8

¹ خداوند مرَه بوگوفت ایتَه پیلدانه لوح اوسَأن و اونِ رو دوروشتِ قلمِ اَمرَه بینیویس «مَهیر شَلال هاش بَز» یعنی «غارت سریعه و تاراج عجله کونه». ² و من اوریایِ کاهن و یِبِرِکیا پسرْ زکریا جَه کی آدمایِ اَمینی ایسدْ بخواستم کی بَأید و شاهد بوبود کی من اونَ بینیویشتم.3 ³ بعدِ ایتَه مدت می زن حامله بوبُست و ایتَه پسر بزَه، بازن خداوند مرَه بوگوفت:«اون زَأیِ نامَ "مَهیر شَلال هاش بَز" بنن، ⁴ چون پیشتر جی اونی کی اَ زَأی بتَأنه خو پئر و مارَ دَخَأنه، دمشق و سامره ثروتَ غنیمت بورد آشورِ پادشاه ورجَه.» ⁵ و خداوند ایبار دیگر مرَه بفرماست: ⁶ «چون اَ مردمْ شیلوه دغنانِ آبانَ کی آرام جاری بِه ترکَ کودد و اوشَأنِ دیل به رِصین پادشاه و فقحِ پادشاه خوشه، ⁷ هَنه وَسی من خداوندِ مُتعال آشورِ پادشاه و همۀ اونِ سپاهَ اَورم اَیَ، اون فُراتِ رودخانه مَأنستَأن کی طغیان کونه و فراتِ ساحلَ آب گیره، یهودایَ فوتورکه و همۀ یهودا سرزمینَ پوشَأنه. ⁸ اون یهودایَ تجاوز کونه و سیلِ مَأنستَأن دواره و همه چیه سیلابی میَأن غرقَ کونه کی تا آدمی گردن فأرسه، و خو بالانَ پهنَ کونه و همۀ تی سرزمینَ ای عِمانوئیلْ، پورَه کونه.» ⁹ ای تمامی مِلتان، جمعَ بید و همدیگرِ اَمرَه مُتحد بیبید، ای کسانی کی دورترین نقطه جَه زندگی کونیدْ گوش بوکونید، شیمی کمرَ دوَدیدْ ولی بدَأنید شکست خورید، شیمی اسلحه هانَ اوسَأنید و جنگِ رِه آمادَه بید، ولی بدَأنید شکست خورید. ¹⁰ همدیگرِ اَمرَه مشورت بوکونید و حمله رِه نقشه دیچینید، ولی بی فایده یه و شیمی نقشه یان عملی نیبه، چون خدا اَمی اَمرَه یه.

خدا ترس

¹¹ خداوند خو قدرتِ عظیمِ اَمرَه مرَه هشدار بدَه کی نوَأستی هون راهی کی اونِ قؤم بوشو دَأردَ بوشم، اون بوگوفت: ¹² «هر چیَه کی اَ قؤم فتنه گویه، شومَأن فتنه نوگوئید، و چیزایی جَه کی اوشَأن ترسد شومأن نترسید و وحشت نوکونید. ¹³ اونی کی وَأستی مُقدس بدَأنیدْ خداوندِ مُتعاله، اونه کی وَأستی اونِ جَه بترسید، اونه کی وَأستی اونِ جَه وحشت بوکونید. ¹⁴ اون شمرِه مکانِ مُقدس و پناهگاهه، ولی دو تَه خاندانِ اسرائیلِ رِه نه، اوشَأنِ رِه سنگیه کی باعثِ لغزش بِه، و یهودا و اورشلیمِ مردمِ رِه هم دام و تله. ¹⁵ خیلی جی اوشَأن لیز خورد و کفد و صدمه دیند، اوشَأن بدام دکفد و گرفتارَ بود.» ¹⁶ ای می شاگردان، شومَأن وَأستی کلام و دستوراتی کی خدا مرَه فَأدَه دَأره یَ مُهر و موم بوکونید و حفظ بوکونید. ¹⁷ خداوند خودشَه یعقوبِ خاندانِ جَه جیگا بدَه دَأره، ولی می تنها اُمید اونه، من خداوندِ رأفأ ایسَم تا اَمرَه یاری بوکونه. ¹⁸ هَسَه من و زَأکأنی کی خدا مره فأدَه دَأره، یَهوَه صبایوتِ طرفِ جَه کی صَهیونِ کوه رو ساکنه اسرائیلِ رِه نشانه و علامتیم. ¹⁹ وختی مردم شمرَه گوید کی فالگیران و جادوگرانی کی خوشأنِ لبِ جیر زمزمه کوند و وِرد خَأندِ مرَه مشورت بوکونید، شومَأن جواب بدید:«آیا زنده یانِ وَسی، وَأستی مُرده یانِ جَه مشورت بخَأئیم؟ چره خودمانِ خدا جَه مشورت نخَأئیم؟» ²⁰ مردمَ بوگوئید:«شریعتْ و خدا کلامَ توجه بوکونید نه جادوگرانِ گبانَ، اوشَأن اگر مطابقِ خدا کلام گب نزند پس اوشَأنِ گبانم حقیقتِ نورِ جَه خالیه و شمرِه سودی نَئره. ²¹ مردم ویشتایی و سختیِ زیادِ مرَه زمینِ میَأن آوارَه بود. وختی ویشتا بود جی عصبانیت و پریشانی بوجُرَ فَأندردْ و خوشَأنِ خدا و خوشَأنِ پادشاهَ نفرین کوند. ²² و زمینَم فَأندرد، ولی جُز گرفتاری و پریشانی و تاریکی چیزی نیدیند، و تاریکی مَحضِ طرف تَأوَأدَه بود.