2

¹ ای پسرجان، اگر می گبان قبول بوکونی و می اَحکامَ جی خاطر نوبوری، ² اگر حکمتَ گوش بدی و تی دیلَ دانایی طرف مایلَ کونی، ³ و اگر فهمَ دعوت بوکونی و آواز بلندِ اَمرَه اونَ دخَأنی، ⁴ اگر نقره مَأنستَأن اونِ طالب بیبی و، گنجِ مَأنستَأن اونِ دونبال بگردی، ⁵ اونموقع خداوندِ ترسَ فهمی و، خدا شناختَ یاد گیری. ⁶ چره کی خداونده کی حکمت بخشه و اونِ دهنِ جَه فهم و دانش بیرون اَیه. ⁷ اون صالحان و دوروستکارانَ کمک کونه و، اوشَأنِ جَه سپرِ مَأنستَأن محافظت کونه. ⁸ اون کسانی کی دیگرانِ مرَه انصافِ اَمرَه رفتار کوندَه محافظت کونه و، خو مقدسانِ جَه حمایت کونه. ⁹ اگر می گبانَ گوش بوکونی، عدالت و انصافَ فهمی و دوروست راهَ پیدا کونی. ¹⁰ و ایتَه شخصِ عاقل بیهی و خودتِ معرفت و حکمتِ جَه لذّت بوری. ¹¹ و تی عقل و تی فهم، تی جَه محافظت کونه. ¹² و ترَه شریرانِ راهِ جَه نجات دهه، یعنی جی اوشَأنی کی خَأید خوشَأنِ گبانِ مرَه ترَه منحرفَ کوند، ¹³ یعنی کسانی کی راستِ راه جَه وَأگردسته دَأرد تا گوناه تاریکی میَأن زندگی بوکوند. ¹⁴ اوشَأن خوشَأنِ زشتِ کارانِ وَسی خوشحالد و، خوشَأنِ دوروغانِ جَه لذت بورد. ¹⁵ اَجور کسان هر کاری کی کوند جی روی نادوروستی و حُقه بازیه. ¹⁶ حکمت ترَه فاحشه زناکانِ دسِ جَه نجات دهه، و اون زناکانی دسِ جَه کی گبایِ دوروغِ مرَه تی جَه تعریف کوند. ¹⁷ اَجور زناکان خوشَأنِ مردکَأنَ خیانت بوکوده دَأرد و خوشَأنِ ازدواجَ کی خدا حضورِ جَه انجام بده دَأردَ جی خاطر بوبوردد. ¹⁸ اگر اوشَأنِ خانه یَ بودورون بیشی، مرگ و نابودی راهَ قدم بنَه دَأری، چون اوشَأنِ راهان مُرده یانِ دنیا طرف شِه. ¹⁹ کسانی کی اَجور زناکانِ ورجَه شُد، دِ هیچ موقع نتَأند راهِ دوروستَ وَأگردد، اوشَأن هیچ موقع راهِ زندگانی یَ پیدا نوکوند. ²⁰ پس تو وَأستی مردمِ دوروستکارِ جَه پیروی بوکونی و، عادلانِ راهَ انتخاب بوکونی. ²¹ چره کی صالحان اَ زمینِ رو زندگی کوند و دوروستکاران اونِ رو باقی مَأند. ²² ولی شریران زمینِ رو جَه نابود، و خیانتکاران جی زمین، ریشه کن بؤد.