1
پسرجان، می حکمتَ توجه بدأر و می نصیحتَ گوش بوکون.
2
بازن فَهمی کی چوطو وَأستی رفتار بوکونی، و تی گب زَئَن نیشان دِهِه کی عاقل و دانایی.
3
چون زنِ زناکارِ لبِ جَه عسل وَأره و اونِ گبان، روغن زیتونِ جَه هم چربتره.
4
ولی آخرسر جز تلخی و درد ترِه چیزی باقی نِنه.
5
اونِ پاهان ترَه مرگِ طرف فَأکشِه و اونِ قدمان مستقیم شِه جهنمِ طرف.
6
هیچموقع زندگانی راهَ فکر نوکونه، سرگردان و گومراهَ بوسته ولی خودشم نَأنه.
7
هَسَه ای پسرجان، می گبانَ گوش بوکون و اونچی کی خَأیم ترَه بوگویمَ جی خاطر نوبور.
8
اَجور زنأکانِ جَه دوری بوکون و حتی اوشَأنِ خانه درِ نزدیکی هم نوشو.
9
نوکونه کی اوشَأنِ دامِ دورون گرفتارَ بی و تی آبرو حیثیت بیشه، و تی عُمر و جوانی یَ کسی اختیار بنی کی رَحم نَئره.
10
وَأنَأل تی مال و اَموالَ غریبه یان بوخورد و تی زحمت بکشه مالِ اَمرَه بیگانه یانِ خانه آبادَه بِه.
11
و آخرسر مریضَ بی و خودتِ آخر عاقبتِ رِه ماتم بیگیری.
12
اونموقع گویی:«چره اَدبِ جَه فراری بؤم! حیف کی نخَأستم عبرت بیگیرم،
13
پیله ترانِ نصیحتَ نیشتَأوستم و می معلمانِ حرفانَ گوش ندَم.
14
هَسه بفهمستم کی مردمِ ورجَه رسوا و سراَفکنده بوبُسته دَأرم.»
15
پسرجان، خودتِ زنَ وفادار بوبون و فقط اونَ دوس بدَأر.
16
چره وَأستی هرزه زناکانِ دونبال بیشی و چیزایِ عمومی میان مردمِ اَمرَه شریک بیبی؟
17
ولی تی زن فقط تی شینه و غریبه یان تی اَمرَه شریک نیید.
18
پس تی زندگی مبارک بیبه و تی زنِ اَمرَه کی جوانی اَیام اونِ اَمرَه ازدواج بوکوده ایی خوش بوبون.
19
وَأئأل ایته قشنگ و خوش اندامِ آهو مَأنستَأن، خوشی اَمرَه ترَه کشَه گیره و، تی دیل اونِ عشقِ جَه پورَه بِه.
20
ای پسرجان، چره وَأستی بیگانه زنأکَ دیل دَودی؟ چره وَأستی غریب زنأکَ کِشَه گیری؟
21
چون آدمی راه هان خداوند چومَأنِ جولو نَهه، و همۀ اونِ کارانَ دینه.
22
آدمِ شرورِ تقصیران اونَ دامِ میَأن تَأودَأده، و خودشِ گوناهانِ بندِ دورون گرفتارَ بِه.
23
اَجور شخص هَوسبازی جَه میره و اونِ حماقت و نادانی اونَ هلاکَ کونه.