11
خداوند جی ترازوی نامیزان نفرت دَأره
1
خداوند ترازویِ نامیزانِ جَه نفرت دَأره، ولی سنگِ ترازوی دوروستَ دوست دَأره.
2
مردمِ مغرور خیلی زود شرمنده بهد، ولی حکیمِ مردمان فروتند.
3
آدمای دوروستکارِ صداقت اوشَأنَ هدایت کونه، ولی خیانتکارانِ نادوروستی اوشَأنَ هلاکَ کونه.
4
روز غضبِ رِه مال و ثروت آدمِ رِه هیچ منفعتی نَئره، ولی صداقت تَأنه آدمی یَ جی مرگ نجات بده.
5
دوروستکارانِ صداقت اوشَأنِ راهانَ همواره کونه، ولی شرور خو شرارتِ وَسی هلاکَ بِه.
6
عدالت دوروستکارانِ راهَ هموارَ کونه، ولی خیانتکاران خوشَأنِ خیانتِ دامِ دورون گرفتارَ بود.
7
آدمِ شرور کی میره، اونِ اُمید و اونِ دیلِ ناجه هم جی میَأن شِه، و اعتمادی کی خو قدرت و ثروتَ دَأشته اونِ رِه هیچ نتیجه ایی نَئره.
8
مردمِ دوروستکار جی مشکلات خلاصَ بود و آدمای شرور اوشَأنِ جا گرفتار.
9
دمِ بیخدا گبان اونِ همساده هلاکتَ باعث بِه، ولی آدمِ دوروستکارِ حکمت تَأنه اونِ همساده یَ نجات بده.
10
وختی آدمِ دوروستکار موفق بِهه، همۀ شهر شادی کوند، ولی وختی آدمِ شرور میره، مردم جی شادمانی فریاد کوند.
11
صالحانِ برکتِ وَسی ایتَه شهر سربلندَ بِه، ولی شرورانِ گبانِ وَسی سرنگون.
12
کسی کی دیگرانَ حقیر دَأنه، ناقص العقله، ولی آدمِ دانا خو زبانِ جولویَ گیره.
13
کسی کی خبرچینی کونه، نِتَأنه هیچ رازی یَ خو ورجَه بدَأره، ولی آدمِ اَمینَ تَأنی اعتماد بوکونی و تی دیلِ حرفَ اونِ رِه بوگویی.
14
بدونِ نقشه لشکر شکست خوره، ولی مشاوران زیاد پیروزی یَ تضمین کونه.
15
کسی کی غریبه ضامن بیبه، حتماً ضرر کونه، ولی هر کی غریبه ضامن نیبه، دردسرِ میَأنم دنکفه.
16
زنی کی خوش رفتار بیبه یَ همه عزّت و احترام نهد، ولی ظالمِ مردای فقط تَأنه ثروت بدس بأوره.
17
مردی کی مهربان بیبه خودشَ نفع رسَأنه، ولی آدم ستمگر خودشَ لطمه زنه.
18
آدمِ بدکارِ ثروت موقتی و بی اَرزشه، ولی کسی کی دوروستکار بیبه اونِ پاداش واقعی و اَبدیه.
19
آدمِ صالح کی عدالتِ دونبال شِه رستگار بِه، ولی کسی کی شرارتَ دونبالَ کونه رو به مرگ شوئون دره.
20
خداوند آدمِ بد طینتِ جَه نفرت دَأره، ولی دوروستکارانَ دوس دَأره.
21
طمئن بوبون کی آدمِ شرور و بدکار سِزا دینه، ولی دوروستکارانِ نسل نجات پیدا کوند.
22
زنِ نادانِ زیبایی، حلقۀ طلایَ مَأنه ایتَه خوکِ دوماغِ دورون.
23
مردمِ دوروستکارِ دیلِ ناجه همیشه خوبه، ولی شریرانِ دیلِ ناجه یَ، خدا خو خشم و غضبِ اَمرَه جواب دِهه.
24
بعضی مردم خوشَأنِ دارایی یَ سخاوتِ اَمرَه اَی تَه اوی تَه یَ بخشد، ولی بازم ثروتمندترَه بود، بعضی مردمم ایسَأد کی خسیسی کوند و هیچ کسِ دسَ نیگیرد، ولی روز به روزم فقیرتر و مُحتاجترَه بود.
25
شخصِ سخاوتمند ویشتر بدس اَوره، و هر کی دیگرانَ سیراب کونه، خودشم سیراب بِهه.
26
مردم کسی یَ کی خو غلّه یَ انبار کونه تا بعداً گرانتر بوفروشه یَ لعنت کوند، ولی کسی ره کی مردمِ احتیاج موقع اوشَأنَ غله فروشه، دعای خیر کوند.
27
کسی کی اونِ نیّت خیر بیبه، خدا هم اونَ لطف کونه، ولی کسی کی شرِّ دونبال بیشه، شرم اونِ سر اَیه.
28
کسی کی خو ثروتَ توکل بوکونه کفه، ولی مردمِ دوروستکار سبزه دارِ مَأنستَأن شکوفه زند.
29
کسی کی خو خانواده یَ ناراحتَ کونه، آخرسر خو همه چیَه جی دس دِهه و عاقلانِ برده بِهه.
30
صالحانِ عملِ نتیجه زندگانیه، و کسی کی مردمَ نجاتِ طرف هدایت کونه حکیمه.
31
اگر آدمِ دوروستکار خو اَعمالِ نتیجه یَ هَ دونیا میَأن دینه، پس مُطمئن بیبید شروران و گوناهکارانم خوشَأنِ کارانِ سزایَ دیند.