¹ دربارۀ فردا غرورِ اَمرَه گب نزن، چره کی نَأنی فردا چی خَأیه پیش بأیه. ² هیچ موقع خودتِ جَه تعریف نوکون، بدَه دیگران تی جَه تعریف بوکوند. ³ سنگ و فورش سنگینه و اونِ بار بار کودَأن سخته، ولی ناراحتی ایی تحمل کی آدمِ احمق بوجود اَوره، اونِ جَه هم سخت تره. ⁴ خشم خانه ویران کونه و غضب سیل مَأنستَأنه، ولی کیه کی بتَأنه حسادتِ جولو تاب بأوره؟ ⁵ آشکارا سرزنش کودَأن، جِرجیرکی محبت کودَأنِ جَه بهتره. ⁶ دوستِ وفادارِ زخم جی دوشمنِ مَأچی دَئَن بهتره. ⁷ سِئرِ شکم عسلِ جَه هم اونَ بد اَیه، ولی ویشتا شکمِ رِه هر تلخه چی یم شیرینه. ⁸ کسی کی خو خانه جَه آواره بیبه، چی چی نی یَ مَأنه کی خو لانه جَه آوارَه بوسته. ⁹ ایتَه دوستِ مشورتِ صمیمانه شیرینه، و عطر و بویِ خوشِ مَأنستَأن آدمِ دیلَ شادَ کونه. ¹⁰ خودتِ دوست و تی پئرِ دوستَ هیچموقع ترکَ نوکون، و گرفتاری روزِ رِه تی برَأرِ خانه نوشون، چره کی تی نزدیکه همساده بهتره تَأنه ترَه کمک بوکونه تا برأری کی تی جَه دوره. ¹¹ پسرجان، حکمت یاد بیگیر و می دیلَ شادَه کون تا بتَأنم کسانی کی مرَه سرزنش کوندِه جوابَ بدم. ¹² آدمِ زیرک خطرَ دینه و اونِ جَه دوری کونه، ولی آدمِ جاهل شِه اونِ طرف و خورَه گرفتارَ کونه. ¹³ کسی کی ایتَه غریبه رِه ضمانت کونه رختَ اونِ جَه گرویی فأگیر. ¹⁴ کسی کی صبحِ زود ویریزه و خو همساده رِه صدایِ بلندِ اَمرَه دعایِ خیر کونه، همساده رِه لعنت به حساب اَیه. ¹⁵ زنِ بهانه گیرِ غُرغُران، آبِ توکه کودَأنِ مَأنه بارانی روزه میَأن. ¹⁶ هر کی بخَأیه اَجور زنأیِ پِشَ بیگیره، اَنَ مَأنه کی بخَأیه بادِ جولویَ بیگیره یا روغنی دسِ اَمرَه ایتَه چیَه اوسَأنه. ¹⁷ آهن آهنَ تیزَه کونه و، رِفق رِفقه شخصیتَ اصلاح کونه. ¹⁸ هر کی اَنجیر دارِ جَه مراقبت بوکونه، اونِ میوه یَ خوره، و هر کی خو اَربابَ خدمت بوکونه، خو خدمتِ پاداشَ فَأگیره. ¹⁹ هوطو کی آدمی آبِ میَأن خو صورتَ فَأندره، دیگرانِ وجودِ میَأنم خورَه دینه. ²⁰ هوطو کی مُرده یانِ دونیا زنده یانِ خوردَأنِ جَه سِئرَه نیبه، آدمی چومِ خواسته یانم هیچموقع تومامَ نیبه. ²¹ طلا و نقره یَ آتشِ مرَه آزمایش کوند، ولی آدمی یَ شَه اونِ عکس العملِ جَه شناختن وختی کی دیگران اونِ جَه تعریف کوند. ²² آدمِ احمقَ اگر تَأوَأدی هاونِ دورون گندمِ مَأنستَأن اونَ بوکوبَأنی، بازم اونِ حماقت اونِ جَه سیوایَ نیبه. ²³ تی حیوانانِ گله یَ توجه بوکون، دقتِ اَمرَه اونِ جَه مراقبت بوکون. ²⁴ چره کی مال و ثروت دائمی نیه و پادشاهِ تاج و تخت تا اَبد اونِ زَأکأنِ رِه باقی نمَأنه. ²⁵ پس وختی علفانَ بزنن و تازه علف جُر بَأیه، و تپه یانِ علوفه یَ جمعَ کوند، ²⁶ اونموقع تَأنی تی گوسفندانِ پشمِ جَه ترِه رخت و لباس تهیه بوکونی، و تی بُزانَ بوفروشی و زمین بِهِنی. ²⁷ و تی باقی بُزانِ شیرِ جَه، تو و تی خانواده و تی کارگران سِئرَه بید.