¹ Idi tahe Isaeli mahãdu Eborõ hãwã-ò roirenyre Davi-ò, tai raryberenyre:_ Davi Iny boho heka amahãdureny heka roire Wawedureny, waiòlòrenymy tate. ² Juhu heka waiòlòreny Saúmy rare iu heka Isaeli mahãdu alòremy roiremy heka kai iny alòre-ki wedumy tate. Deuxu Tyhyhykỹle rarybere kai Imahãdureny wedumy matxikemy, Isaeli mahãdumy biwiòhenanykemy, Deuxu aDeuxumy heka rare. ³ Tai heka Isaeli wedu mahãdu ibutumy Heborõ hãwã-ò roirenyre Davi rybemy. Davi tii boho wana ritobinyre inatyhyna rybemy, tai tii boho Davi rati-tyre-ò adỹỹ ritxiwirenyre (kia wesemy heka iòlò mahãdumy ritarenyre) tai Davi iòlòrenymy ralore, iwese juhuu Deuxu tarybedumy Samuel riuhere Davi rybe-ò riteònyre iòlòmy risỹnykremy. ⁴ Idi heka Davi Isaeli mahãdu wana Jerusalẽ hãwã-ò itxi rearenyre. Kia bedeu heka Jerusalẽ hãwã Jebusi inimy rare. Tai heka Jebusesi mahãdu heka rasỹnymy roiremyhỹ. ⁵ Jebusesi mahãdu heka Davi-ò raryberenyre tiu riki ihãwãreny ralòõtyhy, ihỹre tii heka Siaõ hãwã uhuari terehekỹ-ò itxi reare kia ihãwã heka ritare tahãwãmy rininire, Davi hãwãmy. ⁶ Davi rarybere myy:_Jebusesi inyõ rirubunykeki heka sodadu wedumy ralokre. Tai heka Seruiá riòremy Joabé sodadu wedumy ralore tii heka hãbu Jebusesiõ rirubunyre. ⁷ Tai heka hãwã uhuari terehekỹ-kile Davi rasỹnyre, tai rininira Davi hãwã-ki wahe. ⁸ Davi kia hãwã ixityre heka riywinyre Siaõ hãwãlò iòhòmy rỹire kia hãwã, Joabe tahe kia hãwã iuhemy riwinyre. ⁹ Davi heka idi rurunamy rỹimyhỹre Deuxu tii wana rare-ki wahe. ¹⁰ Kaa heka Davi isodadureny ruruduhukỹ wihikỹmy inireny riòtenymy rỹire tule Isaeli sodadu mahãdu Davi idi rarurunyrenyre iiòlòrenymy rohonykremy iwesele Deuxu rarybere wesemy, tai Davi òlòna idi rarurunyrenyre, Deuxu rarybere wese. Davi isodadureny ruruduhukỹ wihikỹmy inirenymy: ¹¹ Juhu Jasobeaõ, Hakimoni mahãdu. Jasobeaõ heka inatxi iny wanamy ributunyre tai heka “Inataõmy” rininirenymyroire. Jasobeaõ heka tatõnori-di 300 hãbu sõwe wana ròrenyre, idi rirubunyrenyre kia sohojile itxireny reare dori. ¹² Iribi tahe iny “Inataõ,” Eleasá Dodô riòremy Aoí sỹmahãdumy. ¹³ Eleasá tahe bilixiteu mahãdu-ò itxi reare Davi wana Basadamῖsu-ki. Sebada lòbòrònasu-ki ròrenyrenyreu heka Isaeli mahãdu rahenyrenyre. ¹⁴ Ihỹre heka Eleasá tasodadureny wana heka idi ròrenymyroiremyhỹ tai ròtarenyre Deuxudewimy, Deuxu ruru-di. ¹⁵ Imy txumy tahe kia iny “Inataõ” hãbuõ sohoji ribi manaterehekỹ-o rare Adulã manaterehekỹ, Davi manaterehekỹ iwo roireu tahe bilixiteu mahãdu hãbu rarie mahãdusu-ki iòhòmy roire. ¹⁶ Iu heka bilixiteu mahãdu Belẽ hãwãmy rahaananyrenyre Davi heka rexiwomy rỹimyroiremyhỹu ¹⁷ Davi rarybere:_Aõherewe! Jiarỹ, Belẽ hãwã ijòtòbòna iòhòmy kia hãloobe iribi ariõkemyra! Inyõ wadee kidiõkemyra inyhe! ¹⁸ Tai heka kia iny “Inataõ” heka bilixiteu mahãdu hetoreny iòhòmy rariarenyre, hãloobe ribi riryryrenyre idi Davi-ò rimonykemy. Ihỹre heka Davi tiu riõõtyhy tii heka kiabemy ritxiwire Deuxu-ò xiwena wesenamy. ¹⁹ Iribi heka Davi Deuxu-ó rarybere: Waha Deuxu, kabemy tiu ariõõtyhy! Kaa heka wasodadu mahãdu bemy iòrysymy rirahurenyre warybe òraruki tai ariõkeki tahe iwese ihãlubureny ariõkemy iõhãrunareny-di kabe diwydenyde wadee. Tai dori Davi kiabemy tiu riõõtyhy. Iribi heka kia iny “Inataõmy” ijyymy ròhònyrenyrenymy. ²⁰ Joabé seriòre seriòre heka Abisaí rare, tii heka 30 sodadu mahãdu ruruduhukỹ wihikỹ wedumy rare. Tii heka 300 hãbu mahãdu-ò itxi reare tatõnoridi heka ibutumy rirubunyre, tai “30 sodadumy” ribi heka tii ruruduhukỹ relera. ²¹ Tai heka Abisai “30 sodadu” mahãdu ribi ruruduhukỹ ratyremy relera. Ihỹre heka kia hãbu “Inataõ” Davi bemy riòryrenyre iratyre aõkõmy rare. ²² Benaiasi, Jeoiada riòre Kabiseeu hãwã ludu, Tii heka sodadu ruruterehekỹ wihikỹtyhyre tai dori sõwemy umy raryberenyremy ruruterehekỹre-ki. Sodadu ruruduhukỹ Moabe ludu inatximy tii rirubunyre. Tule ijõ, hãloo-txi leaõ resereu Benaiasi taile rirubunyre. ²³ Ijõ hãbu tahe tõnõri iutxiehekỹ-di Benasi-ò itxi reare, kia hãbu heka nihikỹtyhyre 2,20 urihixina-di irariehekỹ tii rare, Ejitu ludumy rare taheka Benasi tadebòna nihiỹ-di tamy reare, hãbu tõnori iribi rimyre taita kia tõnori-dile rirubunyre. ²⁴ Kia heka Benaiasi wihikỹ ijyy rare kia riwinyre, tii heka “30” inyõ ludumy rare. ²⁵ Tii heka wihikỹmy riwinyre ihỹre heka Davi sodadu “Inataõ” ratyreke aõkõ rare. Tai Davi hãbu mahãdu rurudỹỹnamy risỹnyre, Benaiasi wahe. ²⁶ Kaa Davi sodadu wihikỹ mahãdu iuhemy: Asaeli, Joabé seriòremy, Elanã Dodô riòremy, Belẽ hãwã ludumy. ²⁷ Samotxi, Harodé hãwã ludumy; Heresi, Belete hãwã ludumy; ²⁸ Ira, Ikesi riòremy, tekoa hãwã ludumy; Abiesé, Anatote hãwã ludumy; ²⁹ Sibekaí, Husa hãwã ludumy; Ilai, Aoí hãwã ludumy; ³⁰ Netobá hãwã ludumy Helede, Baaná riòremy, Maaraí; ³¹ Itai, Hibai riòremy, Jibeá hãwã ludumy, Bejamῖ mahãdu ludumy; Benaíasi, Biratõ hãwã ludumy; ³² Huraí, Kaasísu ludumy; Abieli, Arbá hãwã ludumy; ³³ Aximabeté, Baaruu hãwã ludumy; Eliabé, Saalibõ hãwã ludumy; ³⁴ Haseí, Jisõ hãwã ludumy; Jonatasi, Sajé riòremy Hará hãwã ludumy, ³⁵ Aião, Sakà rióremy, Hará hãwã ludumy; Elifali, Uhu riòremy; ³⁶ Hebehi, Mekerá hãwã ludumy; Aiasi, Belõ hãwã ludumy; ³⁷ Hexirà, Kahamelo hãwã ludumy; Naaraí, Exibaí riòremy; ³⁸ Joeli, Natã seriòremy; Mibá, Hakirí riòremy; ³⁹ Seleké, Amõsu ludumy; Naaraí, Beeroté hãwã ludumy, tii Joabé deboná sõwe wydydumy rare; ⁴⁰ Irá, Karebé wana, Jatxi hãwã ludumy roirenyre; ⁴¹ Uriasí, heteu mahãduõ; Sabadé, Alaí riòremy; ⁴² Ãdiná, Sisá riòremy, Hubeí mahãdu wedumy, (tii ijoireny heka 30 sodadu sõwemy isodadureny); ⁴³ Hanã, Maaká riòremy; Josabá, Mitã hãwã ludumy; ⁴⁴ Uzias, Axiterá hãwã ludumy; Samá, Jeieli wana, Hotaõ riórerenyre, Aroé hãwã ludumy; ⁴⁵ Jediaelí, Joá wana, Sῖri riòrerenyre, Tῖsi hãwã ludumy; ⁴⁶ Elieli, Maavá hãwã ludumy; Jeribaí, Josabiasi, Elinaã riòrerenyre; Itximá, Moabésuludumy; ⁴⁷ Elieli, Obedé, Jaasieli, tii boho Sobá hãwã ludumy.