1
روزی فَأرسه کی پادشاهی عادل و دوروستکار سلطنت کونه و رهبرانی با انصافْ کشورَ اداره کوند.
2
هر کودام جی اوشَأن ایتَه پناهگاه مَأنستَأن بادِ جلو و ایتَه سرپناه مَأنستَأن توفان دورون بهد، اوشَأن جویِ آبِ مَأنستَأند ایتَه خوشکِ بیابانِ دورون، و یا ایتَه صخرۀ خونکِ سایهْ ایتَه سوزانِ صحرا دورون.
3
اوشَأنِ چوم و گوش مردمِ نیازانِ دِئِن و ایشتَأوستَأنِ رِه بازه.
4
اوشَأن بی حوصله نوبود و فَهم و شعورِ مرَه مردمِ اَمرَه گب زند.
5
اونموقع دِ کسی آدمایِ پَست و خسیسَ شریفْ نوگویه، دِ آدمایِ اَحمق و رَذلَ نجیبْ دَنخَأند.
6
چونکی آدمِ اَحمق و پَستْ همیشه گبایِ احمقانه زنه و همیشه در فکرِ شرارته تا بتَأنه تفرقه تَأوَأده، اَجور آدمان بر ضدِّ خدا عقایدِ نادوروستْ گوید، هیچموقع ویشتایانَ سِئرَ نوکوند و تشنه آدمِ دسْ آب فَأندد.
7
آدمِ رذلِ راه و روش همیشه شرارته، اون گبایِ دوروغِ اَمرَه فقیر بیچاره یانِ حقَ خوره، و دوز و کلکِ اَمرَه کاری کونه کی اوشَأن نتَأند دادگاه میَأن خوشَأنِ حقَ فَأرسد.
8
ولی آدمِ شریف دیگرانِ مرَه صداقتِ اَمرَه کار کونه، اون حق و راستی دفاع کودَأنِ وَسی اُستوار ایسه.
اورشلیمِ زنَأکان
9
آی زنانی کی راحت و آسوده شمره زندگی کونید، گوش بوکونید چی گوفتَأن درم. ای دخترانی کی هیچ نگرانی ایی نَئرید و مطمئنید، مرَه گوش بدید.
10
ایتَه سال کی بوگذره شومَأنی کی مطمئینیدْ مُضطرب و پریشان بیهید، چون اَنگور چینی قطعَ بِه و دِ میوه چینی فصل وجود نَئره.
11
هَسَه ای زنانی کی آسوده بوئید، جی ترس بپرکید، ای بی غم دخترانْ پریشانْ بیبید، خودتانِ رختَ بکنید و لختَ بید، فقط ایتَه کهنه پارچه مرَه خودتانِ کمر به بیجیرَ بوپوشَأنید.
12
و اون مزارعِ حاصلخیز و تاکستانهایی کی جی میَأن بوشو دَأردِ رِه ماتم بیگیرید و شیمی سر و سینه یَ بزنید،
13
و می قؤمِ سرزمینِ وَسی کی خیس و خار اونَ بوپوشَأنه دَأره، بله، همۀ اون خانه یانِ شادِ وَسی و شیمی شهرِ پور افتخار وَسی گریه بوکونید.
14
چون حتی شیمی کاخایِ سلطنتی هم ویرانَ بِه و شیمی شهرانْ جی جمعیت خالی بِه. قلعه یان و بُرجایِ دیده بانی خرابَ بهد و گوره خران اوشَأنِ دورون گردد و گاو و گوسفندان اویَ چرا کوند.
15
ولی ایبار دیگر خدا خو روحَ جی آسمان اَمی رو فوکونه، اونموقع بیابانْ حاصلخیز بِهِه و باغَ تبدیل بِه، و باغْ جنگلِ مَأنستَأن به نظر اَیه.
16
اَمی سرزمینِ میَأن عدالت و اِنصاف برقرار بِه.
17
عدالتِ ثمره سلامتی بِه و عدالتِ نتیجه، آرامی و اَمنیتْ تا اَبدالآباد.
18
می قؤمْ آسایشِ و اَمنیتِ مرَه، خانه هایی پور جی آرامشِ میَأن زندگی کوند.
19
ولی آشوریان هلاکَ بود، و اوشَأنِ خانه یان خاکِ مرَه هموارَ بِه.
20
ولی خوش به حالِ شومَأن کی خدا شمرَه برکت دِهه، شومَأن رودخانه کنارانِ جَه بذر پأشأنید و شیمی محصولْ زیادَه بِه، و تَأنید شیمی گاو و اولاغانَ چراگاه هایِ سرسبزِ دورون ولَ کونید.