17

¹ وحی دربارۀ دمشق: دمشق جی میَأن شِه و ویرانه بِهِه. ² «عَروعیرِ» شهران متروکه بِهد و گاو و گوسفندان اویَ خوسد و کسی نِئسَه کی اوشَأنَ بترسَأنه. ³ اسرائیلِ پادشاهی بی دفاع بِه و خو قدرتَ جی دس دِهه، دمشقِ سلطنت سقوط کونه، اوشَأنی کی سوریه میَأن زنده مَأند اسرائیلِ مردمِ مَأنستَأن خوار و ذلیل بود، چونکی خداوندِ متعال اَطو بوگوفته. ⁴ خداوند فرمایه:«اسرائیلِ عظمت محوَ بِه و اونِ ثروت جی میَأن شِه، ⁵ او روز رِه اسرائیل زمینی مَأنستَأن بِهه کی اونِ محصولَ درو بوکودد و دسته یانَ وُچِه دَأرد، دقیقاً رِفائیمِ دشتِ مَأنستَأن کی دِرو کودَأن پسِ رِه چیزی اونِ دورون باقی نمَأنه. ⁶ ایته عدۀ خیلی کم اسرائیلِ دورون زنده مَأند، و اسرائیل زیتون داری یَ مَأنه کی اونِ زیتونَ بیچه دَأرد و فقط دو سه تَه زیتون اونِ بوجُری شاخه یانِ رو بمَأنسته دَأره و چهار پنج تَه هم بیجیری شاخه یانِ رو.» اَشَأنَ یَهوَه اسرائیلِ خدا بفرماسته دَأره. ⁷ وختی او روز فَأرسه، مردم خوشَأنِ خالقِ طرف رو اَورد، یعنی اسرائیلِ قدّوسِ خدا طرف فَأندرد. ⁸ و دِ قربانگاه هایی کی خوشَأنِ دسِ اَمرَه چَأکوده دَأردَ نظر تَأنوَأدد و بُتایِی کی خوشَأنِ اَنگوشتانِ مرَه بتراشته دَأردَ توکل نوکوندْ یعنی دِ بُتهایِ اَشیریم و مذبح هایِ بوخورَ اعتماد نوکوند. ⁹ او روز کی فَأرسه اوشَأنِ محکمِ شهران ویرانه و متروکه بِهِه، هونموقعی مَأنستَأن کی حِوّیان و اَموریان جی ترس فرار بوکودد و خوشَأنِ شهرانَ اسرائیلیانِ رِه بند. ¹⁰ چون ای اسرائیل تو تی خدایِ نجات دهنده یَ جی یاد بوبورده ایی و خودتِ صخره یَ کی تی پناگاه یَ به یاد نَأوری؟ ولی در عوض ترِه باغ گیری و دار و درخت کاری تا غریبه یانِ بُتانَ اونِ دورون پرستش بوکونی! ¹¹ ولی اَنَ بدَأن کی حتی اگر هو روزی کی درختانَ کأری اوشَأن شکوفه بزندْ ولی بازم ترِه محصولی نأورد، او روزِ رِه شیمی نصیب فقط ناخوشی و دردِ بی درمانه. ¹² جهانِ قؤمان دریا شورشِ مَأنستَأن تب و تابِه میَأن ایسَد و دریا موجِ مَأنستَأن غرش کوند ¹³ و سیلِ مَأنستَأن فوتورکد، ولی خداوند اوشَأنَ تشر زنه و اوشَأن فرار کوند به جاهای دور. اوشَأن همه تَه، سَرچینا مَأنستَأن کی کوهپایه جیر اَطرف اوطرف شِه، و یا خاکِ مَأنستَأن گردبادِ دورونْ پراکندَه بود. ¹⁴ اوشَأن شبأن باعثِ ترس و وحشت بود ولی هنوز صُبح نوبوسته دِ اوشَأنِ جَه خبری نییه. بله، اَ کسانی سزایه کی اَمی سرزمینَ تاراج زند و اَمرَه غارت کوند.