¹ آدمایِ دوروستکار و عادل میرد و کسی فکر نوکونه چره! آدمِ خداشناس پیشتر جی وخت میره و هیچکی درک نوکونه و اونِ دلیلَ نفهمه، اوشَأن میرد تا جی بلایی کی اَمون دره در اَمان بوبود. ² اوشَأنی کی راستِ راهَ قدم نهد وختی میرد، آرامشَ داخل بود و استراحت کوند. ³ ولی ای گوناهکاران داوری رِه حاضر بیبید؛ ای زِنا و فَحشا زَأکأن، ای جادوگرانِ اولادْ، بأئید اَیَه. ⁴ شیمی دَهَنَ کِ رِه بازَه کونید؟ کِ رِه زبان درازی کونید؟ کیَه مسخره کونید؟ آیا شومَأن عُصیانِ زَأکأن و فریبِ اولاد نیئید؟ ⁵ شومَأن هوشَأنی نیئید کی بلوط درختانِ جیر و یا هر درختِ سبزِ جیر شهوتِ دورون سوجید و همدیگرِ اَمرَه زِنا کونید؟ آیا شومَأن هوشَأنی نیئید کی دره یانِ میَأن یا صخره یانِ شکافِ جیر شیمی زَأکأنَ قربانی کونید؟ ⁶ صافِ سنگأنَ دَره یانِ جَه اوسَأنید و اوشَأنَ خدا جا پرستش کونید؟ بله تی سَهم هوشَأند و بس! تو اوشَأنِ رِه هدیه فوکودنی(هدیه ریختنی) فوکودی و هدیۀ آردی اوشَأنَ تقدیم بوکودی. آیا همۀ اَشَأنَ ندید بیگیرم و گوذشت بوکونم؟ ⁷ شید بلندِ کوه جُر و اویَ شیمی رختخوابَ وَأشَأنید و زِنا کونید، شید اویَ و شیمی بُتانِ رِه قربانی کونید. ⁸ شومَأن شیمی بُتانَ خانه دورون دوَسته دَرانِ پوشت نهید و اوشَأنَ پرستش کونید، شیمی اَ کارْ زِناکاریه، چون بجای اَنکی خدایَ دوس بدَأرید و عبادت بوکونید، بُتانَ عشق دَأرید و اوشَأنَ پرستش کونید. ⁹ شومَأن شمرَه عطر زنید و روغنایِ خوشبو مرَه آرایش کونید، بازن شید بُتِ مولکِ پرستشِ رِه. سَفرایِ دور و دراز شید، حتی حاضرید تا جهنمم بیشید تا شاید ایتَه تازه خدا پرستشِ رِه پیدا کونید و اونَ دیل دوَدید. ¹⁰ اوقدر گردید تا خسته و درمانده بیبید، ولی دس بردار نیئید و بازم گردید. شومَأن فکر کونید کی بُتان شمرَه قوّت دهد پس هیچموقع ضعیف نیبید. ¹¹ خداوند فرمایه:«اَ بُتان چی ایسد کی اَقدر اوشَأنِ جَه ترسید و مرَه خیانت کونید؟ چره مرَه بیاد نَأورید؟ اَنی کی می جَه نترسید اَنِ وَسی نییِه کی ایتَه مدت سکوت بوکوده دَأرم و چیزی نوگوفتِم؟ ¹² من تی کارانَ آشکارَه کونم، ولی تو اونِ جَه سودی نوبوری و تی بُتان نتَأند ترَه یاری بوکوند. ¹³ اونموقع کی فریاد کونی و کمک خَأیی، اَ بُتایی کی جمعَ کوده دَأری دسِ جَه هیچ کاری بر نَأیه، اوشَأن اَقدر ضعیفد کی ایتَه باد اوشَأنَ تَأوَأده و پراکندَه کونه، ولی بدَأنید کسانی کی مرَه توکل کوند اَ زمینِ رو زندگی کوند و می مقدسِ کوهَ میراث بورد.