7

¹ پسرجان، می گبانَ بیشتَأو و همیشه می نصیحتانَ به یاد بدَأر. ² اونچی کی ترَه گویمَ انجام بدن تا زنده بمأنی. می تعلیمانَ تی چومِ مَأنستَأن حفظ بوکون. ³ اوشَأنَ تی انگوشتِ رو دَود و تی دیلِ میَأن بینیویس. ⁴ حکمتَ بوگو:«تو می خأخوری» و فهمَ خودتِ رِفق بدَأن. ⁵ تا ترَه زنِ زناکارِ جَه حفظ بوکوند و غریبه زنأکأنِ چربزبانی جَه دورَ کوند. ⁶ ایتَه روز خانه پنجره جَه بیرونَ فَأندرستم، ⁷ جوانِ جاهلانَ بیدم، اوشَأنِ میَأن ایتَه جوانِ کم عقل و جاهلَ بیدم ⁸ کی کوچه دورون دوَأرستَأن دوبو و شوئون دوبو اونِ خانه طرف. ⁹ غروب دمِ رِه، موقعی ک روز تومامَ بوست و دِ هوا تاریکَ بوستَأن دوبو. ¹⁰ اون زنأی بأمو اونِ پیشواز، فاحشه زناکانِ رختَ دوکوده بو و نقشۀ پلیدی اون جوانِ رِه دَأشته. ¹¹ زنی بیشرم و بیحَیا کی خانه میَأن قرار نیگیره. ¹² هر دِیقه کوچه خیابانان و میدانانَ گرده و مردکأنِ رِه کمین کونه. ¹³ اون زن اونَ بیگیفت و مأچی بدَه، و بی حیایی مرَه خو رویَ وأکود و اونَ بوگوفت: ¹⁴ «ایمروز قربانی بوکوده دَأرم و می نذرَ اَدا بوکودم، و گوشت قربانی خانه دورون آماده یه. ¹⁵ خانه جَه بیرون بأموم و تی دونبال گردستم، کی هَسَه اَیَ ترَه پیدا کودم. ¹⁶ می رختخوابِ رو ملافه هایی جی مصرِ ابریشم وأشَأده دَأرم. ¹⁷ و می رختخوابَ مُر و عود و دارچینِ اَمرَه خوشبو بوکودم. ¹⁸ بیأ تا صبح عشقِ جَه سِئرَ بیم و همدیگرَ محبتِ جَه خوشحالَ کونیم. ¹⁹ تی خیال راحت چون می مرد بخانه نِئسَه و بوشو دَأره به ایتَه سفر دور. ²⁰ ایتَه کیسه پول خو مرَه بوبورده و تا ماه هم نیمه نوبوسته وَأنگرده.» ²¹ و آخرسر اون جوانَ حرفای زیادی اَمرَه وسوسه بوکود و خو چربزبانی مرَه اونَ فریب بدَه. ²² و اون جوانم هَطو گاوی مَأنستَأن کی شوئون دره کوشتارگاه اون زنأیِ دونبال راه دکفت، یا ایته آهویی مَأنستَأن کی دامی میَأن دکفته دَأره ²³ و تیری اَیه و اونِ جیگر میَأن فرو شِه، یا ایتَه چی چی نی مَأنستَأن کی دامِ طرف پر زنه، ولی نَنِه کی چی سرنوشتی اونِ رأفأ ایسَه. ²⁴ پس هَسَه ای پسرأن، می گبانَ گوش بوکونید و اونچی کی گویمَ توجه بوکونید. ²⁵ وَأنَألید شیمی دیلَ بوبوره و شمرَه گومراهَ کونه. ²⁶ چره کی خیلیانَ بیچارَه کوده دَأره و خیلیانم به کوشتن بدَه دَأره. ²⁷ اونِ خانه راه، مُرده یانِ دنیا طرف شِه و، راهی ایسه کی مرگ و هلاکتَ فَأرسه.