46

¹ روزی بابِلِ مردم بُتِ «بِل» و بُتِ «نِبو» یَ پرستش کودد، ولی هَسَه اوشَأنْ به زانو خمَ بوسته دَأرد، اوشَأنِ بُتانَ گاری پوشت بار بزَه دَأرد و حیوانانِ خسته اوشَأنَ فَأکشد. ² اوشَأنِ بُتان اَسیر بوبُسته دَأرد و اوشَأنَ بوردَأن درد ایتَه جایِ دیگر و نتَأند خوشَأنَ نجات بدد. ³ ای یعقوبِ خاندان و ای بنی اسرائیلِ بازمانده یان مرَه گوش بوکونید. جی روزی کی بودونیا بأموئید من شیمی جَه مواظبت بوکوده دَأرم ⁴ من شیمی خدایم و تا زمانی کی پیرَه بید و شیمی مو سفیدَه بِه من شیمی جَه مواظبت کونم. من شمرَه خلق بوکودم و شیمی مراقبم، بله من شمرَه خودمِه اَمرَه بورم و نجات دهم. ⁵ مرَه کی مرَه مقایسه کونید؟ آیا کسیَه پیدا کونید کی می اَمرَه برابری بوکونه؟ ⁶ آیا مرَه اون بُتانی مرَه مقایسه کونید کی مردم خوشَأنِ طلا و نقره مرَه چَأکوده دَأرد؟ اوشَأن طلاسازانَ اَجیر کوند تا اوشَأنِ رِه خدایی چَأکونه، بازن زانو زند و اونَ پرستش کوند. ⁷ اونَ خوشَأنِ دوشِ سر نهد و اَطرف اوطرف بورد، وختی اونَ زمینِ سر نهد هویَ مَأنه، چون نتَأنه خو جا سر جَه تکان بوخوره، وختی کسی اونِ ورجَه دوعا کونه نتَأنه جواب بده و اونِ گرفتاریَ حل بوکونه. ⁸ ای گوناهکاران، اَنَ به یاد بأورید، فکر بوکونید و اونچی کی من بوکوده دَأرمَ در نظر بدَأرید، ⁹ و به یاد بأورید کی من جی قدیم اَلایام بارها دربارۀ آینده شمرَه خبردارَ کودم، چون من خدایِ قادرِ مُطلقم و هیچ کس می مَأنستَأن نییِه، فقط من خدایم. ¹⁰ آخرَ جی اول پیشگویی کونم و جی هون قدیم شمرَه خبردارَ کودم و بوگوفتم چی خَأیه پیش بَأیه. بوگوفتم کی می نقشه یان برقرار مَأنه و هر چی اِراده بوکونمَ به انجام رسانم. ¹¹ مردی یَ جی مشرقْ، جی اون سرزمینِ دور دخَأنم و اون ایتَه پرندۀ شکاری مَأنستَأن اَیه و می اِراده یَ اَنجام دِهه. من گب بزَم و انجام دهم و همۀ اَشَأنَ عملی کونم. ¹² ای مردمِ دیل سخت کی خیال کونید آزادی جَه دورید، مرَه گوش بدید. ¹³ من شیمی آزادی یَ نزدیک اَورم، دور نییِه، می نجات دِئرَ نوکونه، من اورشلیمَ نجات دهم و اسرائیلِ رِه عزّت و احترام اَورم.