1
ای اورشلیم کی زنِ بی اولادِ مَأنستَأن تا هَسَه نزَه دَأری، آوازِ بلندِ مرَه سرود بخَأن و شادی جَه فریاد بوکون، چون خداوند فرمایه؛ تی زَأکأن ویشتر جی اون زنی بِه کی اونِ مرد همیشه اونِ ورجَه ایسَه بو.
2
خیمه ایی کی اونِ دورون زندگی کونی یَ پیله ترَه کون و اونِ پرده یانَ پهن تر، اونِ لافندانَ دراز و اونِ میخانَ محکمَ کون.
3
چونکی بزودی شیمی جمعیت زیادَ بِه و به هر طرف مُنتشر بید، تی زَأکأن تی سرزمینَ کی بیگانه یانِ دس دکفته دَأره تصرف کوند و شهرایی کی هَسَه ویراند دوباره آبادَ کوند.
4
نترس چون خجالت زده نیبی، تشویشم ندَأر چون رُسوا نیبی، خیانتی کی تی جوانی اَیام انجام بدَه ایی یَ جی خاطر بوری و، تی بیوه گی رُسوایی یَ، دِ به یاد نَأوری.
5
چونکی تی خالقْ کی اونِ نام یَهوَه صبایوته تی مَرده. اسرائیلِ قدوسْ کی همۀ جهانِه خدایه تی نجات دهنده یه.
6
ای اسرائیل خداوند ترَه دَخَأنه، تو ایته زنِ جوانِ رنج بیده یَ مَأنی کی اونِ مردْ جوانی اَیام اونَ ولَ کوده، ولی تی خدا اَطو گویه:
7
«ایته لحظه ترَه ولَ کودم، ولی هَسَه ایتَه رحمتِ عظیمِ اَمرَه ترَه وَأگردَأنم»
8
خداوند کی تی حامیه فرمایه:«ایتَه لحظه غضب بوکودم و می رویَ تی جَه وَأگردَأنم، ولی هَسَه ایتَه محبتِ اَبدی اَمرَه ترَه رَحمت کونم.»
9
هوطو کی نوح موقع قسم بوخوردم کی دِ وَأنألم دِ اَجور طوفان زمینَ بیگیره، هَسَه هم قسم خورم کی دِ ترَه غضب نوکونم و مجازات نوکونم.
10
حتی اگر کوه هان به لرزه دکفد و تپه یان به هم فووُد، ولی می محبت نسبتِ به تو هیچموقع جی میَأن نیشه و اون عهدِ سلامتی ایی کی تی مرَه دوَسته دَأرم تکان نوخوره.» خداوند کی ترَه دوس دأره اَطو فرمایه:
11
«ای اورشلیم، ای داغبیده، ای پریشانِ شهر کی آرامَ نوبوسته ایی، هَسَه من ترَه سنگِ فیروزه مرَه بنا کونم و تی پِیَ سنگِ لاجوردِ مرَه فوکونم.
12
تی بُرج و مناره یانَ یاقوتِ مرَه چَأکونم و تی دروازه یانَ جی بُلور، و همۀ تی حَصارانَ جواهراتِ اَمرَه چَأکونم.
13
همۀ تی ساکنان خداوندِ جَه تعلیم گیرد و صلح و سلامتیه عظیم تی مردمِ نصیب بِهه.
14
عدالت و انصاف تی دورون اُستوار بِه، ظلم و ستمِ جَه دور مَأنی و دِ نترسی، وحشت تی جَه دورَه بِه و دِ ترَه نزدیکَ نیبه.
15
اگر قؤمی ترَه حمله بوکونه می طرفه جَه نییه، پس اونی کی تی اَمرَه جنگ بوکونه سقوط کونه.
16
آهنگری کی کوره آتشَ باد زنه و اسلحه چَأکونه یَ من خلق بوکودم، و منم کی سربازی کی اسلحه بدس گیره و جنگ کونه یَ خلق بوکودم.
17
هر اسلحه ایی کی بر ضدِّ تو ساخته بیبه کار نوکونه و هر زبانی یَ کی محاکمه دورون بر ضّدِ تو گب بزنه تکذیب کونی. من می خادمانِ جَه حمایت کونم و پیروزی یَ اوشَأنِ نصیب کونم.»