3
همه تی دیلِ اَمرَه خداوندَ توکل بوکون
1
ای پسر جان، هر چی کی ترَه یاد دَئن دَأرمَ جی خاطر نوبور و تی دیلِ میَأن می گبانَ به خاطر بدَأر.
2
چون تی عمرِ روزان و سالانَ زیادَ کونه و تو سعادتمند بیهی.
3
هیچ موقع محبت و وفاداری یَ ترکَ نوکون، همۀ اَشَأنَ تی گردن وألاخان و تی دیلِ صفحه رو بینیویس.
4
اونموقع هم خدا و هم انسانِ نظرِ جَه التفاوت پیدا کونی و، همه تی جَه راضی بود.
5
تی همۀ دیل و جانِ اَمرَه خدایَ توکل بوکون و خودتِ عقلَ تکیه نوکون.
6
تی همۀ کارانِ میَأن خداوندَ در نظر بدَأر، اون راستِ راهَ ترَه نیشان دِهه.
7
ترِه خیال نوکون کی عاقل و حکیمی. خدا جَه بترس و بدی جَه دوری بوکون.
8
اَ کار تی نافِ رِه شفا بِهه و تی استخوانانِ رِه مغز.
9
خودتِ دارایی جَه خداوندَ احترام بوکون و اونِ رِه هدیه بأور، و تی محصولاتِ نوبرَ اونَ تقدیم بوکون.
10
اگر اَ کارَ بوکونی، تی انباران نعمتِ جَه پورَه بِه و تی خُمره یان اَنگورِ شیره جَه لبریز.
11
ای پسرجان، وختی خدا ترَه تنبیه کونه به دیل نیگیر و اونِ سرزنشِ جَه ناراحتَ نوبون.
12
چون خداوند هر کیَه کی دوست دَأره تنبیه کونه، هوطویی کی ایتَه پئر خو عزیزِ زَأیَ تربیت کونه.
خوش بحال اون کسی کی حکمت پیدا کونه
13
خوش بحال کسی کی حکمت پیدا بوکونه و شخصی کی فهمَ بدس بأوره.
14
چره کی اونِ تجارت جی نُقره تجارتم ویشتر سود دَأره و، اونِ محصول طلای خالصِ جَه هم بهتره.
15
جی یاقوت هم ویشتر ارزش دَأره، و هیچکودام جی تی مال و اَموال نِتَأنه اونِ اَمرَه برابری بوکونه.
16
اونِ راست دسِ طرف طولِ عُمر نَهَه و اونِ چپِ دسِ طرف ثروت و احترام.
17
اونِ راهان، شادمانی و سلامتی راه هاند.
18
اوشَأنی رِه کی اونَ بدس بأورد حیاتِ دارَ مَأنه و، اوشَأنی ره کی اونَ به چنگ بأورد برکته.
19
خداوند جی رویِ خو حکمت زمینَ خلق بوکود، و آسمانانَ خو عقل و دانایی مرَه اُستوار بوکود.
20
چشمه یان اونِ علمِ اَمرَه زمینِ رو روان بوبُستد و جی اَبران باران بوأرست.
21
پسرجان، ، فهم و دانایی یَ حفظ بوکون و وَأنَأل اَ چیزان تی نظرِ جَه دورَه بِه.
22
اَشَأن تی جانَ زنده کونه و تی گردنِ رِه زینت بِهه.
23
اونموقع سلامتِ اَمرَه تی راهَ شی و، تی پا لیز نوخوره.
24
وختی خوسی نترسی، و وختی درازَ کشی، تی خواب شیرینه.
25
نه ناخبره بلا جَه ترسی و، نه اون خرابی ایی وَسی که شریرانِ سر رو اَیه.
26
چون خداوند تی جَه محافظت کونه و وَأنَأله کی تی پا دکفه دامِ دورون.
27
اگر تَأنی ایتَه مُستحقَ کمک بوکونی دریغ نوکون، هر کاری کی تی دسِ جَه بر اَیه یَ اونِ رِه انجام بدن.
28
تی همساده یَ نوگو بوشون فردا بیَأ ترَه فَأدم، اگر کی تی ورجَه نَهه و تَأنی هو لحظه اونَ کمک بوکونی.
29
تی همساده رِه کی تی نزدیکی زندگی کونه و ترَه اعتماد دَأره، توطئه دینچین.
30
هَچین بیخود کسی اَمرَه کی ترَه بدی نوکوده، دعوا نوکون.
31
مردمانِ ظالمَ حسودی نوکون و، اوشَأنِ راه و روشِ جَه پیروی نوکون.
32
چون خداوند مُنحرف اشخاصِ جَه نفرت دَأره، ولی دوروستکاران اونِ اَسرارَ خبر دَأرد.
33
خداوندِ لعنت شریرانِ خانه رو نَهه. ولی عادلانَ برکت دِهه.
34
خداوند اوشَأنی کی مسخره کوندَه مسخره کونه، ولی سربیجیرانَ فیض عطا کونه.
35
حکیمان عزّت و جلال بدس اَورد، ولی جاهلانِ رسوایی ویشتر بهه.