy isureny-kile.