31
وای بر کسانی کی مصرَ توکل کوند
1
وای بر کسانی کی کمک گیفتنِ رِه شُد مصر، و بجای اَنکی اسرائیلِ قدوسِ خدایَ توکل بوکوند و اونِ جَه کمک بخَأید، مصرِ قویه ارتش و اوشَأنِ اَسبان و اوشَأنِ اَرابه یان و اوشَأنِ سربازایِ قویَ اُمید دوَسته دَأرد.
2
ولی خداوند حکیمه و دَأنه کی چی بوکونه! اون بَلا و مصیبت اوسه کونه، خداوند اونچی جَه کی بوگوفته دَأره وَأنگرده.
3
مصرِ مردمان انساند نه خدا، اوشَأنِ اَسبان جِسمدْ نه روحْ، وختی خداوند خو دسَ مجازاتِ رِه راستَ کونه، هم مصریان و هم کسانی کی مصرِ جَه کمک خَأید کفد و هلاکَ بود.
4
خداوند مرَه اَطو بوگوفته:«وختی شیر ایتَه گوسفندَ شکار کونه، هر چقدم چوپانان داد و فریاد بوکوند، نتَأند اونَ بترسَأند و اونِ شکارِ جَه اونَ دورَ کوند، هَطو وختی من، خداوندِ قادرِ مُتعال کوهِ صَهیونِ دفاع وَسی بَأیم هیچکسِ جَه نترسم و هیچی نتَأنه می مانع بیبه.
5
هوطو کی ایتَه پرنده خو جوجه یانِ حمایت کودَأنِ وَسی خو لانه جُر پروبال زنه، من خداوندِ مُتعال هوطو اورشلیمِ جَه مواظبت و اونَ آزادَ کونم.»
6
ای بنی اسرائیل، شومَأن نسبتِ به خدا گوناهایِ زیادی انجام بدَه دَأرید، ولی هَسَه اونِ طرف وَأگردید.
7
روزی فَأرسه کی همۀ شومَأن بُتهایِ طلا و نقره ایی یَ کی شیمی دسِ اَمرَه چَأکوده ایدَه فیشانید»
8
اونموقع آشور شمشیری مرَه کی انسانِ جَه نییه بلکی جی خدا طرفه جی میَأن شِه، آشورِ سربازان جنگِ جَه فرار کوند و اوشَأنِ جوانان اَسیر بود.
9
اوشَأنِ قدرت جی ترس جی میَأن شِه، اوشَأنِ فرمانده یان وختی اسرائیلِ جنگِ پرچمَ بیدیند جی ترس پرکد و فرار کوند.» اَشَأنَ خداوندی فرمایه کی صَهیونِ جَه ستایش بِه و اونِ آتشْ اورشلیمِ قربانگاه رو روشنه.