45

¹ اَ اون چیزایی ایسه کی خداوند خو مسحْ بوبُسته یعنی کوروشَ گویه:«من کوروشِ راستِ دسَ بیگیفتم تا قؤمَأنَ اونِ برابرِ جَه به زانو بأورم، و اون پادشاهانَ اوشَأنِ تختانِ جَه بیجیر بأوره. شهرانِ دروازه یان اونِ رِه بازَه بِه و دِ دوَسته نیبه. ² من خودم تی پِشِ جَه راه شؤم و ناهموارِ راه هانَ ترِه هموارَ کونم. بُرنزی دروازه یانَ ایشکنم و آهنی پوشت بندانَ وَأوینم. ³ گنجان و ثروتهایی کی تاریکی میَأن جیگا بدَه دَأردَ ترَه بخشم تا تی شین بیبه، تا بدَأنی کی من یَهوَه اسرائیلِ خدایم. ⁴ من ترَه انتخاب بوکودم تا می بنده اسرائیلَ و قؤمی کی من انتخاب بوکوده دَأرمَ یاری بوکونی، من ترَه به نام دخَأدم و لقبِ پورافتخاری ترَه ببخشم، هر چند هنوز مرَه نشنَأسی. ⁵ من خداوندم و بجُز من خدایی نِئسَه. هر چند مرَه نشنَأسی ولی من ترَه قدرت دهم ⁶ تا جی مشرق تا مغرب همه بدَأند کی غیرِ من خدایی نِئسَه و فقط من خداوندم. ⁷ من نور و تاریکی یَ بوجود بأوردم، من هم برکت دهم هم بلا نازل کونم، من یَهوَهْ همۀ اَ چیزانَ بوجود اَورم. ⁸ ای آسمانان جی بوجُر بوارانید و ای اَبرَانْ عدالتَ فوکونید، و زمین سیراب بیبه و آزادی و عدالتِ شکوفه یانْ جوانه بزند، من کی خداوندم همۀ اَشَأنَ بجا اَورم. ⁹ وای بر اون کسی کی خو خالقِ مرَه جنگ کونه، آیا کوزهْ کوزه گره مرَه بحث کونه؟ آیا گیل کوزه گرَه گویه:«اَن چیسه کی چَأکودَأن دری؟» یا گویه:«تی کوزه دسته نَئره؟» ¹⁰ وای بر اون کسی کی خو پئرَه بوگویه:«اَن چی بو کی تولید بوکودی؟» یا خو مارَه بوگویه:«اَن چی بو کی بزَأیی؟» ¹¹ خداوند کی اسرائیلِ قدوسْ و اونِ خالقه دربارۀ اُمورِ آینده اَطو فرمایه:«آیا دربارۀ می زأکأن مرَه بازخواست کونید؟ شومَأن حق نَئرید مرَه بوگوئید چی وَأستی بوکوده بِم!» ¹² منم کی زمینَ چَأکودم و انسانَ خلق بوکودم، می دسَأن بو کی آسمانانَ وَأشَأد، من بؤم کی خورشید و ماه و ستاره یانَ تحتِ فرمان بیگیفتم ¹³ من خودمْ کوروشَ اوسه کودم تا می عدالتَ اِجرا بوکونه. من همۀ اونِ راه هانَ راست کونم. اون می شهرْ اورشلیمَ بازسازی و می اَسیرانَ آزادَ کونه. ولی هیچ کس اَ کارِ رِه اونَ دستمزد و یا رِشوه ایی فَأندَه دَأره.» خداوندِ قادرِ مُتعال اَطو بوگوفته دَأره.

فقط خداوند نجات دهنده یه

¹⁴ خداوند اسرائیلَ اَطو فرمایه:«مصرِ ثروت، و حَبشه تجارتْ تی شین بِه و سِبا بلند قامتِ مردکأن تی تابع بهد، اوشَأنْ تی دونبال اَید و غُل و زنجیرِ میَأن تی حضورِ جَه ردَ بود، و تی برابر تعظیم کوند و اِلتماس کونان گوید:«واقعاً کی خدا تی اَمرَه یه و بجُز اون کسی نییه، غیرِ اون خدایی وجود نَئره.» ¹⁵ ای خدا و ای اسرائیلِ نجات دهنده، واقعاً تو خدایی ایسی کی ترَه جیگا دیهی. ¹⁶ همۀ کسانی کی بُت چَأکوند سراَفکنده و رُسوا بود، بله همه تَه آبرو شِه. ¹⁷ ولی اسرائیلْ خداوندِ دسِ مرَه نجات پیدا کونه، اونِ قؤمِ نجات اَبدیه و تا اَبدالآباد هیچ موقع خجالت زده و رُسوا نوبود. ¹⁸ خداوند آسمانان و زمینَ چَأکود و اوشَأنَ اُستوار بوکود، اون اوشَأنَ هَطو هَچین خلق نوکود، بلکی جوری چَأکود کی انسان بتَأنه زمینِ دورون زندگی بوکونه، اون فرمایه:«من خداوندم و به غیرِ من خدایی نِئسَه، ¹⁹ من جِر جِرِکی گب نزَم و می وعده و می هدفَ بنی اسرائیلِ جَه جیگا ندم، من مردمَ نوگوفتم بیشید ایتَه تاریکِ جا می دونبال بگردید. من خداوندم و راستی و صداقتِ اَمرَه گب زنم و حقیقتَ اعلام کونم.» ²⁰ خداوند گویه:«ای قؤمانِ بازمانده یانْ، جمعَ بید، بأئید و نزدیکَ بید و می گبانَ گوش بوکونید، چی ناداند کسانی کی چوبی بُتانَ خوشَأنِ مرَه حمل کوند و خدایی حضور دوعا کوند کی نتَأنه اوشَأنَ نجات بده. ²¹ پس بأئید همدیگرِ اَمرَه مشورت بوکونید و دلیل بأورید، بأئید خودتانِ اِدعایَ ثابت بوکونید. کی جی قدیم اَلایام اونچی کی اتفاق دکفتَه پیشگویی بوکوده بو؟ آیا من کی یَهوَه یم و به غیرِ من خدایی نِئسَه اَ کارَه نوکود؟ من خدایی ایسم عادل و نجات دهنده، بله، به غیرِ من خدایی نِئسَه. ²² ای زمینِ مردمان بأئید می ورجَه تا نجات پیدا کونید، چره کی من خدایم و خدایِ دیگری وجود نَئره. ²³ خودمِ ذاتَ قسم بوخوردم و اَ کلامی کی می دهنِ جَه بیرون اَیه حقیقت دَأره و هیچ موقع عوضَ نیبه، هر زانویی می برابرِ جَه خمَ بِه و هر زبانی قسم خوره کی مرَه وفادار بیبه ^{24 25} و دربارۀ من گویده؛ اَمی عدالت و قوّت خداوندِ طرفه جَه یه. و کسانی کی می جَه عصبانی بود می ورجَه اَید و سراَفکنده بود. من همۀ بنی اسرائیلَ نجات دهم، اوشَأن عادل به حیساب اَید و افتخار کوند.»