6

¹ پسرجان، اگر تی همساده ضامن بوبُسته دَأری، یا ایتِه غریبه رِه تعهد بدَأئی کی خو قرضَ فَأده ² و خودتِ اَجور گبانِ اَمرَه ترَه به دام تَأوَأده ایی، و قولی وَسی کی بدَه دَأری هَسَه گرفتارَ بوسته ایی. ³ پس ای پسرجان بدَأن کی اونِ اَسیر بوبُسته ای، هر چی کی ترَه گوفتَأن درم انجام بدن تا خودتَ آزادَ کونی. زود بوشون اونِ ورجَه و خواهش و التماسِ اَمرَه تی ضمانتَ پسَ گیر. ⁴ تا اَ کارَ نوکوده ایی، نه بوخوس نه ایتَه لحظه آرام بیگیر. ⁵ آهویی مَأنستَأن کی لافندِ جَه فرار کونه و چی چی نی ایی مَأنستَأن کی صیادِ دامِ جَه خورَه خلاصَ کونه، خودتَ آزادَ کون. ⁶ ای آدمِ تنبل، بوشو مورجأنه ورجَه و اونِ زندگی یَ فأندر و اونِ جَه درسِ عبرت بیگیر. ⁷ اوشَأن نه رهبر دَأرد نه رئیس دَأرد و نه حاکم. ⁸ ولی خوشَأنِ خوراکَ تابستانِ موقع جمعَ کوند، و خوشَأنِ آذوقه یَ درو موقع کنار نهد. ⁹ ای تنبل، تا کِی خَأیی بوخوسی؟ پس کِی خَأیی جی خواب ویریزی؟ ¹⁰ گویی:«وَأئأل ویشتر بوخوسم و ایبچی ویشتر استراحت بوکونم» ¹¹ پس فقر و بدبختی، راهزنِ مُسلح مَأنستَأن ترَه فوتورکه. ¹² آدمِ پست و رذل، همیشه دوروغ گویه، ¹³ اون خو چومِ اَمرَه بازی کونه و خو پا مرَه علامت دِهه، و خو اَنگوشتِ اَمرَه ایشاره کونه. ¹⁴ اونِ دل و فکر دوروغه و همیشه دردسر چَأکونه و تفرقه تَأوَأده. ¹⁵ هَنه وَسی ناخبره اونَ بلا فوتورکه و، ایتَه لحظه میَأن چنان شکست خوره کی دِ هیچ چاره ایی نَئره. ¹⁶ خداوند شیش چیزِه تحملَ نئره، بلکی هم هفت چیزد کی اوشَأنِ جَه نفرت دَأره. ¹⁷ مغروره چوم، دوروغگو زبان، دستی کی بیگوناهانِ خونَ فوکونه، ¹⁸ دیلی کی شرارتِ رِه نقشه دیچینه، پایی کی بدی کودَأنِ رِه تونده، ¹⁹ شاهدی کی شهادتِ دوروغ دِهه و کسی کی دوست و آشنا میَأن تفرقه تَأوَأده.

هشدار علیه زِنا

²⁰ ای پسرجان، هر چی تی پئر ترَه گویه یَ انجام بدن و اونچی کی تی مار ترَه یاد بدَه دَأره یَ فراموشَ نوکون. ²¹ اوشَأنِ گبانَ آویزۀ تی گوش بوکون و تی دیلِ جَه محفوظ بدَأر. ²² اوشَأنِ گبان وختی راه بیشی تی راهنما، وختی بوخوسی تی نگهبان و وختی ویریزی تی مشاور بود. ²³ چون اوشَأنِ نصیحتان ترِه چراغ و، اوشَأنِ راهنمائیان ترِه نورَ مَأنه، اوشَأنِ تنبیه یَأن ترَه زندگی راهَ یاد دِهه. ²⁴ اوشَأنِ نصیحتان، ترَه فاحشه زنِ دسِ جَه حفظ کونه و اونِ چرب زبانی جَه دور دَأره. ²⁵ مراقب بوبون اونِ قشنگی تی دیلَ نوبوره و اونِ چومأن ترَه گول نزنه. ²⁶ چون فاحشه زنأی ترَه ایتَه دانه نانَ مُحتاج کونه، زنِ مرددار تی همۀ زندگی یَ نابودَه کونه. ²⁷ آیا کسی تَأنه آتشَ کشَه گیره و نوسوجه؟ ²⁸ یا کسی روشنِ زغالِ رو راه بیشه و اونِ پا نوسوجه؟ ²⁹ و هَطو هم هر کسی خو همساده زنِ اَمرَه رابطه بدَأره و اونَ دس بزنه، بی گوناه به حساب نَأیه و موجازات بِهه. ³⁰ دوزدی کی ویشتایی موقع خو سِئرِ کودَأنِ رِه دوزدی بوکونه، سرزنش نوکوند، ³¹ ولی با اَنحال اگر اونَ بیگیرد، وَأستی هفت برابرِ اونچی کی بودوزَأنه یَ تاوان بده، حتی اگر اَ تاوان تمامِ اونِ خانه اَموال بیبه. ³² اما کسی کی زنِ مرددارِ اَمرَه زِنا بوکونه، واقعاً بی عقله، چره کی خو جانَ هلاکَ کونه. ³³ اونَ پأیی زند و رُسوا بِهه، و اونِ ننگ هیچ موقع جی میَأن نیشه. ³⁴ چره کی اون زنأیِ مردِ غیرت به جوش اَیه و باعث بِه اون عصبانی بیبه، و انتقامِ موقع دِ هیچ رَحمی نَئره. ³⁵ اون هیچ تاوانی یَ قبول نوکونه و هر قیمتی هم کی فَأدی نِتَأنی اونِ رضایتَ فَأگیری.