1
ای پسران، خودتانِ پئرِ نصیحتَ بیشتأوید و گوش بدید چی گوفتان درم، تا فَهم بدس بأورید.
2
من شمرَه چیزای خوبی یاد دهم، می تعلیمانَ جی خاطر نوبورید.
3
منم ایته زمانی طفل بؤم، منم می پئرِ رِه پسر بؤم و می مارِ رِه ایتَه دانه ناز بدَأشته زَأی.
4
می پئر مرَه تعلیم دَئه و گوفته: «اگر می گبانَ دیل و جانِ اَمرَه گوش بدی و اوشَأنَ عمل بوکونی، زنده مَأنی،
5
حکمتِ دونبال بوشو و عقل و فهم بدس بأور. اونچی جَه کی ترَه گوفتَأن درم مُنحرفَ نوبون.
6
حکمتَ ترکَ نوکون، چره کی ترَه محافظت کونه. اونَ دوس بدَأر تا تی جَه مواظبت بوکونه.
7
حکمتِ دونبال شوئون، هر کاری جَه ویشتر اَرزش دَأره. پس به هر قیمتی بوبُسته فهم و حکمت دونبال بوشون و اونَ بدس بأور.
8
اونِ رِه ارزش قائِل بوبون کی اونم ترَه سربلندَ کونه، اگر اونَ کشَه گیری، اونم ترَه عزّت بخشه.
9
و افتخارِ تاجَ تی سرِ رو نهه.»
10
ای زَأی جان، می گبانَ گوش بوکون و همه یَ جدی بیگیر تا تی عُمر درازَ بِه.
11
حکمتَ ترَه یاد بدَم و راه های دوروستِ طرف ترَه هدایت بوکودم.
12
وختی راه بیشی تی راه سر مانعی نمَأنه، و وختی بودووی تی پا لیز نوخوره.
13
اونچی کی یاد بیگیفته دَأری یَ چنگِ اَمرَه بدأر و جی دس ندن، اوشَأنَ فراموشَ نوکون چره کی تی زندگی ید.
14
شریرانِ راهَ نوشون، و گوناهکارانِ روشِ جَه پیروی نوکون.
15
اوشَأنِ جَه دوری بوکون و اوشَأنِ راهَ نوشون، تی رویَ اوشَأنِ جَه وَأگردَأن و تی راهَ بوشو.
16
چره کی اوشَأن تا بدی نوکوند، اوشَأنَ خواب نیگیره و تا کسی یَ صدمه نزد آرام نیگیرد.
17
اوشَأن شرارتِ نانَ خورد و، ظُلمِ شرابَ وَأخورد.
18
عادلانِ راه سپیده دمِ طلوعَ مَأنه کی اونِ روشنایی هر لحظه ویشتر و ویشترَ به، تا اَنکی آخرسر همه جا روشنَ بِه و کامل روزَه بِه.
19
ولی شریرانِ راه، شبِ ظُلماتَ مَأنه، و نَأند کی چی وَسی کفد.
20
ای پسرجان، اونچی کی گویمَ توجه بوکون و، می حرفانَ خُب گوش بوکون.
21
اوشَأنَ تی نظرِ جَه دورَ نوکون و تی دیلِ میَأن حفظ بوکون.
22
چون کسانی رِه کی اَ گبانَ بفهمد حیات و سلامتی اَوره، و اوشَأنِ جانِ رِه شفایه.
23
تی دیلِ فکرِ مواظب بوبون، چره کی تی اَفکارِ کی تی زندگی یَ شکل دهه.
24
دوروغَ و بددَهنی یَ تی دهنِ جَه تأوأد و تی لبِ جَه دورَه کون.
25
تی چومأن، مستقیم جولویَ فَأندره و تی اَطرافَ توجه ندأر.
26
اون راهی کی اونِ میَأن قدم نَئَن دأری یَ مراقب بوبون، تا همیشه تی راه هانِ میَأن اُستوار بیبی.
27
راست و چپَ مُنحرف نوبون، و تی پایَ بدی جَه دور بدَأر.