¹ اَشَأنم جی سلیمانِ مثالاند، کی یهودا پادشاه یعنی حِزِقیا کاتبان اوشَأنَ بینیویشته دَأرد: ² خدا عظمت اونِ اَسرارِ مخفی بوستَأنِ جَه یه، ولی پادشاه عظمت مسائلِ عُمقَ گردستأن و اوشَأنِ فهمستَأنه جَه یه. ³ پادشاه دیلَ نشَه تفتیش کودَأن، آسمانِ بلندی و زمینِ عُمقِ مَأنستَأن. ⁴ ناخالصی یَ نُقره جَه سیوایَ کون تا زرگر بتَأنه اونِ جَه ظرفی چَأکونه. ⁵ پادشاه دور و وَریانِ شرورَ اونِ جَه دورَه کون، تا اونِ پادشاهی تخت عدالتِ اَمرَه پایدار بمَأنه. ⁶ وختی شی پادشاه حضور خودتَ بوجِر وُونکوش و، پیله کسانِ جا رو نینیش. ⁷ چون بهتره ترَه بوگوید:«بیأ اَیَ بینیش» تا اَنکی ترَه همۀ پیله کسانِ چومِ جولو بوبورد بیجیرتر بینیشَأند. ⁸ وختی تی همساده اَمرَه اختلاف دَأری، عجله اَمرَه نوشون اونِ جَه شکایت بوکون، چره کی بعداً اگر ثابت بیبه کی حق اونِ اَمرَه بو، تو چی خَأیی بوکونی؟ ⁹ وختی تی همساده اَمرَه دعوا گیفتَأن دری، دیگری رازَ آشکارَه نوکون. ¹⁰ چره کی دِ کسی ترَه اعتماد نوکونه و تو بدنام بیهی. ¹¹ گبی کی خو وختِ موقع بوگوفته بیبه، طلایی نگینی یَ مَأنه کی نُقره ایی ظرفِ رو کار بوبُسته بِه. ¹² حکیمِ توبیخان گوشِ شنوا رِه طلایی حلقه و جواهرِ بااَرزشَ مَأنه. ¹³ خادمِ دوروستکار و اَمین، سرده آبِ مَأنستَأن تابستانِ گرما میَأن، خو اَربابِ جانَ تازَه کونه. ¹⁴ کسی کی خو بذل و بخششِ جَه گب زنه و اونَ افتخار کونه، ولی هیچکسِ دس چیزی فأنده، اَبری و بادی یَ مَأنه کی باران نَأوره. ¹⁵ صبر و تحملِ اَمرَه شَه حاکمَ قانع کودَأن، نرم زبان اَمرَه شَه اُستخوانم ایشکنن. ¹⁶ اگر عسل پیدا کودی تی اندازه بوخور، نوکونه زیاد بوخوری و بوجُر بأوری. ¹⁷ ویشتر جی حد تی همساده خانه نوشون، نوکونه تی جَه سئرَ بِه و تی جَه نفرت پیدا کونه. ¹⁸ کسی کی بر ضدِّ خو همساده شهادتِ دوروغ بده، اَ کار شمشیر، یا تبر، یا تیزِ تیرِه مَأنستَأن آدمَ صدمه زنه. ¹⁹ سختی موقع خائنَ اعتماد کودَأن، اَنَ مَأنه کی آدم لق دندانِ اَمرَه بخَأیه غذا بوخوره، یا بیشکفته پا مرَه بخَأیه بودووِه ²⁰ آدمِ غصه دار رِه آواز خوانی، اَنَ مَأنه کی سرده هوا میَأن تی رختَ بکنی، یا زخمِ رو نمک فوکونی. ²¹ اگر تی دوشمن ویشتایه اونَ غذا فَأدن بوخوره، و اگر عطش دَأره، اونَ آب فَأدن. ²² تی اَ کار اونَ شرمنده کونه و خداوند ترَه پاداش فَأده. ²³ هوطویی کی دشتِ وا باران اَوره، پوشتِ سرگویی هم، عصبانیت و خشم خو اَمرَه اَوره. ²⁴ آدم پوشتِ بامِ جَه سامان بیگیره، بهتره تا ایتَه دعواگیره زنأیِ اَمرَه ایتَه خانه دورون زندگی بوکونه. ²⁵ خبرِ خوش جی ولایتِ دور، سرده آبَ مَأنه آدمِ تشنه رِه. ²⁶ شرور و عادلِ مردَأیِ سازش، اَنَ مَأنه کی چشمه آبَ گیل آلود بوکونی. ²⁷ هوطو کی زیادی عسل خوردَأن ضرر دَأره، مردم جَه انتظار بدَأری هی تی جَه تعریف و تمجید بوکوند هم دوروست نیه. ²⁸ اونی کی خو نفسَ مُسلط نیه، ایتَه شهرِ بی حصارَ مَأنه کی اَمنیت نَئره.