¹ Xiboá hãwãlò-ki heka Bilixiteu mahãdu Isaeli mahãdu wana idi ròrenyrenyre tai heka sõwe Isaeli mahãdu rururenyre, isaeli iuhe mahãdu rihenyrenyre. Rihenyrenyre mahãdu-ki heka roire Saú iiòlòreny tariòrereny boho wana. ² Rihenyrenyreu tahe Bilixiteu mahãdu itxi rearenyre idi Saú riòrereny Jonatá, Abinadabé, Maukisuá, Bilixiteu mahãdu rirubunyrenyre. ³ Saú sowemy ròrenymyroiremyhỹu heka iòludu mahãdu wyhy-di sõwe itxi rearenyre riwerenyre tai Saú sõwemy wotõmona nihikỹmy roire. ⁴ Ihỹre Saú weryrybò wyhy wydydu-ò rarybere: Amaurehe-di wymy bidiwarubunyke Bilixiteu mahãdu kidiwarubunyke lau, wadi aõkõ rutxuenyrekemy. Weryrybò heka ruberumyroire rirubunyõre brebumy dori taiòlòmy rirubunyõre. Tai Saú tamayrehe-di rimyre ityre-ò ixidi rehure. ⁵ Saú rurure heka weryrybò robireu heka aõwesele ihe-kile tamayrehe-di rexirubunyre iwesele, Saú weselemy rexirubunyre tii. ⁶ Kia wese heka Saú tariòrereny wana rurure, iriòrereny inataõ rururenyre tii wana. Tai dori iriòre deròwymy ihõõre, iòlò iriòrerenymy teròwymy ijõõre. ⁷ Isaeli mahãdu roholare heka imahãdureny alòre ribi rihenyrenyre, Saú tariòrereny rurumy roire tai Isaeli mahãduõ Jexireeli hãwã-ki heka rasỹnymyroire heka tasỹreny ririrenyre, rihenyrenyre tule. Iu heka Bilixiteu mahãdu kia hãwã-ò rirònyrenyre tai rasỹnyrenykremy. ⁸ Ijõ ibiurasòmy heka Bilixiteu mahãdu alòre ribi rotare tai aõna õna wihikỹ rimykremy rirònyrenyreu, Saú iriòrereny-ki rubumy roire itxi raharenyre Jiboá hãwãlò-ki roire. ⁹ Tai heka Saú rati riòròrenyre idebònareny rimyrenyre iribi heka rybedu mahãdu Saù debòna-di riteònyrenyre bilixiteu mahãdusu-ò ribedeerynanyrenykremy tamahãdureny riteysanyrenykremy, tasuriokoreny-ò reàlànyrenykremy. ¹⁰ Bilixiteu mahãdu heka Saú debònamy tasuriokoreny hetoõ woki heka ritidirenyre, Saú rati heka isuriokoreny Dakõ hetowoki riònyre tai. ¹¹ Isaeli mahãdu Jabesi hãwã, Jileadesu-ki rasỹnymy roimyhỹre kiamy roholarenyre heka Saú bilixiteu mahãdu rati riororemy rieryrenyu heka ¹² ijoi mahãdu ruruduhukỹ riòryrenyre idi didydenyde Saú umy iriòrereny umy didydenyde idi rituunyrenyre Jileadesu-ki tai oworu rawo-ki (carvalho) rituunyrenyre heka idi debò sohoji reurò txu-di riroxiõhyyrenyre Isaeli mahãdu renarehenyrenyre rubu òraru-ki. ¹³ Saú heka òbitimy Deuxu-ò riwinyõre, Deuxu Tyhyhykỹ rityhynyõre. Tii heka tyytyby-ò riixitòenyre, reàlàre dori tai tii kia wesemy rurure, ¹⁴ Deuxu Tyhyhykỹ-ò rityhynyõre, suriokole rityhynyre. Tai dori Deuxu rirubunyre, tule iòlòna Davi-ò riiwahinyre, Davi Jesé riòre wahe.